بۇگىن, 18 ناۋرىز كۇنى پرەمەر-مينيستر سەرىك احمەتوۆتىڭ جەتەكشىلىگىمەن وتكەن سەلەكتورلىق رەجيمدە «نۇر وتان» پارتياسىنىڭ سايلاۋ الدى تۇعىرناماسىنىڭ 2013 جىل قورىتىندىسى بويىنشا ورىندالۋ بارىسى قارالدى. بۇل تۋرالى قازاقستان رەسپۋبليكاسى پرەمەر-ءمينيسترىنىڭ ءباسپاسوز قىزمەتى حابارلادى.
پارتيا توراعاسىنىڭ ءبىرىنشى ورىنباسارى باۋىرجان بايبەك مەملەكەت باسشىسىنىڭ قازاقستان حالقىنا جولداۋىندا «قازاقستان-2050» ستراتەگياسىن جۇزەگە اسىرۋدىڭ باستى ماقساتى قازاقستاندىقتاردىڭ ءومىرىن جوسپارلى تۇردە جاقسارتۋ, ال ونىڭ نەگىزگى ولشەمى ازاماتتاردىڭ الەۋمەتتىك كوڭىل كۇيى بولىپ تابىلاتىنىن اتاپ كورسەتتى.
«پارتيا بيۋروسىندا ۇكىمەتپەن بىرلەسىپ دايىندالعان تۇعىرنامانى جۇزەگە اسىرۋ كورسەتكىشتەرىنىڭ تىزبەسى بەكىتىلدى. كورسەتكىشتەردىڭ 75 پايىزى ناقتى جانە تۇرعىندار ءۇشىن ولشەمدى ينديكاتورلارعا باعدارلانعان. ولاردى ورىنداۋعا ناقتى مەملەكەتتىك ورگاندار بەكىتىلگەن»,-دەدى ب.بايبەك. سونداي-اق تاۋەلسىز الەۋمەتتىك ساۋالدامالار جۇرگىزۋ جانە پارتيانىڭ قوعامدىق قابىلداۋلارى بەرگەن ساراپتامالار ارقىلى تۇعىرنامانى جۇزەگە اسىرۋدىڭ كەشەندى مونيتورينگى تەتىگى ەنگىزىلدى, دەپ ءسوزىن تولىقتىردى ول.
ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ وتكەن جىلى تۇعىرنامانىڭ ەكونوميكالىق بلوگىنىڭ ورىندالۋى بارىسى تۋرالى حابارلادى.ول ءجىو ءوسىمى بىلتىر 6 پايىزدى قۇراعانىن, ونىڭ جوسپارلى دەڭگەيگە سايكەس بولعانىن, ءجىو-ءنىڭ تۇرعىنداردىڭ جان باسىنا شاققاندا 13 مىڭ اقش دوللارىن قۇراعانىن, 2013 جىلى حالىقتىڭ ناقتى تابىسىنىڭ, ونىڭ الدىنداعى جىلمەن سالىستىرعاندا 3 پايىزعا, ەڭبەك اقىنىڭ 1,6 پايىزعا وسكەنىن, جۇمىسسىزدىق دەڭگەيىنىڭ 5,2 پايىزدى قۇراعانىن ايتتى.بۇل ماسەلەلەر بويىنشا سونداي-اق بىرقاتار مينيسترلىكتەر مەن ۆەدومستۆولار باسشىلارى, شىعىس قازاقستان مەن باتىس قازاقستان وبلىستارىنىڭ اكىمدەرى سويلەدى.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ۇكىمەتتىڭ 2011 جىلدان بەرى جۇمىسپەن قامتۋ جول كارتاسىن جۇزەگە اسىرىپ جاتقانىن, وسى كەزەڭدە باعدارلاما 267 مىڭ ادامدى قامتىپ, 157 مىڭ ادامنىڭ جۇمىسقا ورنالاستىرىلعانىن اتاپ ءوتتى. ونىڭ ايتۋىنشا, باعدارلامانىڭ نەگىزگى ولشەمدەرىنىڭ ءبىرى جاستاردى قولداۋ بولىپ تابىلادى. سونىمەن, جۇمىسپەن قامتۋ جول كارتاسىنا قاتىسۋشىلاردىڭ 148 مىڭنان استامى 29 جاسقا دەيىنگىلەر بولىپ وتىر.
ءبىلىم جانە عىلىم ءمينيسترى اسلان ءسارىنجىپوۆ 2013 جىلى كوللەدج تۇلەكتەرىنىڭ جۇمىسقا ورنالاسۋى 70,5 پايىزدى قۇراعانىن حابارلادى. بعم باسشىسى «رەسپۋبليكا بويىنشا وقۋ ورىندارى مەن كومپانيالار, كاسىپورىندار اراسىندا تەحنيكالىق جانە كاسىپتىك وقۋ ورىندارىن بىتىرۋشىلەردىڭ تاجىريبەدەن ءوتۋى مەن ەڭبەككە ورنالاسۋىن ۇيىمداستىرۋ ماسەلەلەرى بويىنشا 25 مىڭنان استام كەلىسىم-شارتتار جاسالعانىن» اتاپ كورسەتتى.
«الەۋمەتتىك ەلەۋلى ماسەلەلەردى شەشۋ- ۇكىمەتتىڭ,پارلامەنت ماجىلىسىندەگى پارتيالىق فراكتسيانىڭ جانە پارتيانىڭ بارلىق قۇرىلىمدارىنىڭ بىرلەسكەن جۇمىسىنىڭ نەگىزى بولىپ تابىلادى. نۇروتاندىق دەپۋتاتتار ۇكىمەتپەن بىرلەسىپ ءوزارا جەمىستى ءىس-قيمىل جۇرگىزە وتىرىپ, وزدەرىنىڭ زاڭ شىعارۋشىلىق قىزمەتىندە ۇنەمى سايلاۋ الدى تۇعىرناما ەرەجەلەرىنە ارقا سۇيەيدى»,-دەپ مالىمدەدى پارلامەنت ماجىلىسىندەگى «نۇر وتان» پارتياسى فراكتسياسى باسشىسىنىڭ ءبىرىنشى ورىنباسارى سەرگەي دياچەنكو.
«بىزگە كوكەيكەستى تاپسىرمالار بەرىپ وتىراتىن مەملەكەت باسشىسى اسىرەسە, «نۇر وتان» پارتياسىنىڭ سوڭعى سەزىندە الدىمىزعا ۇلكەن مىندەتتەر قويدى. ءبىز بۇل جاۋاپكەرشىلىكتى سەزىنۋىمىز جانە وسى تاپسىرمالاردى ورىنداۋعا بايىپپەن قاراۋىمىز كەرەك»,-دەدى جيىندى قورىتىندىلاي كەلە سەرىك احمەتوۆ.
«تۇعىرناما كورسەتكىشتەرىن اكتۋالداندىرۋ قاجەت. ونىڭ سىرتىندا, تۇعىرنامادا كورسەتىلگەن, الەۋمەتتىك مىندەتتەمەلەردى ورىنداۋ شەڭبەرىندە ەكونوميكاداعى جاعدايلاردىڭ وزگەرۋىن ەسەپكە الۋ كەرەك»,-دەپ اتاپ كورسەتتى سەرىك احمەتوۆ.
ۇكىمەت باسشىسى ورتالىق جانە جەرگىلىكتى اتقارۋشى ورگاندارعا ەبجم-مەن كەلىسىم بويىنشا تۇعىرنامانى اكتۋالداندىرۋ جونىندە «نۇر وتان» پارتياسى اپپاراتىنا ءبىر اي مەرزىم ىشىندە ۇسىنىس ەنگىزۋدى, سونداي-اق ونى مونيتورينگتەۋ مەن جۇزەگە اسىرۋ بويىنشا جۇمىستاردى جالعاستىرۋدى تاپسىردى.
دەرەككوز: www. Primeminister.kz.
فوتو: www. Primeminister.kz.