شىعىس قازاقستان وبلىسى, ءۇرجار اۋدانى, بەستەرەك كەنتىندە الماتىدا تەرروريستەردىڭ قولىنان قازا تاپقان كاپيتان جاندوس جاعالباەۆتى جەرلەدى, دەپ حابارلايدى Egemen.kz.
جاندوس جانعاباەۆ ۇقك شەكارا اكادەمياسىنىڭ اعا وفيتسەرى بولدى. وفيتسەردىڭ ءمايىتى تۋعان اۋىلىنا ارنايى بورتپەن جەتكىزىلدى. ونىمەن قوشتاسۋعا اۋىلداستارى, دوستارى, تۋىستارى جانە ماقانشى شەكارا جاساعىنىڭ قىزمەتكەرلەرى كەلدى.
ۇقك شەكارا اكادەمياسىنىڭ عيماراتى الماتىداعى دوستىق داڭعىلىنىڭ جوعارى بولىگىندە ورنالاسقان. الماتىداعى تارتىپسىزدىكتەر كەزىندە جاندوس قىزمەت بابىمەن ءجۇردى. ول ءوز ۆەدومستۆوسىن قورعاپ, ەكسترەميستەرمەن اتىس كەزىندە قازا تاپتى.
لاڭكەستەردىڭ قولىنان ۇقك شەكارا اكادەمياسى كافەدراسىنىڭ باستىعى اندرەي قابدينوۆ جانە شەكارا اكادەمياسىنىڭ ءۇش كۋرسانتى ءادىلحان جايىق, ءبىتىم مەيىرحان جانە داۋلەت جۇپاربەكوۆ قازا تاپقانى بەلگىلى.
قازاقستان رەسپۋبليكاسى پرەزيدەنتىنىڭ جارلىعىمەن جاندوس جاعالباەۆ پەن اندرەي قابدينوۆ قايتىس بولعاننان كەيىن II دارەجەلى «ايبىن» وردەنىمەن ماراپاتتالدى. قازا تاپقان كۋرسانتتار قايتىس بولعاننان كەيىن III دارەجەلى «ايبىن» وردەنىمەن ماراپاتتالدى.