ەلوردا اكىمى التاي كولگىنوۆ ءوزىنىڭ Instagram پاراقشاسىندا 250 اۋلا مەن قوعامدىق كەڭىستىك اباتتاندىرىلاتىنىن حابارلادى, دەپ جازادى Egemen.kz نۇر-سۇلتان اكىمدىگىنە سىلتەمە جاساپ.
بۇگىن ەلوردا اكىمى اپتا سايىن ءداستۇرلى تۇردە وتكىزەتىن قابىلداۋدا كەزەكتە تۇرعان 11 وتباسىنىڭ وتىنىشتەرىن تىڭدادى. جالپى, تۇرعىندار تاراپىنان ءجيى قويىلاتىن سۇراقتاردىڭ ءبىرى - قالا اۋداندارىن اباتتاندىرۋ ماسەلەسى.
«بيىل اۋلالارىمىزدى اۋقىمدى تۇردە وزگەرتىپ, تۇرعىنداردىڭ بوس ۋاقىتىن تازا اۋادا وتكىزۋى ءۇشىن جاڭا ورىندار اشامىز. جالپى, «نۇر-سۇلتان – جايلى قالا» ماستەر-جوسپارى اياسىندا بيىل 250-گە جۋىق اۋلا مەن قوعامدىق كەڭىستىكتى اباتتاندىرۋدى جوسپارلاپ وتىرمىز. قالالىق ءماسليحاتتا قارجىلاندىرۋ جوسپارى بەكىتىلدى. قالا تۇرعىندارىنىڭ ءوتىنىشى بويىنشا بيىل جانە الداعى جىلدارى اباتتاندىرىلاتىن مەكەنجايلار ءتىزىمى ەنگىزىلەدى» دەپ جازدى قالا باسشىسى.
ايتا كەتسەك, «حالىقتىڭ بيۋدجەتكە قاتىسۋى» جوباسى قالانىڭ بارلىق اۋدانىنا ەنگىزىلدى. بۇل جوبا قالا تۇرعىندارىنا ءوز اۋلاسىنىڭ سىرت-كەلبەتىن وزگەرتۋگە مۇمكىندىك بەرەدى. اۋداندىق اكىمدىكتەرمەن جانە ۋربانيستيكا ورتالىعىمەن بىرلەسىپ, بيىل قالا تۇرعىندارىمەن 200-دەن استام كەزدەسۋ وتكىزىلدى, وندا تۇرعىندار الداعى ۋاقىتتا سالىناتىن اۋلالار مەن قوعامدىق كەڭىستىكتەر تۇجىرىمداماسىن تالقىلادى.
ماسەلەن, الداعى ۋاقىتتا «اگروقالاشىق», «كوكتال», «تەمىرجولشىلار», «ينتەرناتسيونالنىي», ء«وندىرىس», «كيرپيچنىي», «وڭتۇستىك-شىعىس», «ۇركەر» ەلدى مەكەندەرىندە كورىكتى ورىندار اشىلادى. سونداي-اق, ادام كوپ جۇرەتىن ۋچاسكەلەر دە اباتتاندىرىلىپ, سەرۋەندەۋگە ارنالعان پرومەنادتار اشىلادى دەپ جوسپارلاندى.
«ۇيلەر مەن كەڭسەلەردىڭ تەرەزەسىنەن اۋلالاردىڭ سۇرەڭسىز كەلبەتى ەمەس, كورىكتى, جايلى, تارتىمدى ورىندار كورىنىس تابۋى كەرەك. اۋلالار مەن قوعامدىق كەڭىستىكتەردى ءبىز كوپفۋنكتسيونالدى, سول سياقتى ءتۇرلى سپورتتىق قىزىعۋشىلىقتار مەن جاس ەرەكشەلىكتەرىنە قاراي دايىندايمىز», دەپ قوستى اكىم.
سوڭعى جىلدارى قالادا 500-دەن استام اۋلا اۋماعى مەن قوعامدىق كەڭىستىك اباتتاندىرىلدى, اتاپ ايتقاندا كوپىر استى كەڭىستىكتەر, سكەيت-ايماقتار, پرومەناد, تەاتر بۋلۆارى, ەلدى مەكەندەردەگى ساياباقتار مەن گۇلزارلار, كوشە سپورتىنا ارنالعان كوليزەي, قۇتقارۋشىلاردىڭ, مەديتسينا قىزمەتكەرلەرىنىڭ, مۇعالىمدەردىڭ قۇرمەتىنە ارنايى سكۆەرلەر اشىلدى.