اسقار مامين وزبەكستان ۇكىمەت باسشىسىمەن كەلىسسوز جۇرگىزدى

تاراپتار وزبەكستان رەسپۋبليكاسىنىڭ پرەزيدەنتى شاۆكات ميرزيەەۆتىڭ قازاقستانعا جاساعان مەملەكەتتىك ساپارىنىڭ جانە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆپەن (بيىلعى 6 جەلتوقسان) وتكەن كەلىسسوزدەرىنىڭ, سونداي-اق ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ 19-وتىرىسىنىڭ (بيىلعى 26 قاراشا) قورىتىندىسى بويىنشا قول جەتكىزىلگەن ۋاعدالاستىقتاردىڭ ىسكە اسىرىلۋ بارىسىن قارادى.

ساۋدا-ەكونوميكالىق, ينۆەستيتسيالىق, ترانزيتتىك-كولىك, اۋىل شارۋاشىلىعى, سۋ-ەنەرگەتيكا, ونەركاسىپتىك كووپەراتسيا, تسيفرلاندىرۋ, دەنساۋلىق ساقتاۋ, ءبىلىم بەرۋ, تۋريزم جانە باسقا دا سالالارداعى ەكىجاقتى ءوزارا ءىس-قيمىلدى دامىتۋدىڭ وزەكتى ماسەلەلەرى تالقىلاندى.

ىنتىماقتاستىقتىڭ ءاربىر باعىتى بويىنشا ەكى ەلدىڭ سالالىق مينيسترلىكتەرى مەن ۆەدومستۆولارىنىڭ باسشىلارى بايانداما جاسادى. قازاقستان مەن وزبەكستانعا ورتالىق ازياداعى بارلىق وڭىرلىك ساۋدانىڭ 70%-عا جۋىعى تيەسىلى. 2021 جىلدىڭ 10 ايىندا ەكىجاقتى ساۋدا كولەمى $3,26 ملرد قۇرادى, بۇل 2020 جىلدىڭ سايكەس كەزەڭىندەگى كورسەتكىشتەن 29,8%-عا جوعارى.

سونداي-اق بۇل كورسەتكىش 2019 جىلدىڭ 10 ايىمەن سالىستىرعاندا 10,6%-عا جوعارى. قر-دان ءور-عا ەكسپورت كولەمى 2020 جىلدىڭ 10 ايىمەن سالىستىرعاندا 31,6%-عا ۇلعايىپ, $2,37 ملرد قۇرادى. 2019 جىلدىڭ 10 ايىمەن سالىستىرعاندا كورسەتكىش 34,3%-عا ارتتى.

ەكسپورتتىڭ ءوسۋىنىڭ نەگىزگى درايۆەرلەرى اۋىل شارۋاشىلىعى جانە اوك (+17%), مۇناي وڭدەۋ سەكتورى (2,2 ەسە), مەتاللۋرگيا (+99,3%), اۆتوموبيل جاساۋ (+28,3%) ونىمدەرى بولدى. ءوزارا ساۋدا كولەمىن قىسقا مەرزىمدى كەزەڭدە $5 ملرد دەيىن جانە ورتا مەرزىمدى پەرسپەكتيۆادا $10 ملرد دەيىن جەتكىزۋ مىندەتى قويىلدى.

ەكى ەلدىڭ شەكاراسىندا «ورتالىق ازيا» حالىقارالىق ونەركاسىپتىك كووپەراتسيا ورتالىعىن قۇرۋ جوباسىن ىسكە اسىرۋ بويىنشا جۇمىستار جۇرگىزىلۋدە.

قر پرەمەر-ءمينيسترى ونەركاسىپتىك كووپەراتسيا, سۋ ەنەرگەتيكاسى, اۋىل شارۋاشىلىعى جانە باسقا دا سالالارداعى قازاقستان-وزبەكستان ىنتىماقتاستىعىنىڭ جوعارى سەرپىنىن اتاپ ءوتتى. قازاقستاننىڭ وزبەكستانمەن ءوزارا ءىس-قيمىلىنىڭ جوعارى دەڭگەيىنە ترانزيتتىك كولىك سالاسىندا قول جەتكىزىلدى – تەمىرجول ينفراقۇرىلىمىن – «تۇركىستان – شىمكەنت – تاشكەنت» جوعارى جىلدامدىقتى جولاۋشىلار ماگيسترالىن جانە «داربازا – ماقتاارال – جيزاق» تەمىرجول جەلىسىن دامىتۋ, اۆتوموبيل وتكىزۋ پۋنكتتەرىن جاڭعىرتۋ جونىندەگى بىرلەسكەن ءىرى جوبالاردى ىسكە اسىرۋ جۇمىستارى جۇرگىزىلىپ جاتىر.

جۇك تاسىمالداۋ ءۇشىن قولايلى تاريفتىك ساياسات قالىپتاستىرىلدى. بيىلعى جىلدىڭ 11 ايىندا قر مەن ءور اراسىنداعى تەمىرجول تاسىمالىنىڭ كولەمى 22,7 ملن توننانى قۇرادى.

ەكى ەلدىڭ قورشاعان ورتانى قورعاۋ, سۋ جانە ورمان شارۋاشىلىعى سالاسىنداعى ىنتىماقتاستىعى دامۋدا. بىرلەسكەن كۇش-جىگەرمەن ۆەگەتاتسيالىق كەزەڭدە توقتوعۇل جانە قايراقۇم سۋ قويمالارىنان قوسىمشا سۋ اعىزىلدى, بۇل قر مەن ءور اۋىل شارۋاشىلىعى تاۋارىن وندىرۋشىلەرىنىڭ قاجەتتىلىكتەرىن قامتاماسىز ەتتى. ارال تەڭىزىنىڭ وزەكتى ەكولوگيالىق پروبلەمالارىن شەشۋ, بۇكىل ارال ماڭىنىڭ الەۋمەتتىك-ەكونوميكالىق دامۋىن قولداۋ بويىنشا بىرلەسكەن جوبالار ىسكە اسىرىلىپ جاتىر.

«جىل قورىتىندىسى بويىنشا ءبىز ايتار-ەلىقتاي ناتيجەلەرگە جانە ماڭىزدى ۋاعدالاستىقتارعا قول جەتكىزدىك. مەملەكەتتەرىمىزدىڭ باسشىلارىنىڭ ساياسي ەرىك-جىگەرىنىڭ ارقاسىندا قازاقستان مەن وزبەكستان اراسىنداعى ستراتەگيالىق ارىپتەستىك دامۋدىڭ جوعارى سەرپىنىن كورسەتىپ وتىر»,  دەدى ا.مامين.