19 قاڭتاردا, ياعني ساعات 00:00-دەن باستاپ, نۇر-سۇلتان جانە الماتى قالالارىندا, سونىمەن قاتار الماتى, اتىراۋ, جامبىل, قىزىلوردا, ماڭعىستاۋ وبلىستارىندا توتەنشە جاعدايدىڭ كۇشى جويىلادى. بۇل تۋرالى پرەزيدەنتتىڭ ءباسپاسوز حاتشىسى بەرىك ءۋالي ءوزىنىڭ Facebook پاراقشاسىندا جازدى, دەپ حابارلايدى Egemen.kz.
بۇعان دەيىن پرەزيدەنتتىڭ جارلىقتارىنا سايكەس, وزگە وڭىرلەردە توتەنشە جاعداي مەرزىمىنەن بۇرىن توقتاتىلعان بولاتىن.
وسىلايشا, بۇكىل ەل اۋماعى قالىپتى ومىرگە ورالادى. توتەنشە جاعداي كەزىندەگى قوعامدىق ءتارتىپتى قورعاۋدى كۇشەيتۋ جانە ەركىن ءجۇرىپ-تۇرۋعا, ەلدى مەكەندەرگە كىرۋگە جانە شىعۋعا, ت.ب. قوسىمشا ەنگىزىلگەن شەكتەۋ شارالارى دا جويىلادى.
«حالىقتىڭ بىرلىگى مەن تۇتاستىعىنىڭ, قۇقىق قورعاۋ ورگاندارى مەن اسكەريلەردىڭ جانكەشتى ءىس-قيمىلدارىنىڭ ارقاسىندا قازاقستاننىڭ بارلىق اۋماعىندا ءتارتىپ پەن تىنىشتىق قالپىنا كەلتىرىلدى. ەلىمىزدە ارقاشان بەيبىتشىلىك پەن يگىلىك بولسىن!», دەپ جازدى پرەزيدەنتتىڭ ءباسپاسوز حاتشىسى بەرىك ءۋالي ءوزىنىڭ Facebook پاراقشاسىندا.