قىسقى جول نەگە قاۋىپتى؟!

ارينە, جول اپاتىنىڭ سەبەبى كوپ. سونىڭ ىشىندە قىسقى جولداردىڭ قار مەن مۇزدان ۋاقتىلى تازالانىپ تۇرۋى – جولاۋشى قاۋىپسىزدىگىنىڭ ءبىر كەپىلى. جوعارىداعى جول اپاتتارىنىڭ كەيبىرى ءۇشىن ءدال وسى جول تازالاۋشى مەردىگەر مەكەمەلەردىڭ ۇستىنەن قىلمىستىق ءىس كوتەرىلگەنى دە سوندىقتان.

– قىس مەزگىلىندە اۆتوجولداردى كۇتىپ-ۇستاۋ ماسەلەسى بويىنشا 2021 جىلدىڭ ماۋسىم ايىندا اۋىر جۇك كولىك جۇرگىزۋشىلەرىمەن بولعان كەزدەسۋدە كوتەرىلگەن بولاتىن. بىلتىر قاراشا ايىندا دا ورال قالالىق پارتيا­لىق باقىلاۋ كوميسسياسى وبلىستىق پوليتسيا دەپارتامەنتى وكىلدەرىمەن كەزدەسكەن كەزدە دە حالىق تاراپىنان ەسكەرتۋ ايتىلدى. الەۋمەتتىك جەلىدە دە بەلسەندى ازاماتتار عانا ەمەس, اۋىلدىق وكرۋگتەردىڭ رەسمي پاراقشالارىندا جول تازارتۋ, كوكتايعاق كەزىڭدە قۇم شاشۋ ماسەلەسىن كوتەرگەن جازبالار جيىلەپ كەتتى. سوندىقتان ءبىز, پارتيالىق باقىلاۋ كوميسسياسىنىڭ مۇشەلەرى, بەلسەندى ازاماتتارمەن بىرلەسە وتىرىپ, وتكەن جىلدىڭ قاراشا-جەلتوقسان ايلارىندا وڭىردەگى جولدىڭ جاعدايىنا رەيدتىك شارالار ۇيىمداستىرۋدى باستادىق, – دەيدى Nur Otan پارتياسى وبلىستىق فيليالى پارتيالىق باقىلاۋ جونىندەگى ينسپەكتورى افيزا سەمعاليەۆا.

وڭىردە اۆتوموبيل جولدارىنىڭ جالپى ۇزىندىعى 6 496,7 شاقىرىم بولسا, ونىڭ 1 414 شاقىرىمى – رەسپۋب­ليكالىق ماڭىزى بار اۆتوجولدار. ال وبلىستىق جانە اۋداندىق ماڭىزى بار 5 082,7 شاقىرىم اۆتوجولدىڭ نە­بارى 34 پايىزى عانا جاقسى جانە قاناعات­تانارلىق جاعدايدا. رەسمي مالىمەتكە قاراعاندا, وبلىستاعى 3 349,5 شاقىرىم جول قاناعاتتانارلىقسىز. بۇل – رەس­پۋبليكا بويىنشا ەڭ تومەن كورسەتكىشتىڭ ءبىرى. مىنە, وسىنداي جاع­دايدا قار مەن مۇزدان ۋاقتىلى تازالانبايتىن بولسا, جولدىڭ جاعدايىن كوز الدىڭىزعا ەلەس­تەتە بەرىڭىز.

 تەكسەرىس نەنى كورسەتتى؟

ەلىمىزدىڭ يندۋستريا جانە ينفرا­قۇرىلىمدىق دامۋ مينيسترلىگىنە قا­راستى اۆتوموبيل جولدارى كوميتەتى بەكىتكەن ەرەجە بار: ادەتتەگى جاعدايدا جول جابىندىسى 4 ساعاتتا, اۋا رايىنىڭ توتەنشە جاعدايىندا 8 ساعات ىشىندە تازارتىلۋعا ءتيىس. ال وبلىستىق ماڭىزى بار جولداردا جول جيەكتەرىن تازارتۋعا مەردىگەرگە 2 كۇننەن 4 كۇنگە دەيىن ۋاقىت بەرىلەدى. پارتيالىق باقىلاۋ ءدال وسى ديرەكتيۆا باتىس قازاقستان وبلىسىندا ساقتالماي وتىرعانىن كورسەتكەن.

وبلىس اۋماعىنداعى 1 414 شاقى­رىم­عا سوزىلعان رەسپۋبليكالىق ماڭىزى بار جولدارعا جاۋاپتى «قازاۆتوجول» اق وبلىستىق فيليالىنىڭ جولدى كۇتىپ-ۇستاۋىن ۇيىمداستىرىپ وتىرعان «قازاۆتودور» مەكەمەسىنىڭ ارنايى تەحنيكامەن قامتىلۋى نەبارى 58%-دى قۇرايدى. ەڭ سوراقىسى, وسى 58 پا­يىزدىڭ ىشىندە جۇمىسقا جارامدىسى 41% عانا بولىپ شىققان! ياعني ءدال وسى كۇشپەن 1 414 شاقىرىمدى مەرزىمىنە سايكەس كۇتىپ-ۇستاۋ مۇمكىن ەمەس.

اۆتوموبيل جولدارىن قىسقى كۇتىپ-ۇستاۋ بويىنشا ۇسىنىمعا سايكەس, جول بولىگىن كۇتىپ ۇستاۋدى مىندەتىنە العان مەردىگەر مەكەمە جول مەن كوپىرلەردى قار باسۋدان قورعاپ, قاجەت كەزىندە كوكتايعاققا قارسى ۋاقتىلى شارالار جاساۋعا ءتيىس. بۇل ءۇشىن تەحنيكاسى دا­يىن بولۋى شارت. جىلىتۋ ورىندارى, قۇم بازالارى الدىن الا دايىندالۋى قاجەت. الايدا ءتيىستى شارت بويىنشا مەملەكەت قارجىسىن الىپ وتىرعان مەكەمەلەر ءوز مىندەتىنە جاۋاپسىز قاراعان.

ماسەلەن, اقجايىق اۋداندىق پار­تيا­لىق باقىلاۋ كوميسسياسىنىڭ قورى­تىن­دىسىنا نازار سالايىق: «تەح­نيكالىق تالاپتا جۇمىس ءار ايدىڭ 30-ىنا دەيىن قابىلدانادى دەپ كورسە­تىل­گەنىنە قاراماستان, «جولاۋشى جول» جشس كەلىسىمشارت تالاپتارىن ۋاقتىلى ورىنداماي, جولدى كۇ­تىپ-ۇستاۋ جۇمىسىن ءتيىستى دەڭگەيدە جۇر­گىزبەدى. مەردىگەر مەكەمەگە جۇمىستاردى ۋاقتىلى جانە ساپالى اتقارۋ جونىندە بىرنەشە رەت ەسكەرتۋ حات جولدانعان. جەرگىلىكتى تۇرعىندار تاراپىنان جولدى كۇتىپ-ۇستاۋ ساپاسىنا قاتىستى بىر­نەشە رەت شاعىم ءتۇستى».

ال قازتالوۆ اۋداندىق پارتيالىق باقىلاۋ كوميسسياسى اۋدان اۋماعىن­داعى وبلىستىق ماڭىزى بار جولدىڭ ءبىر بولگىن كۇتىپ ۇستاۋعا ءتيىس «ستارت­سترويسەرۆيس» جشس «قىسقى كەزەڭگە دايىن ەمەس» دەگەن شەشىمگە كەلگەن. ويتكەنى مەكەمەنىڭ تەحنيكا ساقتايتىن بازاسى, جىلىتۋ بەكەتتەرى, ينەرتتى ماتە­ريالدار قورى بولماعان. قاعاز جۇ­زىندە تىركەۋدە تۇرعان 7 تەحنيكا تابىلماي, شىن مانىندە 1 عانا تەحنيكا بار بولىپ شىققان. وسى كەمشىلىكتەر بو­يىنشا اكت تولتىرىلىپ, ءتيىستى مەكەمەگە حابارلانعان.

جاڭاقالا اۋداندىق پارتيالىق باقى­لاۋ كوميسسياسى جاڭاقالا – اقجا­يىق, جاڭاقالا – قىزىلوبا تاسجولىنا رەيدتىك شارا جۇرگىزىپ, جولدىڭ قاردان تازالانباعانىنا, تۇزدى قۇم سەبىلمەگەنىنە كۋا بولعان.

بايتەرەك اۋدانىنا قاراستى ورال-كير­سانوۆ باعىتىنداعى جولدى كۇتىپ-ۇستاۋعا جاۋاپتى مەردىگەر «ستارت­سترويسەرۆيس» جشس بىرنەشە مارتە ەس­كەرتۋ العانىنا قاراماستان, جولدا كوك­تايعاق بولعان. وسى مەكەمەنىڭ تەح­نيكالىق بازاسىن تەكسەرمەك بولعان كوميسسيا مەردىگەردىڭ ءوزىن دە, تەحنيكاسىن دا تابا الماپتى.

ماسەلەنىڭ ءمان-جايى

Nur Otan پارتيالىق باقىلاۋ كوميس­سياسىنىڭ باستاماسى بار, جەرگىلىكتى بەلسەندى ازاماتتاردىڭ ارالاساۋى بار, وڭىردەگى جول ماسەلەسى سوڭعى كەزدە كۇن تارتىبىنەن تۇسپەيتىن تاقىرىپقا اينالدى.

قاراشا-جەلتوقسان ايلارىندا حا­لىق­قا سۇراۋ سالىپ, جول جاعدايىن قادا­عالاعان پارتيالىق باقىلاۋ كوميس­سيالارىنا حالىقتان ءتۇرلى شاعىم جاۋىپ كەتكەن. ماسەلەن, «ورال – اقتوبە با­عىتى, اقتوبە شەكاراسىنا دەيىن جول كوك­تايعاق», «ورال – اقتوبە با­عىتى (العاباس تۇسى), قاراتوبە – ورال با­عىتى كوكتايعاق», «اقساي – شىڭعىرلاۋ جولى كوكتايعاق», «ورال – اتىراۋ كۇرە جولى, 238 شاقىرىم تۇسى كوكتايعاق», «چاپاەۆ – تايپاق جولى جولى قاردان تازارتىلمايدى, كوكتايعاق», «بارباستاۋ – اقجايىق – يندەربور باعىتىنداعى جول­دىڭ بازارتوبە اۋىلىنىڭ تۇسى كۇز­گى جاۋىندا وي-شۇڭقىر بولعان باتپاق قىرىلماعان», «جاڭاقالا – چاپاەۆ (پياتيمار تۇسى) جولى قاردان تازارتىلمايدى», «جاڭاقالا – جاڭاقازان جولى قاردان تازارتىلمايدى», «جاڭا­قالا – سايحىن جولى باتپاقتان كەيىن قى­رىلمايدى», «بايتەرەك اۋدانى دوستىق اۋلىنا كىرەبەرىس جولى تازالانباعان», «ورال – كيرسانوۆ جولى كوكتايعاق, جول جيەگى تازارتىلمايدى», «ورال – سامارا كۇرە جولىندا كوتەرىلەتىن جانە تۇسەتىن بيىك توبەلەر كوكتايعاق»...

جوعارىدا ايتىلعانداي, پارتيالىق باقىلاۋ كوميسسياسىنىڭ مۇرىندىق بولۋىمەن 14 جەلتوقسان كۇنى وبلىستىق جولاۋشىلار كولىگى جانە اۆتوموبيل جولدارى باسقارماسى, «قازاۆتوجول» اق وبلىستىق فيليالى, وبلىستىق, اۋدان­دىق ماڭىزى بار جولداردى كۇ­تىپ-ۇستاۋعا جاۋاپتى مەردىگەرلەر ZOOM ونلاين پلاتفورماسى ارقىلى باس قو­سىپ, ماسەلەنى تالقىلادى. 22 جەل­توقسان كۇنى «جولاۋشى جول» جانە «ستارت­سترويسەرۆيس» جشس مەردىگەرلەرىنىڭ جۇمىسى تىڭدالىپ, اقجايىق, جاڭا­قالا, قازتالوۆ, بايتەرەك اۋداندارى بويىنشا جولدى كۇتىپ-ۇستاۋ باعىتىندا تۇرعىنداردىڭ ءۋاجى جەتكىزىلدى.

وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسى ايدار مەنەەۆ ۇسىنعان مالىمەتكە قاراعاندا, ءوڭىردىڭ 1 620 شاقىرىمدىق وبلىستىق ماڭىزى بار جولدارىن 2 022 ­جىل بويى كۇتىپ ۇستاۋ ءۇشىن 2022 جىل­عا 877 113 296 تەڭگە قارجى قاراس­تى­رىل­دى. بۇل قارجى 13 مەردىگەر مەكەمەگە بەرىلگەن. وسى مەردىگەرلەردىڭ باسىم بولىگى ۇشجىلدىق كەلىسىمشارتقا 2021 جىلى عانا وتىرعان كورىنەدى.

– ەگەر مەردىگەر مەكەمە ءوزىنىڭ موي­نىنا العان مىندەتىن ورىنداماسا, شارت بويىنشا وعان جالپى العان قارا­جاتىنىڭ 0,1% كولەمىندە ايىپپۇل سالىنادى. انىقتالعان ءاربىر فاكت بويىنشا وسىنداي جازا قاراستىرىلعان. وسى قىستىڭ قورىتىندىسى بويىنشا ءبىز مونيتورينگ جاساپ, قارايمىز. ەگەر شارتتى تولىق ورىنداماي, حالىقتان ارىز-شاعىم كوپ تۇسەتىن بولسا, مەردىگەرمەن اراداعى كەلىسىمشارتتى بۇزۋعا دەيىن بارامىز, – دەيدى ا.مەنەەۆ.

وڭىردە جول ماسەلەسىن ءجيى كوتەرىپ جۇرگەن قوعام بەلسەندىسى ايبولات بوكەنوۆ 0,1% ايىپپۇلدىڭ وتە از ەكە­نىن ايتادى. سونداي-اق مەملەكەت قار­جىسى مەردىگەر مەكەمەلەرگە قىس­تا قار تازالاۋعا عانا ەمەس, جول تاڭبا­لارىن سالۋ, جول بەلگىلەرىن ورنا­تۋ, جول جيەگىندەگى شوپتەردى جانە اعاش­تاردى شابۋ, اسفالتبەتون جابى­نىن شۇڭقىرلى جوندەۋ جانە ت.ب. ماقسات­تارعا دا بەرىلگەن. مىسالى, 1 شاقى­رىمدىق جول سىزىعىن سالۋ ءۇشىن 42 394 تەڭگە قاراستىرىلعان. جول بويىندا ءبىر بەلگى قويۋ 13 700 تەڭگەگە باعالانعان. ايت­پاقشى, وسى جول بەلگىلەرىنىڭ دە ءوزى­نىڭ پايدالانۋ مەرزىمى بولادى ەكەن. رەيد وسىنداي جول بەلگىلەرىنىڭ ءتيىس­تى مەرزىمىندە جاڭارتىلمايتىنىن كورسەتكەن. مىسالى, ورال – اتىراۋ كۇرە جولى بويىنداعى كەيبىر بەلگىلەردىڭ الماستىرۋ مەرزىمى 7-8 جىلعا اسىپ, ەسكىرىپ كەتكەن.

وڭىردەگى قىسقى جول تازالىعىنا باي­لانىستى وتكەن قوعامدىق تىڭداۋ وسى سالاداعى كەيبىر تۇيتكىلدەردى انىق كورسەتتى. ماسەلەن, جولداردى كۇ­تىپ ۇستاۋ ءۇشىن جاريالانعان تەندەرگە قاتى­سۋشى مەكەمەنىڭ تەحنيكالىق بازاسى, الەۋەتىنە قاتىستى تالاپ وتە جەڭىل. مەردىگەر تەندەرگە قاتىسۋ ءۇشىن كەز كەلگەن مەكەمەنىڭ تەحنيكاسىن كورسەتىپ, قۇجاتىن تىركەي الادى. قىس كەزىندە جولدى قار مەن مۇزدان دەر كەزىندە تازالاي الماي, حالىقتىڭ شاعىمىن ەستىپ وتىرعان دا وسىنداي مەكەمەلەر. سوندىقتان كەلەشەكتە تەندەر شارتتارىنا وزگەرىس ەنگىزىپ, تالاپتى كۇشەيتۋ كەرەك, – دەيدى تاعى ءبىر قوعام بەلسەندىسى ەدىل بەكەسوۆ.

 قوعامدىق باقىلاۋ

ارينە, قاراپايىم حالىق, جولعا شىق­قان جولاۋشى دىتتەگەن جەرىنە بەينەتسىز جەتۋدى قالايدى. جول كۇتىمىن موينىنا العان مەردىگەردىڭ جۇمىسى ساپالى بولۋى ءۇشىن قىراعى قاداعالاۋ, قوعامدىق باقىلاۋ كەرەك-اق. وكىنىشتىسى, ءوز مىندەتىنە سامارقاۋ قارايتىن مەكەمەلەر دە جوق ەمەس. مىسالى, جەلتوقسان ايىندا اقجايىق اۋدانى جامبىل اۋىل­دىق وكرۋگىنىڭ رەسمي پاراقشاسىنا: «جو­لاۋشى جول» مەكەمەسى, جولدى تازالاپ كەتىڭىزشى, ءوتىنىش!» دەگەن حابارلاما جازىلعان. مەكەمە باسشىسىنا تىكەلەي ايتىلعان وتىنىشتەر ورىندالماعان سوڭ, وسىلاي جاريا سۇراۋدان باسقا امال قالماعان.

Nur Otan پارتياسى وبلىستىق فيليالى پارتيالىق باقىلاۋ جونىندەگى ينسپەكتورى افيزا سەمعاليەۆا وسىنداي شاعىمدارعا دەر كەزىندە كوڭىل اۋدارۋ ءۇشىن ءار مەردىگەر مەكەمەگە الەۋ­مەتتىك جەلىدە ءوز پاراعىن اشۋدى ۇسىن­دى. «جول ساپاسىنا شاعىم نەمەسە ۇسى­نىس-پىكىر ايتقىسى كەلگەن كولىك جۇر­گىزۋشىسى نەمەسە جولاۋشى ءوز ويىن, فوتو-بەينە ماتەريالدى سول پاراقشاعا دەر كەزىندە جاريالاسا, ونىڭ ىقپالى, ناتيجەسى كۇشتى بولار ەدى» دەيدى افيزا بولاتقىزى.

بۇل ۇسىنىس وبلىستىق جولاۋشىلار كولىگى جانە اۆتوموبيل جولدارى باسقارماسى تاراپىنان قابىل الىنىپ, ءسال وزگەشە تۇردە جۇزەگە استى. ياعني باسقارما تاراپىنان وبلىستىق جانە اۋداندىق ماڭىزى بار اۆتوموبيل جولدارىن قىسقى ۋاقىتتا كۇتىپ ۇستاۋعا قاتىستى ارىز شاعىمدار­دى, ۇسى­نىستاردى WhatsApp ءنومىرى ارقى­لى +7 771 179 63 92 قابىلدايدى. بۇل نومىرگە وبلىستاعى جول قۇرىلىسى جانە قوعامدىق كولىك ماسەلەلەرىنە دە قا­تىستى سۇراقتاردى جولداۋعا بولادى.

بيىلعى 19 قاڭتار كۇنى ىسكە قوسىلعان وسى جەلىگە 10 كۇن ىشىندە 81 شاعىم جانە سۇراق ءتۇسىپتى. «مۇنىڭ ىشىندە اۋداندىق ماڭىزى بار جولدارعا قاتىستى – 4, قالا­ىشىلىك جولدار مەن قوعامدىق كولىككە قا­تىستى – 65, وبلىستىق ماڭىزى بار جولدار مەن قوعامدىق كولىككە قاتىستى – 5, رەسپۋبليكالىق ماڭىزى بار جولدارعا قاتىستى – 4 جانە باسقا ماسەلەلەر بو­يىنشا 3 سۇراق پەن شاعىم كەلىپ ءتۇستى. بارلىق ماسەلە بويىنشا جاۋاپتى مەكەمەلەر جۇمىس ىستەپ جاتىر. بۇل جۇمىس ءارى قاراي جالعاسادى» دەپ مالىمدەدى ا.مەنەەۆ.

 «قازاۆتوجولعا» سالەم ايت!

سوڭعى كەزدە قوعامدىق تالاپ كۇشە­يىپ, وڭىردەگى وبلىستىق جانە اۋداندىق دەڭگەيدەگى جولدارعا باقىلاۋ كۇشەيدى. ونىڭ ناتيجەسى دە جامان ەمەس. بىراق «قازاۆتوجولعا» تىكەلەي باعىناتىن رەس­پۋبليكالىق جولدار ماسەلەسى ءالى ۋشى­عىپ تۇر. ادام قازاسىنا سوقتىراتىن اۋىر جول اپاتتارى دا ءدال وسى رەسپۋب­ليكالىق جول بويىندا ءجيى قايتالانادى.

– «قازاۆتوجول» كومپانياسىنىڭ وبلىس بويىنشا باس ينجەنەرى اڭسار راحماتۋلليننىڭ ايتۋىنشا, 2021 جىل­عى 6 جەلتوقسانعا دەيىن جول كۇتىمىنە ­1,5 ملرد تەڭگە قارجى بولىنگەن. وسى قار­جى قايدا جۇمسالادى؟ نەگە «قازاۆتوجول» قاجەتتى تەحنيكالارىن جاڭارتپايدى؟ ۇكىمەت باسشىسىنان قارجىلىق باقىلاۋ كوميتەتىنە تاپسىرما بەرىپ, رەسپۋبليكا بيۋدجەتىنەن بولىنگەن قارجىعا تەكسەرۋ جۇرگىزۋدى سۇرايمىن. ايتپەسە, جاۋاپسىز جول مەردىگەرلەردىڭ كەسىرىنەن بەيبىت كۇندە جول بويىندا قازا تاپقان حالىق سانى ازايماي وتىر, – دەيدى ەدىل بەكەسوۆ.

ايتپاقشى, «قازاۆتوجول» ۇك اق باس­شىسى اسقار مۇرات ۇلىنىڭ اتىنا Nur Otan پارتياسى وبلىستىق فيليالى توراعاسىنىڭ ورىنباسارى مۇرات مۇقاەۆ وڭىردەگى ماسەلەلەردى ايتىپ, بىرنەشە مارتە حات جولداعان. ونىڭ ءبىر دە بىرىنە جاۋاپ بولماعان.

«كورشىلەس مەملەكەتتەردە جول تازالاۋشى مەكەمەلەر قار جاۋا باساعاندا-اق تازالاۋ جۇمىسىنا كىرىسەدى. ءسويتىپ, جول بەتىندە قار, مۇز قاتۋىنا, كوكتايعاق پەن كەدىر-بۇدىر بولۋىنا مۇمكىندىك بەرمەيدى. سول ارقىلى جول-كولىك وقيعا­لارىنىڭ الدىن الادى. الايدا بىزدە بۇل ءادىس قولدانىلمايدى. جول كۇتۋشى مەردىگەرلەر اۋا رايىن بولجايتىن مەكەمەلەردىڭ مالىمەتىن پايدالانبايدى. «قازاۆتوجول» مەكەمەسى ارنايى تەحنيكامەن نەبارى 58%-عا قامتىلعان, ونىڭ 41%-ى عانا جۇمىسقا جارامدى. جەدەل جۇرەتىن امبەباپ ماشينالار سانى قاجەتتى مولشەردىڭ 57%-ى عانا. جول تازالايتىن مەكەمەلەر «كوكتاي­عاق» دەگەن بەلگى ورناتۋمەن شەكتەلەدى. تۇزدى قۇمدى تەك ىلدي مەن ورگە عانا كەشىگىپ سەبەدى. جولدىڭ قالعان بولىگى قارالمايدى. وسىنداي سالعىرتتىقتىڭ سەبەبىنەن اۋىر جۇك كولىكتەرى «ورال – اتىراۋ» كۇرە جولىنىڭ جەلتاۋ بيىگى تۇسىندا, «ورال – سامارا» جولىندا ءجيى كەپتەلىپ قالادى. بۇعان قوسا, رەسپۋبليكالىق جولدار بويىندا جول قوزعالىسىنا قاۋىپ توندىرەتىن اقاۋلار – شۇڭقىرلار مەن شوقالاقتار پايدا بولعان. وسىنداي جاعدايلارعا بايلانىستى وڭىردە الەۋمەتتىك نارازىلىق كۇشەيىپ كەلەدى. سوندىقتان جول سالاسى ماماندارىنىڭ كاسىبي بىلىكتىلىگىن ارتتىرىپ, رەسپۋبليكالىق دارەجەدەگى جولداردى كۇتىپ ۇستاۋعا قاجەتتى قاراجاتتى تولىق ءبولۋدى سۇرايمىز. جولدى كۇتىپ-باپتاۋعا بولىنەتىن قاراجات مولشەرى رەسەي فەدەراتسياسىنان 5 ەسە از. جول كۇتەتىن تەحنيكا پاركى ابدەن ەسكىرگەن. وسى ماسەلەلەردى شەشۋ ءۇشىن ءتيىستى شارا­لاردى قولدانىپ, قالىپتاسقان احۋالدى تۇزەۋدى سۇرايمىز. بۇل ماسەلە حالىقتىڭ قاۋىپسىزدىگىنە تىكەلەي اسەر ەتەتىندىكتەن, وتە وزەكتى. قابىلدانعان شارالار جونىندە جازباشا جاۋاپ بەرۋىڭىزدى سۇرايمىز», دەلىنگەن سوڭعى حاتتا. ازىرگە جاۋاپ جوق.

                                                                                                        باتىس قازاقستان وبلىسى