مەملەكەت باسشىسىنىڭ Nur Otan پارتياسىنىڭ كەزەكتەن تىس سەزىندە ايتقان سوزدەرى كوڭىلگە قونىمدى. اسىرەسە ساياسي ۇيىمنىڭ قاتارىنا حالىقتىڭ سەنىمىنە يە تۇلعالاردى تارتۋعا بايلانىستى پىكىرى قۇپتارلىق.
پرەزيدەنتتىڭ نەگىزگى ويلارىمەن كەلىسۋگە بولادى. نەگە دەسەڭىز, كوپشىلىك قازاقستاندا دەموكراتيالىق پروتسەستەردىڭ قارقىن الىپ, ساياسي تۇلعالاردىڭ حالىققا جاقىن بولۋىن تىلەيتىنى ءمالىم. پارلامەنتتە كوپپارتيالىق جۇيەنىڭ قالىپتاسقانىن دۇرىس دەپ ەسەپتەيمىن. مىسالعا ايتساق, قازىر وندا «اۋىل» پارتياسى ۇسىنىلماعان. بۇل ۇيىمعا پارلامەنتتەن ورىن بەرىلۋىن اۋىل حالقى, ونىڭ ىشىندە اۋىل شارۋاشىلىعىمەن اينالىساتىن ازاماتتار اسىعا كۇتىپ وتىر. سول سەبەپتى جوعارعى پالاتاعا اتالعان پارتيانىڭ مۇشەلەرى دە كىرۋ كەرەك دەپ ويلايمىن.
ەكىنشىدەن, پرەزيدەنتتىڭ پارتيانىڭ قۇرامىندا بولماعانى دا دۇرىس شىعار. مۇنداي مىسالدار كوپتەگەن وركەنيەتتى ەلدە بار جانە قولدانىستا. ەگەر دە شىن مانىندە دەموكراتيالىق مەملەكەت قۇرعىمىز كەلسە, مۇنى دا ىسكە اسىرۋىمىز كەرەك دەپ سانايمىن.
ۇشىنشىدەن, پارتيانىڭ دەڭگەيىن كوتەرۋ ءۇشىن ونىڭ ءوز ىشىندە ىرىكتەۋ ۇدەرىسى جۇرۋگە ءتيىس. ايتالىق, ءبىرىنشى حاتشىنى, وبلىستىق جەرلەردەگى اتقارۋشى حاتشىلاردى, ءبىرىنشى ورىنباسارلاردى اكىم تاعايىنداماي پارتيانىڭ مۇشەلەرى تاڭداۋى قاجەت. سەبەبى اتقارىلعان جۇمىس پەن العا قويىلعان مىندەتتەردىڭ ەسەبى بولادى. وسى ارقىلى ولاردىڭ سايلانىپ تاعايىندالعانىن حالىق تا بىلەدى.
اۋدان, قالا, وبلىس اكىمدەرىن دە حالىق سايلاۋ كەرەك دەگەن اڭگىمەنىڭ ايتىلىپ جۇرگەنىنە دە ءبىراز بولدى. بۇعان ءتۇبى كەلەمىز دەپ سەنەمىن. ال مۇنى ىسكە اسىرۋ ءۇشىن وسىنداي باستامانى پارتيا ءبىرىنشى بولىپ جاريالاپ, كوتەرۋگە ءتيىس. دەمەك وسىنداي ماڭىزدى ماسەلەلەردە پارتيا جاۋاپكەرشىلىكتى وزدەرىنە الىپ, باستاماشىل بولۋى قاجەت. ياعني ساياسي ينستيتۋت حالىققا جاقىن بولۋدى كوزدەسە, باستامالاردى كوتەرە ءبىلۋى كەرەك.
وڭىرلىك ءماسليحاتتاردىڭ قىزمەتىنە كەلسەك, قابىلداۋ جۇمىستارىن كوبەيتىپ, كەز كەلگەن ماسەلەگە بايلانىستى شەشىمدى شۇعىل ءارى ءتيىمدى قابىلداۋدىڭ تەتىكتەرىن ەنگىزگەن دۇرىس. شىندىعىن ايتقاندا, وبلىستىق ءماسليحات دەپۋتاتتارىنىڭ قۇزىرەتى شەكتەۋلى. ماسەلەن, وڭىرلەردە قانداي دا ءبىر شەشىم شىعارىلسا, سونىڭ ءارى كەتسە 5-10%-نا عانا دەپۋتاتتار ءوز ۇسىنىستارىن ايتىپ, جەتكىزۋگە مۇمكىندىك بار. سول سەبەپتى وڭىردەگى دەپۋتاتتاردىڭ قۇزىرەتىن كەڭەيتكەن ارتىق بولماس.
قۋانىش سۇلەيمەنوۆ,
Qazaq Aqbas رەسپۋبليكالىق پالاتاسىنىڭ توراعاسى,
شىعىس قازاقستان وبلىسىنىڭ ءماسليحات دەپۋتاتى