سىرتقى ىستەر ءمينيسترى ەرلان ىدىرىسوۆ پەن اقش-تىڭ قازاقستانداعى ۋاقىتشا سەنىمدى وكىلى دجون وردۆەيدىڭ كەزدەسۋى بولىپ ءوتتى, دەپ حابارلادى مينيسترلىكتىڭ ءباسپاسوز قىزمەتى.
كەزدەسۋ بارىسىندا ساياسي جانە ەكونوميكالىق سالالارداعى, يادرولىق قارۋسىزدانۋ مەن تاراتپاۋداعى ەكىجاقتى ىنتىماقتاستىقتىڭ ءتۇرلى اسپەكتىلەرىنىڭ كەڭ اۋقىمدى ماسەلەلەرى, سونداي-اق, حالىقارالىق كۇن ءتارتىبىنىڭ وزەكتى ماسەلەلەرى تالقىعا سالىندى. قازاقستان پرەزيدەنتى ن.نازارباەۆتىڭ وسى ناۋرىز ايىنىڭ اياق جاعىندا گااگادا وتەتىن يادرولىق قاۋىپسىزدىك جونىندەگى سامميتكە قاتىسۋى, ستراتەگيالىق ارىپتەستىك جونىندەگى قازاقستان-امەريكا كوميسسياسى مەن عىلىمي-تەحنيكالىق ىنتىماقتاستىق جونىندەگى كوميسسيا جۇمىستارى, 2014 جىلدىڭ سوڭىنا دەيىنگى ءوزارا ىقپالداستىق ماسەلەلەرى كەلىسسوزدىڭ تاقىرىپتارىنا اينالدى.
ۋكرايناداعى جاعداي ءوز الدىنا بولەك اڭگىمە ەتىلدى. تاراپتار بۇل ماسەلە بويىنشا مازمۇندى پىكىر الماستى.