قازاقستاندا مەملەكەتتىك قىزمەتكەرلەرگە جۇمىستان تىس ۋاقىتتا قوسىمشا تابىس تابۋعا زاڭ جۇزىندە رۇقسات بەرۋ مۇمكىندىگى قاراستىرىلۋدا. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە قر مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا ءمالىم ەتتى, دەپ حابارلايدى Egemen.kz.
«بۇگىنگى تاڭدا زاڭنامادا مەملەكەتتىك قىزمەتكەرلەرگە قوسىمشا جۇمىسپەن اينالىسۋعا رۇقسات بەرەتىن نورما جوق. بىراق ءبىز زاڭعا بوس ۋاقىتتا قوسىمشا جۇمىسپەن اينالىسۋ مۇمكىندىگىن قاراستىرۋ جونىندە وزگەرىستەر ەنگىزۋ تۋرالى ويلاپ وتىرمىز», دەدى انار جايىلعانوۆا.
ونىڭ پىكىرىنشە, مەملەكەتتىك قىزمەتكەرلەر كاسىپكەرلىككە جاتپايتىن قىزمەتتىڭ باسقا تۇرلەرىمەن اينالىسۋ ارقىلى جۇمىستان تىس ۋاقىتتا تابىس الا الادى. الايدا, سپيكەر تۇسىندىرگەندەي, جۇمىس كاسىپكەرلىكپەن بايلانىستى بولماۋى كەرەك.
ء«بىز وتباسىن اسىراۋعا قوسىمشا قاراجات قاجەت بولعان جاعدايدا (قوسىمشا جۇمىس ىستەۋگە) مۇمكىندىك بەرەتىن زاڭنامالىق وزگەرىستەردى دايىنداپ جاتىرمىز. بىراق ول ءالى قابىلدانعان جوق. ال كاسىپكەرلىكپەن اينالىسۋعا بولمايدى», دەدى انار جايىلعانوۆا.