مەملەكەت باسشىسى قاسىم-جومارت توقاەۆ «ورتالىق ازيا-ءۇندىستان» سامميتىندە ورتالىق ازيا ەلدەرى مەن ءۇندىستاننىڭ تاۋار اينالىمى 3 ملرد دوللارعا جەتكەنىن, بىراق بۇل كورسەتكىشتەر قازاقستاننىڭ ەكونوميكالىق الەۋەتىنە ءالى دە سايكەس كەلمەيتىنىن ايتتى, دەپ حابارلادى Egemen.kz.
«سامميت ەلدەر اراسىنداعى ديپلوماتيالىق قاتىناستاردىڭ ورناعانىنا 30 جىل تولۋى قارساڭىندا ءوتىپ وتىر. ءبىزدىڭ اۋقىمدى ازيا ءوڭىرىمىز زور رەسۋرستارعا جانە زور زياتكەرلىك الەۋەتكە يە», دەدى قازاقستان پرەزيدەنتى قاسىم-جومارت توقاەۆ.
ونىڭ ايتۋىنشا, بۇل ايماقتا ماڭىزدى كولىك دالىزدەرى مەن جىلدام دامىپ كەلە جاتقان نارىقتار شوعىرلانعان. سول سەبەپتى ازيانىڭ الەمدىك ەكونوميكاداعى ءرولى ايتارلىقتاي ءوستى. ول ينۆەستيتسيالار مەن كاپيتالدى تارتۋدىڭ جاڭا جاھاندىق ورتالىعىنا اينالۋدا.
پرەزيدەنت بۇل ءوز كەزەگىندە ەلدەر اراسىنداعى ءوزارا ءتيىمدى ىنتىماقتاستىق ءۇشىن قولايلى مۇمكىندىكتەردى ىسكە اسىرۋ ءۇشىن ۇلكەن پەرسپەكتيۆالار اشاتىنىن ايتتى.
«ەڭ الدىمەن, بۇل ساۋداعا قاتىستى. ورتالىق ازيا ەلدەرى مەن ءۇندىستاننىڭ تاۋار اينالىمى 2020 جىلى 3 ملرد دوللارعا جەتتى. بۇل رەتتە قازاقستاننىڭ وسى ساۋداداعى ۇلەس سالماعى 80%-دى قۇرادى. الايدا, بۇل كورسەتكىشتەر ءبىزدىڭ جيىنتىق ەكونوميكالىق الەۋەتىمىزگە ءالى دە سايكەس كەلمەيدى», دەدى مەملەكەت باسشىسى.
پرەزيدەنت «ورتالىق ازيا - ءۇندىستان» ءسامميتى سياقتى ديالوگ الاڭدارىنىڭ جۇمىسى ەلدەردىڭ ۇدەمەلى دامۋى, سونداي-اق جاڭا سىن-قاتەرلەر مەن تاۋەكەلدەرگە ءتيىمدى جاۋاپتار ازىرلەۋ ءۇشىن پراكتيكالىق پايدا اكەلەتىنىن اتاپ ءوتتى.