رەسپۋبليكالىق جەدەل شتاب تەرروريزممەن كۇرەس جونىندەگى جۇمىسىنا قاتىستى ۇندەۋ جاسادى, دەپ حابارلايدى Egemen.kz ۇقك ءباسپاسوز قىزمەتىنە سىلتەمە جاساپ.
كوميتەت وكىلدەرى 2022 جىلعى 10 قاڭتارداعى جاعداي بويىنشا قازاقستان رەسپۋبليكاسىنداعى احۋال تۇراقتانعانىن جانە باقىلاۋعا الىنعانىن مالىمدەدى.
«تەرروريزمگە قارسى كۇرەس جونىندەگى رەسپۋبليكالىق جانە وڭىرلىك جەدەل شتابتار تەرروريستىك قاۋىپ-قاتەر وشاقتارىن زالالسىزداندىردى. الماتى, قىزىلوردا, تالدىقورعان جانە تاراز قالالارىنداعى تەرروريستەر باسىپ العان بارلىق اكىمشىلىك نىساندار بوساتىلدى. اسا ماڭىزدى ستراتەگيالىق نىساندار مەن قارۋ جانە وق-دارىلەر ساقتالاتىن ورىنداردىڭ قاۋىپسىزدىگى قامتاماسىز ەتىلدى», دەلىنگەن حابارلامادا.
سونداي-اق, كوميتەتتەگىلەردىڭ مالىمەتىنشە, سودىرلار مەن جاپپاي تارتىپسىزدىكتەرگە قاتىسقانداردىڭ جاسىرىنۋى مۇمكىن ورىندارى بويىنشا ءتيىستى جۇمىستار جۇرگىزىلىپ جاتىر. قىلمىستىق ارەكەتتىڭ ىزدەرىن ايقىنداۋ جانە جيناقتاۋ جۇزەگە اسىرىلىپ جاتىر.
«بارلىق تۇرعىندى قۇقىقتىق ءتارتىپ ورگاندارىنا تەرروريستىك ءىس-ارەكەتكە قاتىسى بار ادامداردى انىقتاۋدا كومەك كورسەتۋگە جانە جاپپاي تارتىپسىزدىك كەزىندە ۇرلانعان اتىس قارۋى مەن وق-دارىلەردى ەرىكتى تۇردە تاپسىرۋعا شاقىرامىز», دەدى كوميتەت وكىلدەرى.