اقش: دايش باسشىسى ءولتىرىلدى

اقش باسشىسى: «اقپاننىڭ 3-ىنە قاراعان ءتۇنى مەنىڭ بۇيرىعى­ممەن سيريانىڭ سولتۇستىك-باتىسىن­داعى اقش قارۋلى كۇشتەرى امەريكا­لىق­تار مەن وداقتاستاردى قورعاۋ جانە الەم­دە قاۋىپ­سىزدىكتى قامتاماسىز ەتۋ ءۇشىن تەر­رو­ريزمگە قارسى وپەراتسيانى ءسات­تى وت­كىزد­ى. ءبىزدىڭ قارۋلى كۇش­­تەرى­مىز­دىڭ شە­بەر­لىگى مەن باتىل­دىعى­نىڭ ناتي­جە­سىندە «يسلام مەم­لەكەتىنىڭ» جەتەك­شىسى ءابۋ يبرا­حيم ءال-حاشيمي ءال-قۇرايش ۇرىس الاڭىندا ءولتىرىلدى», دەپ مالىمدەدى.

سونىمەن قاتار اقش پرەزيدەنتى جاۋىنگەرلەر وپەراتسيادان امان-ەسەن ورالعانىن ايتتى. ءال-قۇرايش ناقتى قاي جەردە ولتىرىلگەنى تۋرالى دەرەك ءالى حابار­لانبادى. دايش-ءتىڭ اقپاراتتىق رە­سۋرس­تارى كوش­باسشىنىڭ قايتىس بول­عانى تۋرا­لى حاباردى ءالى راستامادى, جا­ڭا باسشى سايلايتىنى تۋرالى دا قان­داي دا ءبىر جاڭالىق جاريالانعان جوق.

دجو بايدەن بۇل حاباردى وتان­دىق تەلەارنالار ارقىلى حالىققا جەتكىزدى. Twitter-دەگى پاراقشاسىندا ول ۆيتسە-پرەزيدەنت كامالا حارريس­پەن بىرگە وپەراتسيا بارىسىن باقى­لاپ وتىرعانى بەينەلەنگەن سۋرەت جاريالادى.

ليۆاننىڭ Al Mayadeen تەلە­ار­­نا­سى­نىڭ حابارلاۋىنشا, يدليب پرو­­ۆ­ين­­تسياسىنداعى اتما قا­لا­سى­نىڭ اۋما­عىندا وپەراتسيا كەزىن­دە 13 بەيبىت تۇر­عىن قازا تاپ­قان. وپە­راتسيا باستالماس بۇرىن اقش ار­نايى كۇشتەرى داۋىس كۇشەيت­كىش ار­قىلى تەرروريستىك توپ جەتەك­شىسى­نە ءوز ەركىمەن بەرىلۋدى ۇسىن­­عان. كوشباسشى كەلىسىمنەن باس تارت­­ق­اننان كەيىن ۇرىس باستالعان. ەكى تىك­ۇشاق تاراپىنان بەرىلگەن سوق­قى­­دان ەكى تۇرعىن ءۇي قيرادى. بۇل ازا­­ما­ت­­تاردىڭ ولىمىنە الىپ كەلدى. Reuters اگەنتتىگى «سيريا ازاماتتىق قور­عانىسى» دەپ اتالاتىن توپتىڭ اقپا­را­تىنا سىلتەمە جاساي وتىرىپ, وقيعادا 6 بالانىڭ قايتىس بولعانىن حابارلادى. شابۋىل شامامەن ءۇش ساعاتقا سوزىلعان.

بۇعان دەيىن قاڭتار ايىنىڭ سوڭىندا امەريكالىق ارنايى كۇشتەر سيريا كۇردتەرى قۇرامالارىنا اش–شاددادي اۋدانىنداعى حاساكە پرو­ۆين­تسيا­سىن­داعى تۇرمەدەن قاشىپ كەتكەن 70-كە جۋىق دايش سو­دى­رىنىڭ قارۋلى كوتەرى­لى­سىن باسۋ­عا كومەكتەسكەن-ءدى. كوتەرى­لىس كۇرد­تەردىڭ دەموكراتيا­لىق كۇشتەر ودا­عى جاۋىنگەرلەرى مەن اقش اس­كەري كۇشتەرىنىڭ بىرىگۋىمەن توقتاتىلدى.

ءابۋ يبراحيم ءال–حاشيمي ءال-قۇرايش 2019 جىلعى 26 قازاندا توپتىڭ ءبىرىنشى جەتەكشىسى ءابۋ باكىر ءال-باعدادي امەريكالىقتاردىڭ ار­نايى وپەراتسياسى كەزىندە قازا بول­عان­نان كەيىن سول جىلى 31 قا­زان­­­دا «حاليف» بولىپ تاعايىن­دال­دى. باستاپقىدا دايش تاراپى ءال-باع­داديدىڭ ءولىمى تۋرالى اق­پاراتتى جوققا شىعاردى. جاڭا باس­شى ەسىمىندەگى ء«ال-قۇرايش» ونىڭ مۇحاممەد پايعامبار (س.ع.س.) شىققان اراب تايپاسىنان ەكەنىن بىلدىرەدى. جالپى, ول تۋرالى ناقتى اق­پارات جوق, دايش-ءتىڭ بەينەحابارلاندىرۋلارىندا ءجۇزىن كورسەتىپ تۇسپەيدى. ونىڭ ەسىمى – ءال-حاشيمي دە بۇركەنشىك ات دەگەن سىبىس بار. 2019 جىلدىڭ قاراشا ايىندا سول كەزدەگى اقش پرەزيدەنتى دونالد ترامپ ۆاشينگتون ءال-قۇرايشيدىڭ شىن ەسىمىن انىقتاعانىن حابارلادى, دەگەنمەن جەتەكشىنىڭ اتى سول كۇيى اتالمادى. ءال-قۇرايشي دايش پارتيزاندىق سوعىسقا كوشكەن كەزدە توپ جەتەكشىسى بولىپ سايلاندى.

Counter Extremism Project مالى­مەت­تەرى بويىنشا, ءال-حاشيمي 1976 جىلى يراكتا دۇنيەگە كەلگەن. ءدىني ءبىلىم العان. 2003 جىلى ء«ال-كايدا» تەرروريستىك ۇيىمىنا قوسىلعان.

2004 جىلى ءال-حاشيمي تۇتقىن­دا­لىپ, يراكتا اقش اكىمشىلىگى باس­قا­راتىن كەمپ-بۋكك لاگەرىنە قا­مال­عان. وندا ءال-باعداديمەن تانى­سىپ, ونىڭ كوزقاراستارىن بويىن­ا سىڭىر­گەن دەگەن اقپارات بار. تەررو­ريس­تىك توپتاعى سودىرلاردىڭ كوبى سول لا­گەردەن قوسىلعاندىقتان كەمپ-بۋكك «دايش-ءتىڭ وتانى» دەپ اتالىپ ءجۇر.

ءال-ءحاشيميدىڭ تۇرمەدەن قالاي شىققانى بەلگىسىز. اقش ونى تابۋعا كومەكتەسەتىن اقپارات ءۇشىن 5 ميلليون اقش دوللارىن ۇسىندى, سودان كەيىن ونى 10 ميلليون دوللارعا دەيىن ارتتىردى. 2020 جىلى مامىردا دايش كوشباسشىسىنىڭ قولعا تۇسكەنى تۋرالى اقپارات تارادى, الايدا باعدات بۇل جاڭالىقتى جوققا شىعاردى.