استانا قالاسىندا كافەدە جاساعان جانجالدارى سالدارىنان ەكى پروكۋراتۋرا قىزمەتكەرى جۇمىستارىنان بوساتىلدى. بۇل تۋرالى باس پروكۋراتۋرانىڭ ءباسپاسوز قىزمەتىنە سىلتەمە جاساعان Egemen.kz حابارلادى.
وقيعا 2014 جىلعى 1 ناۋرىز كۇنى «شانحاي» كافەسىندە ورىن العان. وسىندا تاماقتاندىرۋ ورنىنىڭ قىزمەتشىلەرى مەن پروكۋراتۋرا ورگاندارى قىزمەتكەرلەرى اراسىندا جانجال تۋىپ كەتكەن.
«قىزمەتتىك تەكسەرىستىڭ قورىتىندىسىنا سايكەس, پروكۋراتۋرا قىزمەتكەرلەرىنىڭ ار-وجدان كودەكسىنىڭ نورمالارىن ورەسكەل بۇزعانى جانە پروكۋراتۋرا ورگاندارىنىڭ بەدەلىنە نۇقسان كەلتىرەتىن تەرىس قىلىق جاساعانى ءۇشىن ابزال زاڭقوەۆ استانا قالاسى پروكۋرورىنىڭ 2014 جىلعى 4 ناۋرىزداعى بۇيرىعىمەن ەسىل اۋدانى پروكۋرورىنىڭ كومەكشىسى لاۋازىمىنان, ءىلياس ابدۋاليەۆ باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ايماقتىق كولىك باسقارماسى باستىعىنىڭ 3 ناۋرىزداعى بۇيرىعىمەن اتالمىش باسقارمانىڭ اعا پروكۋرورى لاۋازىمىنان بوساتىلدى. ەكەۋى دە پروكۋراتۋرا ورگاندارىنان قىزمەتتەن شىعارىلدى», - دەلىنگەن حابارلامادا.
بۇدان بولەك, قاراۋىنداعى قىزمەتكەرلەرىنە ءتيىستى باقىلاۋ جاساي الماعانى ءۇشىن قۇقىقتىق ستاتيستيكا جانە ارنايى ەسەپكە الۋ جونىندەگى كوميتەت توراعاسىنىڭ بۇيرىعىمەن ايماقتىق باسقارما باستىعى مارالبەك ەشىموۆ قىزمەتكە تولىق سايكەس ەمەستىگى تۋرالى ەسكەرتۋ, ەسىل اۋدانىنىڭ پروكۋرورى ءبىرجان ماجرەنوۆ سوگىس الدى.
قۇرىش نۇرىمبەت.
دەرەككوز: باس پروكۋراتۋرانىڭ ءباسپاسوز قىزمەتى.