سەنبى كۇنى پرەمەر-مينيستر سەرىك احمەتوۆ مەملەكەت باسشىسىنىڭ 2013 جىلعى 11 قازاندا جانە 2014 جىلعى 14 اقپاندا وتكەن ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ بويىنشا كەڭەس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
اتاپ ايتقاندا, پرەزيدەنتتىڭ مەملەكەتتىڭ قاتىسۋىمەن جۇمىس ىستەيتىن كاسىپورىنداردى جەكەمەنشىك سەكتورعا بەرۋ ءۇشىن ءتىزىمىن انىقتاۋ, گەولوگيالىق بارلاۋ جۇمىستارى باعدارلاماسىن دايىنداۋ, «سامۇرىق-قازىنا» اق قۇرامىنا ەنەتىن, كومپانيالاردىڭ وندىرىسپەن تىكەلەي اينالىساتىن جۇمىسشىلارىنىڭ ەڭبەكاقىسىن كوتەرۋ جانە باسقا دا تاپسىرمالارىن جۇزەگە اسىرۋ بويىنشا ماسەلەلەر قارالدى.
سونداي-اق, حالىقارالىق «قازاقستان جىبەك جولى» دەڭگەيىندە كولىك-لوگيستيكالىق جۇيە قۇرۋ, «كەندىرلى» كۋرورتىن ودان ءارى دامىتۋ بويىنشا ۇسىنىستار ەنگىزۋ جانە جاڭعىرمالى تابيعي رەسۋرستاردى پايدالانۋ سالاسىندا وتاندىق عىلىمدى دامىتۋعا قولداۋ كورسەتۋ بويىنشا تاپسىرمالاردىڭ ورىندالۋ بارىسى قارالدى.
«تۇتاستاي العاندا, پرەزيدەنت تاپسىرمالارىن ورىنداۋ جاقسى ءجۇرىپ جاتىر. ءبىرىنشى باسشىلار بۇل ماسەلەلەردى ايرىقشا نازاردا ۇستاۋى كەرەك. ءبىز مەملەكەتتىك ورگانداردىڭ ەسەپتەرىن تۇراقتى تۇردە تىڭدايتىن بولامىز», دەپ تۇيىندەدى كەڭەستى سەرىك احمەتوۆ.