وسى كۇندەرى سوچيدە قىسقى پاراليمپيادا ويىندارى وتۋدە. وعان قازاقستاننان بەس سپورتشى قاتىسۋدا.
سوچيدە ءوتىپ جاتقان پاراليمپياداعا الەمنىڭ 45 ەلىنەن 1650 مۇگەدەك سپورتشى قاتىسۋدا. سپورتشىلار سلەج-حوككەي, كەرلينگ, شاڭعى جارىسى, بياتلون, تاۋ شاڭعىسىنان 72 مەدال جيىنتىعىن ساراپقا سالۋدا. ال ءبىزدىڭ ەلگە كەلسەك, بيىلعى ويىندارعا قازاقستاننان العاش رەت بەس سپورتشى قاتىسۋدا. قازاقستان پاراليمپيادا كوميتەتىنىڭ دەرەكتەرىنە قاراعاندا, ءبىزدىڭ سپورتشىلار سوچي سىنىنا جولدامانى كانادا, فينليانديا, گەرمانيادا وتكەن ىرىكتەۋ جارىستارىندا جەڭىپ العان. ەندى پاراليمپياداعا قاتىسىپ جاتقان سپورتشىلارىمىزعا كەلسەك, وعان ءبىزدىڭ ەلدەن ەكى ايەل, ءۇش ەر ادام قاتىسۋدا. ەڭ جاسى 23-تە بولسا, جاسى ۇلكەنى 51-دە. پاراليمپياداعا جولداما العانداردىڭ ەڭ جاسى — جاڭىل بالتاباەۆا. ول شاڭعىشىلار اراسىنداعى LW12 باعدارلاماسى بويىنشا جارىسقا قاتىسۋدا. جاڭىل بالا كەزىنەن مۇگەدەك. سپورتپەن 13 جاسىنان بەرى اينالىسۋدا. 2013 جىلعى قازاقستان چەمپيونى. كەلەسى سپورتشىمىز قايرات قاناپيننىڭ كوزى ناشار كورەدى. ونىڭ جاسى 38-دە. جۇمىس بارىسىندا كوزىنەن جاراقات العان ەكەن. ول بياتلون مەن شاڭعى جارىسىنا قاتىسۋدا. سودان كەيىن 41 جاستاعى الەكساندر كوليادين دەگەن سپورتشىمىز دا شاڭعىنىڭ LW4 (تىزەدەن تومەن نەمەسە جوعارى پروتەزى بار سپورتشىلار اراسىنداعى جارىس) باعدارلاماسى بويىنشا باق سىناسۋدا. ايەلدەر اراسىندا 46 جاستاعى ەلەنا مازۋرەنكو شاڭعىشىلاردىڭ LW6 (قولى پروتەزدەلگەن سپورتشىلار اراسىنداعى جارىس) باعدارلاماسى بويىنشا جارىس جولىنا شىعىپ جاتىر. ول سپورت شەبەرى ءارى قازاقستان چەمپيونى.
جالپى, ەلىمىز سپورتشىلارى وسى كەزگە دەيىن بەس قىسقى پاراليمپياداعا قاتىسقانىمەن, بىردە-ءبىر مەدال الماعان ەكەن. وسىعان بايلانىستى ءبىزدىڭ مەملەكەتىمىز سوچي پاراليمپياداسىندا التىن مەدال العان سپورتشىعا 50 000, كۇمىس العان وتانداسىمىزعا 35 000, قولا العان سپورتشىعا 25 000 اقش دوللارى كولەمىندە سىياقى تاعايىندادى.
ازىرگە ءبىزدىڭ سپورتشىلارىمىزدىڭ پاراليمپيادادا جولى بولار ەمەس. وتانداستارىمىزدىڭ ءبارى وزدەرى قاتىسىپ جاتقان جارىستاردا 10-نان كەيىنگى ورىنداردى الىپ جاتىر. ماسەلەن, جاڭىل بالتاباەۆا 1 شاقىرىمدىق قاشىقتىققا وتىرىپ جارىسۋدا ەڭ سوڭعى, 23-ورىندى الدى.
ەرلەر اراسىندا وسى قاشىقتىققا ەركىن ادىسپەن تۇرەگەپ جارىسۋدا الەكساندر كوليادين 33-ورىندى, ەرلان وماروۆ 35-ورىندى يەلەندى.
ايەلدەر اراسىندا وسىنداي بايگەدە ەلەنا مازۋرەنكو 16-ورىندى قاناعات تۇتتى. كوزىنەن زاقىمدانعاندار اراسىنداعى سپرينت بايگەلەرىنىڭ ىرىكتەۋ جارىسىندا قايرات قانافين 13-ورىندا تۇر. بۇل جارىس ءالى بىتكەن جوق. ەرتەڭ پاراليمپيادانىڭ سوڭعى كۇنى وسى جارىس تۇرىنەن سىندار وتەدى.
داستان كەنجالين,
«ەگەمەن قازاقستان».