وزىنە كەسىلگەن ءولىم جازاسىن 26 جىلدان بەرى كۇتىپ وتىرعان گلەنن فورد ەسىمدى امەريكالىق ازامات اقتالىپ, تۇرمەدەن ءبىرجولا بوساپ شىقتى. بۇل تۋرالى پراۆدا.رۋ حابارلادى.
«الپىس ءتورت جاستاعى گلەنن فورد 26 جىلدان بەرى ءولىم جازاسىن كۇتىپ كەلىپ, سوتتىڭ اقتاۋىمەن تۇرمەدەن شىقتى. لۋيزيانا تۇرمەسىنە فورد 1983 جىلى زەرگەر ءارى ساعات جوندەۋشى يزيدور رويزماندى ءولتىردى دەگەن ايپىپەن تۇسكەن ەدى. فورد مارقۇممەن دوستىق قارىم-قاتىناستا بولعان ەكەن. ول ءوزىنىڭ بۇل ولىمگە قاتىسى بارىن ۇدايى جوققا شىعارىپ كەلدى. الايدا, سوت سوعان قاراماستان, فوردتى ءولىم جازاسىنا كەستى», - دەلىنگەن حابارلامادا.
قىلمىستىق ءىستى تەكسەرۋ بارىسىندا تەرگەۋشىلەر كۋالاردى دا, قىلمىس قارۋىن دا تابا الماپتى. ال قۇرامىندا بىردە-ءبىر افروامەريكالىق بولماعان القابيلەر سوتى قارا ءناسىلدى كىسىنى كىنالى دەپ تاپتى.
فورد ءولىم جازاسىن 1988 جىلدان بەرى كۇتىپ كەلەدى. تەك جاقىندا عانا ونىڭ ادۆوكاتتارى ءوز قورعاۋشىلارىنىڭ ءولىم وقيعاسى ورىن العان كەزدە زەرگەردىڭ ۇيىندە بولۋى مۇمكىن ەمەس ەكەنىن دالەلدەپ بەرە ءبىلدى. بىراق ناعىز قىلمىسكەردى ۇركىتىپ الماس ءۇشىن ونىڭ جاي-جاپسارى ازىرگە اشىلىپ ايتىلىپ وتىرعان جوق.
بوستاندىققا شىققان بويدا گلەنن فورد ءوزىن تاعدىرى مەن ادامدار الداپ كەتكەندەي سەزىنەتىنىن مالىمدەدى. ەندى ءوزىنىڭ وسى جىلدارداعى ازابى مەن جازاسى ءۇشىن 300 مىڭ دوللار كولەمىندە وتەماقى ءوندىرىپ الماقشى بولىپ وتىر.
قۇرىش نۇرىمبەت.
دەرەككوز: پراۆدا.رۋ.
فوتو: يتار-تاسس.