الماتىدا قارجى پيراميدالارىن ۇيىمداستىرعان ءتورت ادام سوتتالدى

الماتى قالالىق پد تەرگەۋ باسقارماسىنىڭ مالىمەتىنشە, قارجى پيراميداسىنا قاتىستى ءتورت قىلمىستىق ءىس اياقتالعان.

وسى قىلمىستار ناتيجەسىندە 500-گە جۋىق ادام زارداپ شەككەن. كەلتىرىلگەن شىعىننىڭ جالپى سوماسى - 1,5 ميلليارد تەڭگە.

«ولاردىڭ ءبىرى - 33 جاستاعى ا.ليم ەسىمدى ازامات, 2017 جىلدىڭ اقپانىنان 2018 جىلدىڭ تامىزىنا دەيىن الاياقتىق ماقساتتا ازاماتتاردىڭ قاراجاتىن الىپ وتىرعان. كەيىن "LS ins" جشس قۇرعان. ازاماتتار سالعان قاراجاتتى تولىق كولەمدە قايتاراتىنىنا جالعان كەپىلدىك بەرىپ, سپورتتىق ويىندارعا اقشا تىگۋ ارقىلى پايدا كورگىسى كەلگەن. ول سالىنعان قاراجات بويىنشا سىياقىنى كەز كەلگەن ۋاقىتتا, ءتۇرلى تاسىلمەن, ونىڭ ىشىندە كارتاعا, بانك شوتىنا نەمەسە كەڭسەگە اۋدارۋ ارقىلى الۋعا بولاتىنىن ايتقان.  الدانعان ازاماتتاردىڭ ارىزدارى بويىنشا 188 قىلمىستىق ءىس تىركەلگەن. جالپى كەلتىرىلگەن شىعىن - 1 440 281 000 تەڭگە», دەدى الماتى قالالىق پد باستىعىنىڭ ورىنباسارى رۇستەم ءابدىراحمانوۆ.

المالى اۋداندىق سوتىنىڭ قاۋلىسىمەن ليم ا. ەسىمدى ازامات 6,5 جىلعا باس بوستاندىعىنان ايىرىلدى.

سونىمەن قاتار, تەرگەۋ باسقارماسىندا د.الدابەرگەنوۆاعا قاتىستى قىلمىستىق ءىس قوزعالدى. ول الەۋمەتتىك جەلى ارقىلى ينۆەستيتسيالىق جوبا اشىلعانىن مالىمدەگەن.

«جوبا بۋكمەكەرلىك كەڭسەلەردە, سونداي-اق, ءارتۇرلى بيزنەس جوبالارعا اقشا تىگىپ, سالىم سالۋ ارقىلى قاراجاتتى كوبەيتۋگە باعىتتالعان. سالىمشىلار 30 پايىز جانە 50 پايىز پايدا الۋ ءۇشىن د.الدابەرگەنوۆا جانە باسقا ادامداردىڭ بانك كارتالارىنا اقشا اۋدارعان. بىراق ولار قاراجاتتى اۋدارسا دا, پايدا كورمەگەن. كۇدىكتى المالى اۋداندىق سوتىنىڭ شەشىمىمەن 6 جىل 8 ايعا باس بوستاندىعىنان ايىرىلدى», دەدى ءابدىراحمانوۆ.