قر پرەمەر-ءمينيسترىنىڭ ورىنباسارى ەرالى توعجانوۆ قازاقستاندىق جوو-لاردا جۇرگىزىلىپ جاتقان تاربيە جۇمىستارى تۋرالى ايتتى, دەپ حابارلايدى Egemen.kz.
«قازاقستان رەسپۋبليكاسىندا ءبىلىم بەرۋدى دامىتۋدىڭ 2025 جىلعا دەيىنگى تۇجىرىمداماسىنىڭ جوباسىندا قازاقستاندىقتاردىڭ جاس ۇرپاعىن وقىتۋ مەن تاربيەلەۋدىڭ قۇندىلىققا باعدارلانعان ءتاسىلىن قولدانا وتىرىپ تاربيەلەۋ ماسەلەلەرى بويىنشا ارنايى ءبولىم قاراستىرىلعان. تاربيە جۇمىسىنىڭ كورسەتكىشتەرى سونداي-اق ء«بىلىمدى ۇلت» ساپالى ءبىلىم بەرۋ» ۇلتتىق جوباسىندا, جوعارى وقۋ ورىندارىن دامىتۋدىڭ ستراتەگيالىق جوسپارلارىندا, جوعارى وقۋ ورىندارىنىڭ تاربيە جۇمىسى جوسپارلارىندا كوزدەلگەن. ۇلتتىق قۇندىلىقتاردى دارىپتەۋ بويىنشا جوو-لار «رۋحاني جاڭعىرۋ» باعدارلاماسىن ىسكە اسىرۋ بويىنشا ءىس-شارالار جوسپارىن ازىرلەدى», دەپ حابارلادى ەرالى توعجانوۆ دەپۋتاتتىق ساۋالعا بەرگەن جاۋابىندا.
ونىڭ ايتۋىنشا, جوعارى ءبىلىم بەرۋدىڭ مەملەكەتتىك جالپىعا مىندەتتى ستاندارتتارىندا جالپىعا مىندەتتى پاندەر تسيكلىندە الەۋمەتتىك ساياسي پاندەر ءمودۋلى قاراستىرىلعان.
«جوو-لاردى اككرەديتتەۋگە قويىلاتىن تالاپتاردا جاستارعا رۋحاني-ادامگەرشىلىك تاربيە بەرۋ بويىنشا پاندەردى مىندەتتى تۇردە ەنگىزۋدى قامتيتىن ستۋدەنتكە باعدارلانعان وقىتۋ, وقىتۋ جانە باعالاۋ جونىندەگى ستاندارت كوزدەلگەن. جاستاردىڭ شىعارماشىلىق بەلسەندىلىگىن دامىتۋ ءۇشىن ستۋدەنتتەر كلۋبتار جۇمىسىنا باعىتتار بويىنشا تارتىلادى, ستۋدەنتتىك ليگالار (سپورتتىق, دەباتتىق جانە ت.ب.) قۇرىلادى», دەپ اتاپ ءوتتى پرەمەر-ءمينيستردىڭ ورىنباسارى.
«100-دەن استام جوو-دا جاستار ساياساتىنىڭ وزەكتى تاقىرىپتارى بويىنشا كلۋبتاردىڭ تۇراقتى وتىرىستارىن وتكىزەتىن دەبات كلۋبتارى جۇمىس ىستەيدى. جوعارى وقۋ ورىندارىنىڭ القالى ورگاندارىنا (عىلىمي كەڭەس, ەتيكا جونىندەگى كوميسسيا, جۇمىس توپتارى, ساراپتامالىق كەڭەستەر جانە ت.ب.) باسقارۋشىلىق شەشىمدەر قابىلداۋعا, ءبىلىم بەرۋ پروتسەسى مەن ستۋدەنتتىك ءومىر ماسەلەلەرى بويىنشا نورماتيۆتىك قۇجاتتاردى ازىرلەۋگە جانە كەلىسۋگە قاتىسۋ ءۇشىن ستۋدەنتتىك اكتيۆ تارتىلادى», دەپ تۇيىندەدى ە. توعجانوۆ.