قر دسم سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا رەۆاكتسينالاۋ ءۇشىن Sputnik-V ۆاكتسيناسى نەگە قولدانىلمايتىنىن ءتۇسىندىردى, دەپ حابارلايدى Egemen.kz.
«قازىرگى ۋاقىتتا بىزدە Sputnik-V بار جانە ول رەۆاكتسينالاۋ ءۇشىن قولدانىلمايدى. ويتكەنى, وزدەرىڭىز بىلەتىندەي, وندا ەكى ءتۇرلى كومپونەنت بار. رەۆاكتسينالاۋ ءۇشىن «سپۋتنيك لايت» ۆاكتسيناسى قولدانىلادى. قازىرگى ۋاقىتتا قازاقستاندا سق-فارماتسيا قويمالارىنا, ياعني 4 وڭىردەگى ءدارى-دارمەك حابتارىنا 150 مىڭ دوزا «سپۋتنيك لايت» جەتكىزىلدى. وسى اپتا سوڭىنا دەيىن ۆاكتسينا كولەمى وڭىرلەرگە ءبولىنىپ, جەتكىزىلەتىن بولادى. ارينە جەتكىزۋ ۋاقىتى اۋا رايىنا دا تىكەلەي بايلانىستى بولادى. وسى اپتا سوڭىنا دەيىن ۆاكتسينا وڭىرلەرگە جەتكىزىلىپ, رەۆاكتسينالاۋ ءۇشىن قولجەتىمدى بولادى دەپ جوسپارلاپ وتىرمىز», دەپ جاۋاپ بەردى ا. ەسماعامبەتوۆا.
سپيكەردىڭ ايتۋىنشا, «سپۋتنيك لايت» قازاقستاندا وندىرىلمەگەن, ۆاكتسينانىڭ 150 مىڭ دوزاسى رەسەيلىك وندىرۋشىلەن ساتىپ الىنعان.
«العاشقى 150 مىڭ دوزا رەسەيلىك وندىرۋشىلەن ساتىپ الىندى, ويتكەنى دايىن ۆاكتسينانى ساتىپ الىپ, وڭىرلەرگە جەتكىزۋ بارىنەن جىلدام بولدى. ۆاكتسينانى ءوز ەلىمىزدە ءوندىرۋ ءۇشىن ونى اكەلىپ بارلىق سەرتيفيكاتتىق جۇمىستاردى جۇرگىزۋ كەرەك. وعان كوپ ۋاقىت جۇمسالار ەدى. «سپۋتنيك لايت» رەۆاكتسينالاۋعا قولجەتىمدى بولۋى ءۇشىن 150 مىڭ دوزاسى ساتىپ الىندى», دەپ ءتۇسىندىردى ايجان ەسماعامبەتوۆا.