پرەزيدەنتتىڭ اباي وبلىسىنداعى گەنەراتسيالاۋشى قۋاتتاردى ۇلعايتۋ جونىندەگى تاپسىرمالارىن ورىنداۋ شەڭبەرىندە كومىر گەنەراتسياسىنىڭ ستراتەگيالىق نىساندارىن سالۋ جوسپارلانعان. ۇكىمەت وتىرىسىندا جاڭا ەنەرگيا وبەكتىلەرىنىڭ قۇرىلىسى جانە كومىر حيمياسىنىڭ دامۋى تۋرالى اباي وبلىسىنىڭ اكىمى بەرىك ءۋالي باياندادى, دەپ حابارلايدى Egemen.kz.
سەمەيدە ەنەرگيا تاپشىلىعىن جويۋ ءۇشىن قۋاتى 360 مۆت جانە جىلۋ قۋاتى 1000 گكال بولاتىن جەو-3 سالۋ جوسپارلانعان. سونداي-اق كۋرچاتوۆ قالاسىندا 700 مۆت-تىق كوندەنساتسيالىق ەلەكتر ستانساسىن جانە قۋاتتىلىعى جىلىنا 800 مىڭ توننادان اساتىن اممياك پەن كارباميد وندىرەتىن كەشەن سالۋ كوزدەلگەن. جوبالاردىڭ جالپى قۇنى 1,5 ترلن تەڭگەدەن اسادى.
«اتالعان جوبالاردى جۇزەگە اسىرۋ وبلىستىڭ ەنەرگەتيكالىق قاۋىپسىزدىگىن قامتاماسىز ەتۋگە, قۋات تاپشىلىعىن ازايتۋعا جانە ءوڭىردىڭ الەۋمەتتىك-ەكونوميكالىق دامۋىن ىنتالاندىرۋعا تاماشا مۇمكىندىك بەرەدى. سەمەي قالاسىندا جوبانىڭ باستالۋى بيىلعا, اياقتالۋى 2029 جىلدىڭ سوڭىنا جوسپارلانعان. مەملەكەت باسشىسىنىڭ تاپسىرماسىنا سايكەس بۇل جۇمىستار ەنەرگياعا دەگەن قاجەتتىلىكتى تولىعىمەن جابۋعا مۇمكىندىك بەرەدى», دەپ اتاپ ءوتتى بەرىك ءۋالي. بىزدە قاتەلەسۋگە جول جوق: ەنەرگەتيكا ءمينيسترى الماتىداعى جەو-3 جاڭعىرتۋ قارقىنىن سىنعا الدى