كوروناۆيرۋستى جۇقتىرۋ سانى بويىنشا ۇلىبريتانيادا رەكورد كۇن سايىن جاڭارۋدا. سوڭعى مالىمەتتەرگە سايكەس, وندا 120 مىڭعا جۋىق جاعداي تىركەلگەن, دەپ حابارلايدى Egemen.kz BBC News-كە سىلتەمە جاساپ.
وسى ارادا كاتالونيادا تۇنگى كومەندانتتىق ساعات ەنگىزىلدى, ال يسپانيا مەن يتاليا كوشەلەرىندە بەتپەردەسىز جۇرۋگە تىيىم سالىنعان.
رەسمي دەرەكتەر بويىنشا, پاندەميا باستالعاننان بەرى الەمدە 277 ميلليون ينفەكتسيا جۇقتىرۋ جاعدايى تىركەلىپ, 5,3 ميلليون ادامنىڭ ءومىرى قيىلدى.
ۇلىبريتانيادا كوروناۆيرۋستىق ينفەكتسيانى جۇقتىرۋ سانى تەز وسۋدە. بەيسەنبىدە شامامەن 120 مىڭ جاعداي انىقتالىپ, جاڭا رەكورد تىركەلدى. الدىڭعى تاۋلىكتە ناۋقاس سانى 106 مىڭ بولعان. دەسە دە قايتىس بولعاندار سانى سالىستىرمالى تۇردە از بولىپ قالا بەرەدى: سوڭعى كۇنى - 147 ءولىم, الدىڭعى كۇنى - 140.
وسى جىلدىڭ قاڭتارىندا ۇلىبريتانيادا پاندەميا شىڭىندا كۇن سايىن كوۆيدتەن ءبىر جارىم مىڭنان استام ادام, ياعني, ءبىر كۇندە 1820 ناۋقاس قايتىس بولدى. ساراپشىلار مەن ساياساتكەرلەر بۇل ايىرماشىلىقتى قازىر بريتاندىقتاردىڭ كوپشىلىگى كوروناۆيرۋسقا قارسى ەگىلگەندىگىمەن تۇسىندىرەدى, ال جارتىسىنا جۋىعى ءۇشىنشى ۆاكتسينا-بۋستەردى جاسادى.
قازىر انگليا اۋرۋحانالارىندا كوروناۆيرۋسپەن اۋىراتىن 8 مىڭنان استام ناۋقاس بار. وتكەن جىلدىڭ قاڭتار ايىندا 34 مىڭنان استام بولدى. الايدا, اۋرۋحانالارداعى جۇكتەمە ۇلكەن, سەبەبى كوۆيدتى جۇقتىرعاندار اراسىندا دارىگەرلەردىڭ قاتارى دا بار. بەيسەنبىدە ۇلىبريتانيانىڭ ۇلتتىق دەنساۋلىق ساقتاۋ قىزمەتى 19 جەلتوقساندا 19 مىڭعا جۋىق مەديتسينا قىزمەتكەرى جۇمىسقا كەلمەگەنىن مالىمدەدى. ولار اۋىرىپ قالدى نەمەسە وقشاۋلانۋدا وتىردى.
ال يسپانيا مەن يتاليا كوشەلەرىندە مىندەتتى ماسكا تاعۋ رەجيمى كۇشىنە قايتا ەندى. يسپانيا پرەمەر-ءمينيسترى پەدرو سانچەس ماسكا رەجيمى تەك قوعامدىق ورىنداردا عانا ەمەس, كوشەدە دە قايتارىلاتىنىن مالىمدەدى.
يسپانيا كوروناۆيرۋس شەكتەۋلەرىن جازدىڭ باسىندا الىپ تاستادى, بىراق قازىر جۇقتىرۋ سانى قايتا ءوستى. 20 جەلتوقساندا ەلدە 79 مىڭ جاڭا جاعداي تىركەلدى, سوڭعى تاۋلىكتە بۇل سان 60 مىڭعا جەتتى. الدىن الا باعالاۋلار بويىنشا جاعدايلاردىڭ شامامەن جارتىسى «وميكرونمەن» بايلانىستى.
بەيسەنبىدە يتاليانىڭ دەنساۋلىق ساقتاۋ ءمينيسترى روبەرتو سپەرانزا «وميكروننىڭ» تارالۋىنا بايلانىستى كوشەدە ماسكا تاعۋدىڭ قايتارىلعانى تۋرالى حابارلادى. سونىمەن قاتار, يتاليا ۇكىمەتى جاڭا جىلدىڭ بارلىق جاپپاي مەرەكەلەرىنە تىيىم سالىپ, كلۋبتاردى 31 قاڭتارعا دەيىن جابۋ تۋرالى شەشىم قابىلدادى.
كاتالونيا سوتى بەيسەنبىدە جەرگىلىكتى بيلىكتىڭ تۇنگى كومەندانتتىق ساعاتتى ەنگىزۋ تۋرالى شەشىمىنىڭ زاڭدىلىعىن راستادى. ەندى كاتالوندىقتارعا ۇيدەن تۇنگى ساعاتتان تاڭعى التىعا دەيىن شىعۋعا تىيىم سالىنادى.