قىسقى ترانسفەرلىك تەرەزەنىڭ جابىلاتىن ءساتى دە جاقىنداپ قالدى. سوڭعى كۇندەرى ەۋروپانىڭ الپاۋىت كلۋبتارى قۇرامىن مىقتى فۋتبولشىلارمەن تولىقتىرۋ جولىندا جانتالاسىپ جاتىر, دەپ حابارلايدى Egemen.kz.
بۇعان دەيىن دورتمۋندتىق «بورۋسسيانىڭ» شابۋىلشىسى ەرلينگ حولاندقا كوز تىككەن «مانچەستەر ءسيتيدىڭ» باسشىلارىنىڭ جوسپارى وزگەردى. نورۆەگيالىق فۋتبولشى ءمادريدتىڭ «رەالىنا» اۋىسقىسى كەلەتىنىن ەستىگەن ساتتە اعىلشىندىق كلۋبتىڭ جەتەكشىلەرى «رەالدىڭ» جاس شابۋىلشىسى ۆينيسيۋس جۋنيوردى قاتارلارىنا قوسقىسى كەلەتىنىن اڭعارتتى. The Athletic باسىلىمىنىڭ جازۋىنشا, «مانچەستەر ءسيتيدىڭ» باس باپكەرى حوسەپ گاۆرديولا قالايدا ۆينيسيۋستى كوماندا قاتارىنا قوسقىسى كەلەدى ەكەن.
«مانچەستەر يۋنايتەد» فۋتبول كلۋبىنىڭ جارتىلاي قورعاۋشىسى پول پوگبا وسى جازدا اعىلشىندىق كوماندادان كەتەدى. ول فرانتسيالىق «پسج» فۋتبول كلۋبىنا اۋىسىپ, ايگىلى ليونەل مەسسيمەن ءبىر كوماندادا ويناۋ ءۇشىن اعىلشىندىق كوماندانىڭ باسشىلارى ۇسىنعان جوعارى جالاقىدان (اپتاسىنا 600 مىڭ ەۋرو) باس تارتتى.