قازاقستاندىق اننا دانيلينا ايەلدەر تەننيسى قاۋىمداستىعى (WTA) جاريالاعان الەمدىك رەيتينگىدە رەكوردتىق ناتيجەگە قول جەتكىزدى, دەپ حابارلايدى Egemen.kz.
قازاقستان تەننيس فەدەراتسياسى ءمالىم ەتكەنىندەي, ا.دانيلينا بۇعان دەيىن جۇپتىق سىندا 25-ورىندا تۇرسا, ەندى 24-ساتىعا كوتەرىلدى. بۇل ونىڭ ۇزدىك كورسەتكىشى بولىپ تابىلادى.
سونداي-اق ەلەنا رىباكينا مەن جىبەك قۇلامباەۆا جۇپتىق سىندا سايكەسىنشە 50-ءىنشى جانە 308-ساتىعا جوعارىلادى. جەكەلەي سىندا قازاقستاننىڭ ءبىرىنشى راكەتكاسى ە.رىباكينا بۇرىنعىسىنشا 12-ورىندا كەلەدى.
يۋليا پۋتينتسەۆا 42-دەن 41-گە, زارينا دياس 118-دەن 117-گە جوعارىلادى. ە.رىباكينا وسى اپتادا باستالعان سانكت-پەتەربۋرگ WTA 500 تۋرنيرىندە 3-راكەتكا بولىپ تىركەلگەن. ول باستاپقى كەزدەسۋىن دۇنيەجۇزىلىك رەيتينگتە 81-ساتىداعى رەسەيلىك ۆارۆارا گراچەۆامەن وتكىزەدى.
ەرلەر اراسىندا قازاقستاننىڭ ءبىرىنشى, الەمنىڭ 31-راكەتكاسى الەكساندر بۋبليك روتتەردام (نيدەرلاندى) ATP 500 جارىسىندا باق سىنايدى. ول العاشقى اينالىمدا الەمنىڭ بۇرىنعى ءبىرىنشى راكەتكاسى, قازىر رەيتينگتە 95-ورىندا تۇرعان اتاقتى ۇلىبريتانيالىق ەندي ماررەيمەن كۇش سىناسادى.
ەگەر ە.رىباكينا مەن ا.بۋبليك وسى ايتۋلى دودالاردى ءساتتى وتكىزسە, رەيتينگىدە جوعارىلايتىنى انىق. تاعى ءبىر قازاقستاندىق, رەيتينگتە 165-ورىنداعى ميحايل كۋكۋشكين شەربۋر (فرانتسيا) چەللەندجەر ءتۋرنيرىن ءساتتى باستادى. ول العاشقى قارسىلاسى, الەمنىڭ 113-ءىنشى, وسى جارىستىڭ 3-راكەتكاسى, چەحيالىق توماش ماحاچتى 6:3, 6:2 ەسەبىمەن ۇتتى.