شىمكەنتتە جوسىقسىز كاسىپكەرلەرگە جالعان شوت-فاكتۋرالار جازىپ بەرگەن ازاماتتىڭ زاڭسىز ارەكەتى اشكەرە بولدى. ول مەملەكەتكە 1 ملرد تەڭگەدەن استام مولشەردە زالال كەلتىردى. بۇل تۋرالى قارجىلىق مونيتورينگ اگەنتتىگى مالىمدەدى, دەپ حابارلايدى Egemen.kz.
شىمكەنت قالاسى بويىنشا اۋماقتىق دەپارتامەنت سالىق تولەۋدەن جالتارۋ ماقساتىندا كاسىپكەرلەرگە جالعان شوت-فاكتۋرالار جازىپ بەرگەن ا.ماحاتاەۆتىڭ زاڭسىز ارەكەتىنىڭ جولىن كەستى.
«تەرگەۋ مالىمەتتەرى بويىنشا, ا.ماحاتاەۆ 2017-2020 جىلدار ارالىعىندا ءوزىنىڭ تۋىستارى مەن تانىستارىنىڭ اتىنا 14 كاسىپورىن («مەيىر قۇرىلىس», «تىنىشتىق 2018», «ەليت كاپيتەل», «ماگما-2018», «اشيموۆ ي كو», «A L A T A U K», «S-Industry», «بەس قاسقا», «جورعا 2019», «ينتەرترانسسەرۆيس-2020», «Eحcellent», «ۋگام 2018», «005», «ەۆەرەست ك» جشس) تىركەگەن. اتالعان كاسىپورىندار كونتراگەنتتەرگە تولەمدەردى تولەۋدەن جالتارۋعا جاردەمدەسۋ ءۇشىن جانە كاسىپكەرلىك قىزمەتتى جۇزەگە اسىرۋ ماقساتىنسىز قۇرىلعان. بۇل فيرمالاردىڭ كەڭسەلەرى, قىزمەتكەرلەر شتاتى, وندىرىستىك-تەحنيكالىق بازاسى جانە قويمالىق ءۇي-جايلارى بولماعان. زاڭسىز ارەكەتتەردىڭ ناتيجەسىندە مەملەكەتكە 1 ملرد. تەڭگەدەن استام مولشەردە زالال كەلتىرىلدى», دەلىنگەن حابارلامادا.
وسىلايشا ا.ماحاتاەۆ 4 جىلعا باس بوستاندىعىنان جانە 10 جىلعا كاسىپكەرلىك قىزمەتپەن اينالىسۋ قۇقىعىنان ايىرىلدى. كەلتىرىلگەن زالال سوماسى مەملەكەت كىرىسىنە اينالدىرىلدى.