ارينە, باياعىنىڭ التىن قۇرساقتى باتىر انالارى تۋرالى اڭگىمە بولەك. ول جىلدارى اۋىلداردا ءۇي سايىن الدىڭنان التىن القا تاققان انالار شىعاتىن. ارينە, قازىر دە اللا تاعالام اۋىلداعى انالاردىڭ قۇرساعىنا بەرەكەسىن دارىتىپ-اق تۇر. بىراق, قازىر زامان باسقا, جاعداي باسقا, التىن القاعا دەگەن تالاپ باسقا. ەلباسى
ن.نازارباەۆ حالىققا ارناعان جولداۋىندا ماڭگىلىك ەل بولۋ اتا-بابالارىمىزدىڭ سان مىڭ جىلدان بەرگى اسىل ارمانى ەكەنىن ايتا كەلىپ: «ول ارمان – تۇرمىسى باقۋاتتى, ءتۇتىنى ءتۇزۋ ۇشقان, ۇرپاعى ەرتەڭىنە سەنىممەن قارايتىن باقىتتى ەل بولۋ ەدى» دەپ تۇيىندەيدى. شىنىندا, ۇلىسىمىزدىڭ ۇيىتقىسى سانالاتىن وڭتۇستىكتە دەموگرافيالىق ءدۇمپۋدىڭ كۇن سايىن كۇشەيىپ كەلە جاتقانى ەل تۇرمىسىنىڭ تۇزەلىپ, جاعدايى جاقسارا باستاعانىنىڭ ءبىر بەلگىسى ەكەنى انىق.
ءبىز اڭگىمە ەتكەلى وتىرعان بالتاكول اۋىلى – ۇلىلاردىڭ وتانى وتىرار اۋدانىنا قاراعانىمەن, وعان كيەلى تۇركىستان قالاسى ارقىلى بارساڭىز, تەز جەتەسىز. وتكەن جىلى بۇل وكرۋگ اۋدان كولەمىندە باقشا ونىمدەرىن ءوندىرۋ جاعىنان ءبىرىنشى ورىن الدى. ءسويتىپ, اۋىل اكىمى ابدىراسەيىت اكىمبەكتەن باستاپ, شارۋا قوجالىعىنىڭ توراعالارى, بىرقاتار مەحانيزاتورلار اۋدان اكىمىنىڭ العىس حاتىمەن ماراپاتتالىپ, زاتتاي سىيلىقتارعا يە بولدى.
بالتاكولدە باتىر انا كوپ. بۇگىندە بۇل اۋىلدىق وكرۋگتە 408 وتباسى ءتۇتىن تۇتەتىپ وتىرسا, «التىن القا» تاققان – 66, «كۇمىس القا» تاققان 130 انا بار ەكەن. سوندا ءاربىر ەكىنشى ۇيدە كوپبالالى انا تۇرادى دەگەن ءسوز. تاعى ءبىر قۋانارلىعى, كەۋدەسىنە القا تاققان انالاردىڭ كوبىسى جاس كەلىنشەكتەر. مىسالى, وسى وكرۋگكە قاراستى كولقۇدىق اۋىلىنىڭ تۇرعىنى بوتاگوز بەكەنوۆا مەكتەپتە ەڭبەك ەتىپ كەلە جاتقانىنا 13 جىلدىڭ ءجۇزى بولىپتى. «ەكى ۇل, ءتورت قىزىم بار. ۇلكەنىم الماتى قالاسىندا كوللەدجدە وقيدى, ەڭ كىشكەنتايىم 2 جاستا. كۇيەۋىم جۇرگىزۋشى بولىپ جۇمىس ىستەيدى. مەملەكەت كوپبالالى انالارعا جىل سايىن جاقسى جاعداي جاساپ كەلەدى عوي. ءار بالانىڭ ءوز نەسىبەسى بار. سوندىقتان كوپبالالى وتباسى بولۋدان قورقۋدىڭ قاجەتى جوق», دەيدى ول. سونداي-اق, كولقۇدىقتىق گۇلزادا اقجول, گۇلزيا ءسۇتتىباي ارقايسىسى – 6, عاينيجامال ءجۇنىسوۆا – 5, گۇلميرا ومىرزاقوۆا – 4, ءمولدىر دۇيسەنوۆا 5 پەرزەنت تاربيەلەپ وتىر. «ءۇش ۇل جانە ەگىز قىزدارىم بار. ۇلكەنىم ءبىرىنشى سىنىپتا وقيدى. وتكەن جىلى «قازاقستان» ۇلتتىق ارناسىندا «ەڭ جاس باتىر انا» دەگەن بايقاۋ ۇيىمداستىرىلدى. سوعان قاتىسۋعا نيەت بىلدىرگەن ەدىك. جۋرناليستەر: «سىزدەرگە ءوزىمىز بارامىز», دەدى. بىراق, نەگە ەكەنىن قايدام, حابارلاسپادى. ءوزىم اۋىلداعى مەكتەپتە جۇمىس ىستەپ كەلە جاتقانىما 10 جىل بولدى. باستاۋىش سىنىپتىڭ مۇعالىمىمىن», دەيدى عاينيجامال ءجۇنىسوۆا.
گۇلنار پارمانوۆا.
وڭتۇستىك قازاقستان وبلىسى,
وتىرار اۋدانى.