ءاۋ باستا ۇقشۇ بىتىمگەرشىلىك كۇشتەرىن شاقىرۋ تۋرالى شەشىم شىققاندا, مۇنى قوعامدا ءارتۇرلى قابىلدادى. ء«وزىمىزدىڭ كۇشتىك قۇرىلىمداردىڭ مۇمكىندىگى جەتپەي مە؟», «شەتەلدىك كومەككە جۇگىنۋدىڭ قانشالىقتى نەگىزى بار؟» دەگەن سەكىلدى كوزقاراستار تۋىندادى. ونىڭ ۇستىنە, ۇقشۇ-عا مۇشە مەملەكەتتەردىڭ كەيبىرىنە قاتىستى قوعامداعى پىكىر دە شەشىمگە كۇمانمەن قاراۋشىلار قاتارىن كوبەيتكەن.
بىراق بۇل قاي جاعىنان العاندا دا نەگىزدى شەشىم ەكەنىن ۋاقىت كورسەتىپ وتىر. مۇنىڭ بىرنەشە سەبەبى بار. بىرىنشىدەن, بۇل حالىقارالىق شەشىمدەر اياسىندا قاراستىرىلعان. ۇجىمدىق قاۋىپسىزدىك كەڭەسى ءوزارا كومەك ماقساتىندا قۇرىلعان. ياعني, الدەبىر مۇشە مەملەكەتكە ىشتەن نە سىرتتان قاۋىپ تونگەندە قالعان وداقتاس ەلدەر كومەك بەرەدى, تىعىرىقتان شىعۋعا قول ۇشىن سوزادى. وكىنىشكە قاراي, قازىرگى تاڭدا قازاقستاندا سونداي جاعداي تۋىنداپ تۇر.
ەكىنشىدەن, قازاقستان وسى كۇندەرى تەرروريستەر مەن ب ۇلىكشىلەردىڭ جاپپاي شابۋىلىنا ۇشىرادى. وسىنداي كەزەڭدە شابۋىلعا تويتارىس بەرۋ ۇلكەن كۇشتى, ۇلكەن الەۋەتتى تالاپ ەتىپ وتىرعانى كورىنىپ وتىر. بۇل كۇشتىك قۇرىلىمدارعا باستاپقى كەزدە وتە اۋىر ءتيدى. سوندىقتان ۇقشۇ-نىڭ مۇمكىندىگىن پايدالانۋدىڭ ءبىر سەبەبى وسىندا جاتىر.
ۇشىنشىدەن, وقيعانى باقىلاۋعا الۋعا كۇشتىك قۇرىلىمدارىمىزدىڭ الەۋەتى, مۇمكىندىگى جەتەر ەدى. بىراق سونىڭ بارىنە قاراماستان ماڭىزدى ماسەلە بار. بۇل - سىرتقى وداقتاستاردىڭ قولداۋى نەگىزىندە انتيتەررورلىق ارەكەتتى نەعۇرلىم تەز اياقتاۋ. ياعني, ۇقشۇ-نىڭ شاقىرىلۋى جاعدايدى بىرنەشە كۇنگە, بالكىم بىرنەشە ساعاتقا ەرتە باقىلاۋعا الۋعا مۇمكىندىك بەرەدى. ال قازىرگى نەگىزگى باسىمدىق, ماقسات - تەزىرەك تىنىشتىقتى ورناتۋ, تۇراقتىلىقتى قالپىنا كەلتىرۋ. وسىنداي كەزەڭدە حالىقارالىق تەتىكتى نەگە پايدالانباسقا؟!
تورتىنشىدەن, ۇقشۇ-نىڭ كۇشتەرى كوبىنە جاناما, كومەكشى ءرول اتقارادى. انتيتەررورلىق شارالاردى ءبىزدىڭ كۇشتىك قۇرىلىمدار جۇرگىزەدى. ۇقشۇ-نىڭ كۇشتەرى كوبىنە كۇزەتۋ, تاجىريبەمەن ءبولىسۋ, مەملەكەتتىك, قوعامدىق ماڭىزى بار نىسانداردى كۇزەتكە الۋ سەكىلدى جاناما جۇمىسپەن اينالىسادى. ياعني, ازاماتتارىمىزعا قارسى جۇمىس ىستەمەيدى. كوشەلەر مەن الاڭداردا جۇرمەيدى. سونداي-اق, وتە شەكتەلگەن مەرزىمگە كەلەدى. جاعداي تۇراقتالعان سوڭ ءوز ەلدەرىنە قايتادى.
بەسىنشىدەن, ۇقشۇ اسكەرلەرى جەكەلەگەن ەللەردىڭ ساربازدارى ەمەس. بۇل وسى ۇيىمعا كەزىندە ارنايى جىبەرىلگەن اسكەريلەردىڭ توپتاماسى. تەك قانا سول ۇيىم مانداتىمەن جۇرەدى. ياعني, بۇل جەردە رەسەيدىڭ, ارمەنيانىڭ, قىرعىزستاننىڭ اسكەرلەرى ەلگە كىرىپ كەتتى دەگەن اڭگىمە بولماۋى ءتيىس.
راسۋل جۇمالى,
ساياساتكەر