«ارتەميدا-2» ميسسياسى ەكيپاجى ايدىڭ ارعى بەتىمەن ۇشىپ ءوتىپ, جەردەن ەڭ الىس قاشىقتىققا جەتۋ بويىنشا جاڭا رەكورد ورناتتى. عارىشكەرلەر ايدىڭ بەتكى قاباتىن جاقىننان باقىلادى, دەپ جازادى Egemen.kz.
NASA مالىمەتىنشە, ميسسيا ەكيپاجى بۇرىن-سوڭدى پيلوتتالعان ۇشۋلاردا تىركەلگەن ەڭ ۇلكەن قاشىقتىققا جەتتى. «اپوللون-13» ميسسياسى ەكيپاجى 1970 جىلى 248 655 ميل (400 171 كم) قاشىقتىققا دەيىن جەتسە, «ارتەميدا-2» ميسسياسى 252 756 ميلگە (406 771 كم) دەيىن الىستاپ, بۇل كورسەتكىشتى شامامەن 6,5 مىڭ كم-گە ارتتىردى.
ميسسيا بارىسىندا ەكيپاج ايدىڭ كورىنبەيتىن جاعىنىڭ ۇستىمەن ۇشىپ ءوتتى. عارىش كەمەسى «وريون» اي بەتىنە شامامەن 6550 كم قاشىقتىقتا جاقىنداپ, استروناۆتارعا ايماقتى ەگجەي-تەگجەيلى باقىلاۋعا مۇمكىندىك بەردى.
11 كۇن قالدى: NASA ايعا ارنايى ەكيپاجدى ۇشىرۋعا رۇقسات بەردى
عارىشكەرلەرگە تەك باقىلاۋ عانا ەمەس, سونىمەن بىرگە سۋرەت سالۋ جانە كورگەندەرىن دىبىستىق فورماتتا سيپاتتاۋ تاپسىرىلعان. بۇل عىلىمي زەرتتەۋلەر ءۇشىن قوسىمشا دەرەكتەر جيناۋعا مۇمكىندىك بەرەدى.
ۇشۋ كەزىندە ماڭىزدى ساتتەردىڭ ءبىرى – بايلانىس ءۇزىلىسى بولدى. جەردەگى باسقارۋ ورتالىعى حيۋستوندا عارىش كەمەسى ايدىڭ ارعى بەتىنە وتكەن كەزدە 40 مينۋت بويى بايلانىس جوعالعان.
كەيىننەن بايلانىس قايتا قالپىنا كەلىپ, الدىمەن راديوسيگنال, ودان سوڭ دەرەكتەر جانە استروناۆت كريستينا كوحتىڭ داۋىسى ەستىلدى.
«حيۋستون, «ينتەگريتي», بايلانىس تەكسەرىلىپ جاتىر. جەردى قايتا ەستۋ قانداي كەرەمەت», دەدى ول.
جوعالعان ەكيپاجدى تابۋ ءۇشىن بار كۇشىمىزدى سالامىز - قورعانىس ءمينيسترى
قازىرگى تاڭدا ەكيپاج جەرگە قايتۋ جولىندا ءجۇر. عارىشكەرلەر ساپار بارىسىندا كۇننىڭ تۇتىلۋىن باقىلاپ, فوتو جانە ۆيدەوعا تۇسىرگەن.
جوسپارعا سايكەس, ميسسيا شامامەن 4 كۇننەن كەيىن اياقتالادى. 11 ساۋىردە, گرينۆيچ ۋاقىتى بويىنشا 01:07-دە عارىشكەرلەر تىنىق مۇحيتىنىڭ اقش-تىڭ باتىس جاعالاۋىنا قونادى دەپ كۇتىلەدى.
«ارتەميدا-2» ميسسياسى ناتيجەلەرى ادامزاتتىڭ ايدى يگەرۋ تاريحىنداعى ماڭىزدى قادامداردىڭ ءبىرى رەتىندە باعالانىپ وتىر. جاڭا دەرەكتەر بولاشاقتاعى ايعا ۇشۋ جانە تەرەڭ عارىش ميسسيالارى ءۇشىن نەگىز بولماق.
بۇگىن NASA 54 جىلدان كەيىن ايعا العاشقى ەكيپاجىن ۇشىرادى