قازاق ەلى مەملەكەتتىلىگىن قالپىنا كەلتىرگەنىنە 30 جىلدىعىن اتاپ ءوتىپ, جاڭا بەلەسكە بەت العان ساتتە تاۋەلسىزدىگىمىزگە سىزات ءتۇسىرۋ ماقساتىمەن, بەلگىلى مۇددەنى كودەگەن الدەبىر كۇشتەر تەررورلىق ارەكەتپەن ازاماتتارىمىزعا قاستاندىق جاساپ, وتانداستارىمىزدىڭ دۇنيە-مۇلكىنە نۇقسان كەلتىرىپ, ەلدى ويرانداپ, مەملەكەتتىك اكىمشىلىك عيماراتتارعا شابۋىل جاسا, ەلدىگىمىزگە قاۋىپ توندىرگەن ءساتتى باستان كەشۋدەمىز.
ەلىمىزدە ورىن العان ءجايت حاقىمىزدىڭ جاڭاشا تاريحىنداعى تاۋى شاعىلىپ, تابانى تايعاناعان ءسات رەتىندە ورىن الارى بارشامىزعا ايان.
قازاقستان رەسپۋبليكاسى پرەزيدەنتى ق.ك.توقاەۆتىڭ ساقىنقاندى, سالماقتى باسشىلىعىمەن تيىسىنشە شۇعىل كادرلىق وزگەرىستەر ەنگىزۋى, دەر كەزىندە جاعدايدى تولىق باقىلاۋدى قولعا الۋى بىردەن وڭ ناتيجەسىن بەرگەنىنە بارشامىز كۋامىز, سونداي-اق, مەملەكەت باسشىسىنىڭ حالىققا بىرنەشە مارتە ۇندەۋ ايتۋى دا ازاماتتارىمىزدىڭ ۇرەيگە بوي الدىرماۋىنا جانە ادامدارعا قاۋىپسىزدىگىنىڭ قامتاماسىز ەتىلەتىنىنە سەنىم ۇيالاتتى.
الايدا, ەلىمىزدەگى احۋالدى رەتتەۋگە, تەرروريستىك كۇشتەرگە قارسى كۇرەس بارىسىندا ەرلىگىمەن جان كەشكەن اسىل ازاماتتار دا, وكىنىشكە وراي, بار. ارينە, تاۋەلسىزدىگىمىز تارازىعا تۇسكەن ساتتە ەرلىكپەن كوز جۇمعان اسىل ازاماتتاردىڭ ەسىمدەرى وتان تاريحىنان ورىن الارى ءسوزسىز!
7 قاڭتار كۇنى مەملەكەت باسشىسى قاسىم-جومارت كەمەل ۇلى توقاەۆ حالىققا كەزەكتى ۇندەۋىن جولدادى. اتاپ وتەرلىك ءجايت, بارشا قازاقستاندىقتارادىڭ اتالعان ۇندەۋدى ءبىر دەممەن تىڭداپ شىققانى كۇمانسىز دەپ ويلايمىن. ەلدەگى جاعداي ءبىرشاما رەتتەلىپ, كونستيتۋتسيالىق ءتارتىپ جۇيەلەنۋدە, دەسەك تە تەرروريستىك توپتاردىڭ ءالى دە ءبىرلى جارىم قارسىلىق تانىتۋ, مەملەكەتتىك جانگە جەكە مەنشىككە نۇقسان كەلتىرۋ ارەكەتتەرى جالعاسۋدا.
قر پرەزيدەنتى ق.ك.توقاەۆتىڭ تىكەلەي باسشىلىعىمەن قالىپتى بەيبىت ومىرگە ورالاتىنىمىزعا, مەملەكەتتىك باسقارۋ ىسىندەگى ورىن العان احۋال ءتيىستى باعاسىن الىپ, تيىسىنشە شەشىم قابىلداناتىنىنا, ازاماتتىق قوعام ينستيتۋتتارى دا ورىن العان ساياسي وقيعادان ساباق الىپ, قورىتىندى شىعاراتىنىن دا, مەملەكەتتىلىگىمىزگە سىزات تۇسىرۋگە بۇدان بىلاي جول بەرمەۋ ءۇشىن ءاربىر ازامات وزىندىك ءتۇيىن جاسايتىنىن دا باسا ايتۋعا بولادى.
قازاق ەلىنىڭ ساياسي پروتسەسىندە ورىن العان قاۋىپتى ەڭسەرۋ ءۇشىن ءبىر دەممەن قولداۋ كورسەتكەن حالقىنا پرەزيدەنت ق.ك.توقاەۆتىڭ العىس ايتىپ, يگىلىكتى ءومىر ءسۇرۋدى تىلەۋى – مەملەكەت باسشىسى ەلىمىزدىڭ ساياسي-ەكونوميكالىق دامۋىنا ايتۋلى وزگەرىستەر ەنگىزەتىنىنىڭ ايعاعى دەمەكپىز.
ەلىمىز امان, جۇرتىمىز تىنىش, تاۋەلسىزدىگىمىز تۇعىرلى بولسىن, اعايىن!
ل.ن.گۋميلەۆ ات. ەۇۋ
ساياساتتانۋ كافەدراسىنىڭ مەڭگەرۋشىسى,
پروفەسسور باعىش گابدۋلينا