كەشە پرەمەر-مينيستر سەرىك احمەتوۆتىڭ توراعالىعىمەن سەلەكتورلىق رەجىمدە وتكەن ۇكىمەت وتىرىسىندا «نۇر وتان» پارتياسىنىڭ سايلاۋالدى تۇعىرناماسىن ىسكە اسىرۋ بارىسى قارالدى. تۇعىرنامانىڭ 2013 جىلعى قورىتىندىلارى تالقىلاندى.
س.احمەتوۆ جيىندا «بىزگە كوكەيكەستى تاپسىرمالار بەرىپ وتىراتىن مەملەكەت باسشىسى, اسىرەسە, «نۇر وتان» پارتياسىنىڭ سوڭعى سەزىندە الدىمىزعا ۇلكەن مىندەتتەر قويدى. ءبىز بۇل جاۋاپكەرشىلىكتى سەزىنۋىمىز جانە وسى تاپسىرمالاردى ورىنداۋعا بايىپپەن قاراۋىمىز كەرەك», دەدى.
وتىرىستىڭ كۇن تارتىبىندەگى ماسەلەگە وراي پارتيا توراعاسىنىڭ ءبىرىنشى ورىنباسارى باۋىرجان بايبەك بايانداما جاسادى. ول ءوز سوزىندە مەملەكەت باسشىسىنىڭ قازاقستان حالقىنا جولداۋىندا «قازاقستان-2050» ستراتەگياسىن جۇزەگە اسىرۋدىڭ باستى ماقساتى قازاقستاندىقتاردىڭ ءومىرىن جوسپارلى تۇردە جاقسارتۋ, ال ونىڭ نەگىزگى ولشەمى ازاماتتاردىڭ الەۋمەتتىك كوڭىل-كۇيى بولىپ تابىلاتىنىن مالىمدەدى.
«پارتيا بيۋروسىندا ۇكىمەتپەن بىرلەسىپ دايىندالعان تۇعىرنامانى جۇزەگە اسىرۋ كورسەتكىشتەرىنىڭ تىزبەسى بەكىتىلدى. كورسەتكىشتەردىڭ 75 پايىزى ناقتى جانە تۇرعىندار ءۇشىن ولشەمدى ينديكاتورلارعا باعدارلانعان. ولاردى ورىنداۋعا ناقتى مەملەكەتتىك ورگاندار بەكىتىلگەن», دەدى ب.بايبەك.
سونداي-اق, ول تاۋەلسىز الەۋمەتتىك ساۋالدامالار جۇرگىزۋ جانە پارتيانىڭ قوعامدىق قابىلداۋلارى بەرگەن ساراپتامالار ارقىلى تۇعىرنامانى جۇزەگە اسىرۋدىڭ كەشەندى مونيتورينگى تەتىگى ەنگىزىلگەنىنە توقتالدى. اتاپ ايتار بولساق, 2013 جىلى پارتيانىڭ قوعامدىق قابىلداۋلارىنا 800 مىڭ ادام ءوتىنىشپەن كەلىپتى. ەستەرىڭىزدە بولسا, وتكەن جىلدىڭ 1 جەلتوقسانىندا پارتيا ءتوراعاسى نۇرسۇلتان نازارباەۆ رەسپۋبليكالىق قوعامدىق قابىلداۋدىڭ جاڭا عيماراتىندا ازاماتتاردى جەكە قابىلداپ, پارتيامەن «ونلاين» رەجىمدە تىكەلەي بايلانىس جاساۋعا مۇمكىندىك تۋعىزاتىن «ەلەكتروندى پارتيا» جوباسىن ىسكە قوسقان بولاتىن.
«اتالعان جۇيەنىڭ ارقاسىندا ءبىز مەملەكەتتىك ورگانداردىڭ جۇمىسى جايلى وبەكتيۆتى اقپاراتتاردى «ءبىرىنشى قولدان» الىپ, ءتىپتى, ءاربىر اۋدانعا دەيىنگى بارلىق ءورىسى مەن سالاسىنا باقىلاۋ جۇرگىزە الامىز», دەدى ب.بايبەك.
پارتيا توراعاسىنىڭ ءبىرىنشى ورىنباسارىنىڭ بايانداماسىنان سوڭ وتىرىستا ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ تۇعىرنامانىڭ وتكەن جىلعى ەكونوميكالىق بلوگىنىڭ ورىندالۋى بارىسى تۋرالى حابارلادى. ول ءىجو ءوسىمى بىلتىر 6 پايىزدى قۇراعانىن, ونىڭ جوسپارلى دەڭگەيگە سايكەس بولعانىن, ءىجو-ءنىڭ تۇرعىنداردىڭ جان باسىنا شاققاندا 13 مىڭ اقش دوللارىن قۇراعانىن, 2013 جىلى حالىقتىڭ ناقتى تابىسىنىڭ ونىڭ الدىنداعى جىلمەن سالىستىرعاندا 3 پايىزعا, ەڭبەكاقىنىڭ 1,6 پايىزعا وسكەنىن, جۇمىسسىزدىق دەڭگەيىنىڭ 5,2 پايىزدى قۇراعانىن ايتتى.
وڭىرلىك دامۋ ءمينيسترى بولات جامىشەۆ حالىقتىڭ تۇرعىن ءۇي جاعدايىن جاقسارتۋ باعىتىندا جاسالىپ جاتقان جۇمىستارعا توقتالدى. ءمينيستردىڭ مالىمەتىنشە, قازاقستاندا جوبالىق قۋاتتىلىعى جىلىنا شامامەن 1,5 ملن. شارشى مەتر بولاتىن ءۇي قۇرىلىسى كومبيناتىنىڭ 17 جوباسىن جۇزەگە اسىرۋ قاراستىرىلعان, ونىڭ 9 جوباسىن اعىمداعى جىلى ەنگىزۋ جوسپارلانعان.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا دا تۇجىرىمدامادا كوزدەلگەن مىندەتتەر بويىنشا ءوز مينيسترلىگى تاراپىنان اتقارىلىپ جاتقان جۇمىستاردى باياندادى. ول ۇكىمەتتىڭ 2011 جىلدان بەرى «جۇمىسپەن قامتۋ جول كارتاسىن» جۇزەگە اسىرىپ جاتقانىن, وسى كەزەڭدە باعدارلاما 267 مىڭ ادامدى قامتىپ, 157 مىڭ ادامنىڭ جۇمىسقا ورنالاستىرىلعانىن اتاپ ءوتتى.
ءبىلىم جانە عىلىم ءمينيسترى اسلان ءسارىنجىپوۆ 2013 جىلى كوللەدج ءتۇلەكتەرىنىڭ جۇمىسقا ورنالاسۋى 70,5 پايىزدى قۇراعانىن حابارلادى. بعم باسشىسى «رەسپۋبليكا بويىنشا وقۋ ورىندارى مەن كومپانيالار, كاسىپورىندار اراسىندا تەحنيكالىق جانە كاسىپتىك وقۋ ورىندارىن بىتىرۋشىلەردىڭ تاجىريبەدەن ءوتۋى مەن ەڭبەككە ورنالاسۋىن ۇيىمداستىرۋ ماسەلەلەرى بويىنشا 25 مىڭنان استام كەلىسىمشارت جاسالعانىن» اتاپ كورسەتتى.
«الەۋمەتتىك ەلەۋلى ماسەلەلەردى شەشۋ – ۇكىمەتتىڭ, پارلامەنت ماجىلىسىندەگى پارتيالىق فراكتسيانىڭ جانە پارتيانىڭ بارلىق قۇرىلىمدارىنىڭ بىرلەسكەن جۇمىسىنىڭ نەگىزى. نۇروتاندىق دەپۋتاتتار ۇكىمەتپەن بىرلەسىپ, وزدەرىنىڭ زاڭ شىعارۋشىلىق قىزمەتىندە ۇنەمى سايلاۋالدى تۇعىرناما ەرەجەلەرىنە ارقا سۇيەيدى», دەپ مالىمدەدى ۇكىمەت وتىرىسىنا ارنايى قاتىسقان پارلامەنت ماجىلىسىندەگى «نۇر وتان» پارتياسى فراكتسياسى باسشىسىنىڭ ءبىرىنشى ورىنباسارى سەرگەي دياچەنكو.
بۇل ماسەلەلەر بويىنشا, سونداي-اق, بىرقاتار باسقا دا مينيسترلىكتەر مەن ۆەدومستۆولار باسشىلارى, شىعىس قازاقستان مەن باتىس قازاقستان وبلىستارىنىڭ اكىمدەرى سويلەدى.
دينارا بىتىكوۆا,
«ەگەمەن قازاقستان».