قازاقستاندا حالىقتى پانالاۋ ورىندارىمەن قامتاماسىز ەتۋ قاعيدالارى بەكىتىلدى. ساۋدا جانە ينتەگراتسيا مينيسترلىگىنىڭ مالىمەتىنشە, جاڭا ستاندارت جەرتولەلەردى, جەراستى پاركينگتەرىن جانە باسقا دا جەراستى كەڭىستىكتەرىن قامتيدى, دەپ جازادى Egemen.kz.
2026 جىلدىڭ 1 قاڭتارىنان باستاپ قازاقستاندا توتەنشە جاعدايلار كەزىندە پايدالانىلاتىن پانالاۋ ورىندارىنا ارنالعان جاڭا ستاندارت كۇشىنە ەندى. اتالعان ستاندارتتى توتەنشە جاعدايلار مينيسترلىگىنىڭ ءوتىنىمى نەگىزىندە «قازستاندارت» ازىرلەگەن.
ساۋدا جانە ينتەگراتسيا مينيسترلىگىنىڭ تەحنيكالىق رەتتەۋ جانە مەترولوگيا كوميتەتى قۇجاتتىڭ توتەنشە جاعدايلارعا دايىندىق دەڭگەيىن ارتتىرۋعا جانە حالىق قاۋىپسىزدىگىن قامتاماسىز ەتۋگە باعىتتالعانىن اتاپ ءوتتى. الەمدىك تاجىريبەدە حالىقتى قورعاۋ ءۇشىن جەرتولەلەر, تسوكولدىك قاباتتار, جەراستى وتكەلدەرى مەن مەتروپوليتەن سياقتى جەراستى كەڭىستىكتەرى كەڭىنەن قولدانىلادى. قازاقستاندا دا مۇنداي نىساندار ازاماتتىق قورعانىسقا ارنالعان قورعانىس قۇرىلىستارى رەتىندە بەيىمدەلۋى مۇمكىن.
جاڭا ستاندارت قولدانىستاعى نورماتيۆتىك ولقىلىقتاردى جويىپ, پانالاۋ ورىندارىنا قويىلاتىن بىرىڭعاي تالاپتاردى ەنگىزەدى. قۇجات تابيعي, تەحنوگەندىك جانە اسكەري سيپاتتاعى توتەنشە جاعدايلار كەزىندە حالىقتى قورعاۋ ماقساتىندا عيماراتتاردى تەكسەرۋ جانە ولاردى بەيىمدەۋ ءتارتىبىن ايقىندايدى.
ازاماتتىق قورعانىستى جەتىلدىرۋگە باعىتتالعان زاڭ جوباسى ماقۇلداندى
«ستاندارتتا ءۇي-جايلاردىڭ قۇرىلىمى مەن جوسپارلانۋىنا, سونداي-اق تىرشىلىكتى قامتاماسىز ەتۋ جۇيەلەرىنە قويىلاتىن تالاپتار بەلگىلەنگەن. ولاردىڭ قاتارىنا جەلدەتۋ, سۋمەن جابدىقتاۋ, ەلەكترمەن قامتۋ, سانيتاريالىق جاعدايلار جانە بايلانىس جۇيەلەرى كىرەدى. سونىمەن قاتار عيماراتتاردىڭ تەحنيكالىق جاي-كۇيىن باعالاۋ ءتارتىبى, ونىڭ ىشىندە كوتەرگىش كونسترۋكتسيالار مەن ينجەنەرلىك جۇيەلەردى تەكسەرۋ تالاپتارى قامتىلعان. قاجەت بولعان جاعدايدا كونسترۋكتسيالاردى كۇشەيتۋ جانە ءۇي-جايلاردى قايتا بەيىمدەۋ شارالارى كوزدەلگەن. ستاندارتتا تيپتىك ينجەنەرلىك شەشىمدەردىڭ ۇلگىلەرى مەن پانالاۋ ورىندارىنىڭ جارامدىلىعىن باعالاۋ كەستەسى بەرىلگەن», دەلىنگەن مينيسترلىك حابارلاماسىندا.
جوبا توتەنشە جاعدايلار مينيسترلىگى, قورعانىس مينيسترلىگى, ەكولوگيا جانە تابيعي رەسۋرستار مينيسترلىگى, سونداي-اق باسقا دا مۇددەلى مەملەكەتتىك ورگاندار جانە ۇيىمدارمەن كەلىسىلگەن.
كەلىسۋ بارىسىندا ۇسىنىلعان ەسكەرتۋلەر تەحنيكالىق شەشىمدەردى ازىرلەۋ كەزىندە گەوگرافيالىق, كليماتتىق جانە سەيسميكالىق ەرەكشەلىكتەردى ەسكەرۋ, ۇشقىشسىز ۇشۋ اپپاراتتارىنان قورعانۋ تەتىكتەرىن ەنگىزۋ, قايتا بەيىمدەۋ سىزبالارىنىڭ ۇلگىلەرىن قوسۋ, پانالاۋ ورىندارىنىڭ كونسترۋكتسيالارىن كۇشەيتۋ جانە حالىقتىڭ قولجەتىمدىلىگىن قامتاماسىز ەتەتىن اۆتوماتتاندىرىلعان جۇيەلەردى ەنگىزۋ ماسەلەلەرىن قامتىدى. بارلىق ۇسىنىستار ەسكەرىلدى.
اتالعان ستاندارتتى قابىلداۋ جەراستى كەڭىستىكتەرىن ءتيىمدى پايدالانۋدىڭ بىرىڭعاي ءتاسىلىن قالىپتاستىرۋعا جانە توتەنشە جاعدايلار كەزىندە حالىقتى قورعاۋ دەڭگەيىن ارتتىرۋعا مۇمكىندىك بەرەدى.