8 ناۋرىز – حالىقارالىق ايەلدەر كۇنى قۇرمەتىنە وراي قازاقستان رەسپۋبليكاسىنىڭ پرەزيدەنتى
ن.ءا.نازارباەۆپەن «كوكتەم شۋاعى» كەزدەسۋىنە قاتىسقان قازاقستاننىڭ ايەلدەر قوعامداستىعىنىڭ وكىلدەرى
مايا ۆەرونسكايا, تەلەجۇرگىزۋشى, اكتريسا. «مەنىڭ بالالىق شاعىمنىڭ اسپانى» فيلمىندە مايا ەل پرەزيدەنتى ۇستازىنىڭ ءرولىن شەبەر سومدادى. بۇل ونىڭ العاشقى جانە وتە جاۋاپتى ءرولى بولىپ تابىلادى. قازاق مەكتەپ-گيمنازياسىن تامامداعان. اباي اتىنداعى قازۇپۋ-ءدىڭ «قازاق فيلولوگياسى» فاكۋلتەتىن ۇزدىك بىتىرگەن سوڭ, «قازاقستان» تەلەارناسىنا مەملەكەتتىك ءتىلدە جۇرگىزۋشىلىككە شاقىرىلدى. «جىل پاتريوتى» مەدالىمەن ناگرادتالعان, «مەنىڭ قازاقستانىم!» (2011 ج.) IV رەسپۋبليكالىق پاتريوتتار فورۋمىندا «كوككە ۇمتىلعان قازاقستان» نوميناتسياسىندا «ءتىل جاناشىرى-2011» مەدالىمەن ماراپاتتالدى. سۆەتلانا ۆلاديميروۆنا شاريپوۆا, الپينيزم بويىنشا سپورت شەبەرى. قوسىمشا وتتەگىن پايدالانباستان 8 مىڭ مەتردەن اساتىن بيىك شىڭعا شىققان قازاقستانداعى بىردەن-ءبىر ايەل الپينيست. نۇرسۇلتان جانە امانگەلدى شىڭدارىنا شاپشاڭ شىعۋدان حالىقارالىق جارىستىڭ ەكى مارتە جەڭىمپازى. باعىندىرعان شىڭدارى مەن جەتىستىكتەرى: 2006 جىلى – لەنين شىڭى 7134 مەتر, 2007 جىلى – دحاۋلاگيري 8167 مەتر جانە حان ءتاڭىرى 7010 مەتر (جالعىز شىعۋ), 2008 جىلى – ماكالۋ شىڭى 8471 مەتر. 2006 جىلى ەلبرۋسقا شاپشاڭ شىعۋدىڭ حالىقارالىق جارىسىنىڭ جەڭىمپازى اتاندى. قىسقى رەسپۋبليكالىق جارىستاردىڭ جەڭىمپازى بولىپ تابىلادى. كۇيەۋى نۇرلان ەكەۋى قىزى ديانانى تاربيەلەپ, وسىرۋدە. تولقىن توقتاۋبايقىزى زابيروۆا, ەسترادا ءانشىسى, قازاقستاننىڭ ەڭبەك سىڭىرگەن قايراتكەرى. حالىقارالىق, رەسپۋبليكالىق كونكۋرستار مەن فەستيۆالداردىڭ لاۋرەاتى. 25 جىلدان بەرى قازاقستاندىقتاردى ءوز داۋىسىمەن قۋانتىپ كەلەدى. سەمەي وبلىسىنىڭ اياگوز قالاسىنداعى قاراپايىم وتباسىندا تاربيەلەنگەن كىشكەنتاي قىزدىڭ تالانتى مەن جىگەرىنىڭ ارقاسىندا ودان قازاقستان ەستراداسىنىڭ تالانتتى ءانشىسى ءوسىپ شىقتى. تۇرمىس قۇرعان. 3 بالا تاربيەلەپ وتىر. ساۋلە مۇحانبەديانقىزى ايتباەۆا, قازاقستانداعى العاشقى ايەل-گەنەرال. 2010 جىلى گەنەرال شەنىن العان. س.ايتباەۆانىڭ «قازاقستان رەسپۋبليكاسىنىڭ قۇرمەتتى پروكۋراتۋرا قىزمەتكەرى» (2001) اتاعى بار, «ەرەن ەڭبەگى ءۇشىن» (2005) مەدالىمەن ماراپاتتالعان. ر.رۋدەنكو اتىنداعى سۆەردلوۆ زاڭ ينستيتۋتىن «قۇقىقتانۋ» ماماندىعى بويىنشا تامامداعان. 2012 جىلدىڭ ساۋىرىندە مەملەكەت باسشىسىنىڭ وكىمىمەن قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپ جونىندەگى كوميتەتىنىڭ ءتورايىمى بولىپ تاعايىندالدى. قۇقىق قورعاۋ جانە ارنايى ورگاندار اقپارات الماسۋ جۇيەسىن (قاو ااج), «ايقىن» وتىنىشتەر بەرۋ بارىسىنا باقىلاۋ جاساۋ جۇيەسىن ەنگىزدى. كاسىپكەرلەردى قورعاۋ جوباسى – «بيزنەس تىرەك» پورتالىنىڭ, سونداي-اق, «تەكسەرۋلەردى ەسەپكە الۋدىڭ ەلەكتروندى جۋرنالى» جانە «ە-جوسپار» تەكسەرۋلەردى ەلەكتروندى جوسپارلاۋ جۇيەسىنىڭ باستاماشىسى. ساۋلە بۇگىندە ەرىمەن بىرگە 2 قىز تاربيەلەپ وتىر. ەكاتەرينا سەرگەەۆنا موركوۆينا, «24 KZ» تەلەارناسىنىڭ پروديۋسەرى. «24 KZ» تەلەارناسىنىڭ ەڭ ۇزدىك جاس قىزمەتكەرلەرىنىڭ ءبىرى. ەكاتەرينا جاڭالىقتار ارناسىن, «الەم اپتا ىشىندە» باعدارلاماسىن جۇرگىزەدى. جۇمىستا جوعارى كاسىبيلىك دەڭگەيىمەن جانە بىلىكتىلىگىمەن ەرەكشەلەنەدى. ونىڭ ءحوببيى – سپورتتىق بال بيلەرى, يوگا, سۋدا ءجۇزۋ. تەلەجۇرگىزۋشى ءوز جۇمىسىن «Royal Dans club» بالالار شوۋ بالەتىنىڭ باپكەرى جانە جەتەكشىسى قىزمەتىمەن قوسا الىپ جۇرەدى. 15 جىل بويى سپورتتىق بال بيىمەن اينالىستى. بي سپورتى رەسپۋبليكالىق فەدەراتسياسى قۇرامىندا باپكەر جانە سپورتتىق بال ءبيى بويىنشا تورەشى بولدى. تۋنگالاگ بالجينيماەۆنا وسەلباەۆا, تسيرك ءارتىسى, ارىستان ۇيرەتۋشى. تۋنگالاگ – قازاقستانداعى ارىستان ۇيرەتۋشى بىردەن-ءبىر ايەل, استانا تسيركىندە جۇمىس ىستەيدى. بۋريات اۆتونوميالى رەسپۋبليكاسىندا تۋعان, بۋريات قىزى. جىرتقىشتاردى ۇيرەتۋشى بولا ءجۇرىپ ءوز نومىرلەرىمەن كوپتەگەن ەلدەردى ارالادى. 1991 جىلدان «التىن الما», ودان كەيىن الماتى مەملەكەتتىك تسيركىندە جۇمىس ىستەدى. قازاق تىلىندە تاماشا سويلەيدى, قازاق حالقىنىڭ سالت-داستۇرلەرىن جاقسى بىلەدى جانە قۇرمەتتەيدى. باحارگۇل تولەگەن, «ادەمى-اي plus» جشس پرەزيدەنتى. باحارگۇل باسقاراتىن كومپانيا قازاقستاننىڭ كادەسىي ونىمدەرى رىنوگىندا كوش باستاۋشىلاردىڭ ءبىرى بولىپ تابىلادى. 2011 جىلى «ادەمى-اي» الماتى جانە استانا قالالارىندا وتكەن XVII قىسقى ازيا ويىندارىنىڭ دەمەۋشىسى بولدى. باحارگۇلدىڭ ءحوببيى – ەجەلگى ۇلتتىق زەرگەرلىك بۇيىمداردى جيناۋ. ونىڭ جەكە كوللەكتسياسىندا ۇلتتىق بىرەگەي اشەكەيلەردىڭ مىڭنان استام ءتۇرى بار. جىل سايىن ونىڭ كورمەلەرىن قازاقستاندىقتار دا, سونداي-اق, شەتەلدىك تۋريستەر دە ۇلكەن قىزىعۋشىلىقپەن تاماشالايدى. ول رەسەيدە, ونىڭ ىشىندە قازاندا ستۋدەنتتەر ۋنيۆەرسياداسى وتكەن كۇندەرى, شۆەتسيادا, گەرمانيادا, تۇركيا مەن قىتايدا كورمەلەرىن تابىستى ۇيىمداستىردى. اۆتورلىق جۇمىس تۇرلەرى – ۇلتتىق كادەسىيلاردىڭ مىڭنان استامى پاتەنتتەلگەن. ونىڭ مىندەتى قازاق حالقىنىڭ ەجەلگى مادەني مۇراسىن قايتا جاڭعىرتۋ جانە جۇرتشىلىق نازارىنا ۇسىنۋ. وكسانا الەكسەەۆنا تەن, بەلگىلى قازاقستاندىق فيگۋريست, 2014 جىلعى سوچيدەگى وليمپيا ويىندارىنىڭ قولا جۇلدەگەرى دەنيس تەننىڭ اناسى. 1980-1993 جىلدارى قۇرمانعازى اتىنداعى مەملەكەتتىك كونسەرۆاتوريا جانىنداعى وپەرا ستۋدياسىنىڭ وركەسترىندە جۇمىس ىستەدى. 2013 جىلى سپورت جانە تۋريزم اكادەمياسىن ءتامامدادى. قازىرگى ۋاقىتتا ۇلى دەنيستىڭ سپورتتىق كارەراسىمەن اينالىسادى. تۇرمىس قۇرعان, 2 بالانىڭ اناسى. تامارا ۆيكتوروۆنا شيرمەر, «قازاقستان ۋكرايندارى راداسى» زتب رەسپۋبليكالىق بىرلەستىگى توراعاسىنىڭ ءبىرىنشى ورىنباسارى, استانا ق. «وبەرەگ» قوعامدىق بىرلەستىگىنىڭ ءتورايىمى. قازاقستان حالقى اسسامبلەياسىنىڭ مۇشەسى, قازاقستان حالقى اسسامبلەياسى «حالىقتىق ءىرو» باعدارلاماسىن جۇزەگە اسىرۋ ماسەلەلەرى جونىندەگى رەسپۋبليكالىق on-line قوعامدىق قابىلداۋ كوميسسياسىنىڭ جەتەكشىسى. 12 جىل بويعى قوعامدىق قىزمەتىندە تامارا ۆيكتوروۆنا قازاقستان مەن ۋكراينا تۋىستاس حالىقتار اراسىنداعى ءبىتىم مەن كەلىسىمدى نىعايتۋعا, ۋكرايندىقتاردىڭ ولاردىڭ تاريحي وتانىمەن بايلانىسىن دامىتۋعا ىقپال ەتە وتىرىپ, مەملەكەتتىك جانە جەرگىلىكتى ورگاندارمەن تىعىز بايلانىستا بەلسەندى جۇمىستار جۇرگىزىپ كەلەدى. ۋكراين ەتنوسى وكىلدەرىن قوعامدىق-ساياسي ومىرگە, قازاقستان پرەزيدەنتى العا قويعان مىندەتتەرگە قولداۋ كورسەتۋگە تارتۋدا تۇراقتى جۇمىستار جۇرگىزەدى. قازاقستان رەسپۋبليكاسى پرەزيدەنتىنىڭ قۇرمەت گراموتاسىمەن (2013 ج.), قازاقستان حالقى اسسامبلەياسى (2007 ج.), استانا قالاسى اكىمىنىڭ (2010 ج.) ۋكراينانىڭ قازاقستانداعى ەلشىلىگىنىڭ (2005, 2006, 2008, 2009, 2011, 2013 جج.) قۇرمەت گراموتالارىمەن ماراپاتتالعان. مايرا تاجىمۇقانقىزى امانوۆا, وندىرىستىك جابدىقتاردى جوندەۋ جانە پايدالانۋ جونىندەگى توكار. 25 جىلدان بەرى مۇناي سالاسىندا ەڭبەك ەتىپ كەلەدى. بۇگىندە «جىلىويمۇنايگاز» مۇناي-گاز ءوندىرۋ باسقارماسى قۇلسارى وندىرىستىك جابدىقتاردى جوندەۋ جانە پايدالانۋ تسەحىنىڭ توكارى بولىپ جۇمىس ىستەيدى. حالىق اراسىندا سالاماتتى ءومىر سالتىن ناسيحاتتايدى. ايەلدەر ۆولەيبول كومانداسىنىڭ كاپيتانى بولىپ تابىلادى. وڭىرلىك سپورت جارىستارىنىڭ بىرنەشە دۇركىن جۇلدەگەرى. كاسىپورىننىڭ قوعامدىق جانە مادەني وڭىرىنە بەلسەندى ارالاسادى, «قىزدار ءانسامبلى» توبىنىڭ ءانشىسى. 4 بالا تاربيەلەپ وتىرعان انا. ءمادينا قۋاندىققىزى باسپاەۆا, «استانا-وپەرا» تەاترىنىڭ جەتەكشى بالەت ءسوليسى, قازاقستاننىڭ ەڭبەك سىڭىرگەن قايراتكەرى. ك.بايسەيىتوۆا اتىنداعى ۇلتتىق وپەرا جانە بالەت تەاترىنىڭ پريما-بالەريناسى. ءىى حالىقارالىق بالەت ارتيستەرى بايقاۋىنىڭ گران-پري جۇلدەسىنىڭ يەگەرى. ەسىمى الەمگە ءمالىم حورەوگراف شارل ءجيۋدتىڭ شاقىرۋىمەن بوردو (فرانتسيا) ۇلتتىق وپەراسى ساحناسىندا دجۋلەتتا ءرولىن ورىندادى. دجۋلەتتا ءرولىن تۋعان تەاتر ساحناسىندا بيلەۋ وتە جاۋاپكەرشىلىك اكەلەدى دەپ اتاپ وتكەن بولاتىن, ءمادينا. ول «استانا-وپەرانىڭ» الەمدىك دەڭگەيدەگى تەاتر جانە قازاقستاننىڭ «برەندى» بولاتىنىنا سەنىمدى. ءمادينا ماراتقىزى ساۋىتبەكوۆا, «ورلەۋ» ەڭبەككە ورنالاستىرۋ اگەنتتىگىنىڭ ديرەكتورى. ءمادينا «ورلەۋ» ەڭبەككە ورنالاستىرۋ جونىندەگى الەۋمەتتىك جوباعا باستاماشى بولدى, سونىڭ ارقاسىندا 620-دان استام جۇمىسسىز اۋىلدىقتار بۇگىندە مەكتەپتەردە, قۇرىلىس كومپانيالارىندا, بانكتەردە جانە ونەركاسىپ كاسىپورىندارىندا جۇمىس ىستەيدى. م.ساۋىتبەكوۆا ەڭبەك جانە حالىقتى الەۋمەتتىك قورعاۋ مينيسترلىگىنىڭ «ۇزدىك الەۋمەتتىك قىزمەتكەر» قۇرمەت بەلگىسىمەن ماراپاتتالعان. جىگەرلى بيزنەسۆۋمەن سول سياقتى «موي رايون» گازەتىن شىعارادى. بۇگىندە ەرى ەكەۋى ەكى قىز تاربيەلەپ وتىر. الەنا اناتولەۆنا يۋماكۋلوۆا, كوكشەتاۋ قالاسىنداعى فيزيكا-ماتەماتيكا باعىتىنداعى نازارباەۆ زياتكەرلىك مەكتەبىنىڭ ءباسپاسوز حاتشىسى. سولتۇستىك قازاقستان مەملەكەتتىك ۋنيۆەرسيتەتىن «قازاق ءتىلى مەن ادەبيەتىنىڭ مۇعالىمى» ماماندىعى بويىنشا بىتىرگەن. اقمولا وبلىسى قازاقستان حالقى اسسامبلەياسىنىڭ مۇشەسى, اسسامبلەيا جانىنداعى مەملەكەتتىك ءتىلدى ناسيحاتتاۋ جانە دامىتۋ ورتالىعىنىڭ ءتورايىمى. «ماقساتىم – ءتىل ۇستارتىپ, ونەر شاشپاق» اتتى قالالىق جانە وبلىستىق اباي وقۋلارىندا جۇلدەلى ورىندار يەلەنگەن. 2011 جىلى وبلىس دەلەگاتتارى اتىنان «نۇر وتان» پارتياسىنىڭ XIV سەزىندە ءسوز سويلەدى. انار باتىرعازىقىزى بايمىرزاەۆا, جەمقورلىقپەن كۇرەس جونىندەگى ماتەماتيكالىق مودەلدى ازىرلەۋشى, ماگيسترانت. انار ازىرلەگەن جەمقورلىقپەن كۇرەس جونىندەگى ماتەماتيكالىق مودەل عىلىمي جۇمىستاردىڭ رەسپۋبليكالىق ستۋدەنتتىك بايقاۋىندا ۇزدىك دەپ تانىلدى. ول ءوزىنىڭ عىلىمي جوباسى قازىرگى زامانعى قوعامداعى قاتەرلى الەۋمەتتىك دەرتتەردىڭ بىرىمەن كۇرەستە ىقپال ەتۋگە كومەكتەسەدى دەپ ارماندايدى. قازىرگى ۋاقىتتا ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى (قارجى پوليتسياسى) مودەلدى بايقاپ كورۋگە مۇددەلىلىگى مەن دايىندىعىن ءبىلدىرىپ وتىر. انار 10 عىلىمي ماقالانىڭ اۆتورى, 4 ستۋدەنتتەردىڭ عىلىمي جۇمىستارى بايقاۋىنىڭ جەڭىمپازى. يننا سەرگەەۆنا اپەنكو, MIMIORIKI-ءدىڭ اتقارۋشى ديرەكتورى. MIMIORIKI – قازاقستانداعى ەڭ ءىرى كيىم شىعارۋشى Textiline كومپانياسى بالالار كيىمىنىڭ بولشەك ساۋدا برەندى. تەكستيلاين كومپانياسى Mimioriki برەندىمەن «حالىق ءۇشىن تاۋارلار شىعاراتىن ۇزدىك كاسىپورىن» نوميناتسياسىندا «ورتا كاسىپكەرلىك سۋبەكتىسى» كاتەگورياسى بويىنشا «التىن ساپا» پرەزيدەنت سىيلىعىنا يە بولدى. 2011 جىلى برەند «قازاقستانداعى فرانچايزينگ 2011» (الماتى) IV حالىقارالىق كورمەدە جىلدىڭ ۇزدىك فرانشيزى اتاعىن جەڭىپ الدى. كومپانيانىڭ دۇكەندەرى قازاقستاننىڭ 11 قالاسىندا, سونداي-اق, نوۆوكۋزنەتسك (رەسەي), كيەۆ پەن دونەتسكىدە (ۋكراينا) تابىستى جۇمىس ىستەۋدە. MIMIORIKI بالالار كيىمىنىڭ وندىرىستىك تسيكلى يدەيانىڭ ومىرگە كەلۋىنەن باستاپ دايىن ءونىم شىعارعانعا دەيىن Textiline كومپانياسىنىڭ التى فابريكاسىنىڭ ۇشەۋىندە – الماتى, تالعار جانە تەكەلى قالالارىندا جۇزەگە اسادى. جانارگۇل جانىسبەكقىزى قۇسمانعاليەۆا, ەۋرازيالىق ينتەگراتسيا ينستيتۋتىنىڭ ديرەكتورى. زاڭ عىلىمدارىنىڭ كانديداتى. 50-دەن استام عىلىمي ماقالالاردىڭ اۆتورى. پارلامەنت ءماجىلىسى اپپاراتىندا «نۇر وتان» پارتياسى پارلامەنتاريزم ينستيتۋتىنىڭ ديرەكتورى بولىپ جۇمىس ىستەدى. قازىرگى ۋاقىتتا «ەۋرازيالىق ينتەگراتسيا دامۋى» جوباسىنا باسشىلىق جاسايدى. سونداي-اق, بۇۇدب-نىڭ ۇلتتىق ساراپشىسى بولىپ تابىلادى. ءحوببيى – شاحمات, نارد ويناۋ. پوەزيانى سۇيەدى. تۇرمىس قۇرعان, ءبىر قىز تاربيەلەپ وتىر. گۇلجان يباتقىزى لۇقمانوۆا, اتىراۋ قالاسى ىشكى ىستەر باسقارماسى ميگراتسيالىق پوليتسيا ءبولىمىنىڭ باسشىسى. پوليتسيا پودپولكوۆنيگى. «ءىىم-دەگى ۇزدىك قىزمەتى ءۇشىن» ءتوس بەلگىسىمەن, «قازاقستان رەسپۋبليكاسى ىشكى ىسكەر ورگاندارىنداعى ءمىنسىز قىزمەتى ءۇشىن» مەدالىنىڭ ەكىنشى جانە ءۇشىنشى دارەجەسىمەن, «قازاقستان پوليتسياسىنا 20 جىل» مەرەكەلىك مەدالىمەن ماراپاتتالعان. گۇلجان لۇقمانوۆتاردىڭ وتباسىلىق اۋلەتىنىڭ وكىلى بولىپ تابىلادى. زاڭگەرلىكتى ءوز ماماندىعى رەتىندە تاڭداپ جانە ءوز اتاسىنىڭ ءىزىن باسىپ, ول 19 جىلدان بەرى قۇقىق قورعاۋ ورگاندارىندا ەڭبەك ەتىپ كەلەدى. ونىڭ وتباسىنىڭ قۇقىق قورعاۋ ورگاندارىنداعى جالپى ءوتىلى 100 جىلدى قۇرايدى. ونىڭ بالالارى دا وسى جۇيەدە جۇمىس ىستەيدى. بۇگىندە گۇلجان 4 بالا مەن 1 نەمەرە تاربيەلەپ وتىر. باقىتكۇل شامشاقىزى قۇرمانوۆا, «Korme-Expo» جشس-ءنىڭ باس ديرەكتورى. قازاقستان تاۋەلسىزدىگىنىڭ العاشقى ون جىلىندا الماتى قالاسى مەدەۋ اۋدانى اكىمدىگىندە جۇمىس ىستەدى, «دوستىق ءۇيى» ۋچاسكەسى بويىنشا سايلاۋ كومپانيالارىندا جاۋاپتى تۇلعا بولدى. 26 جىلدىق ەڭبەك ءوتىلى بانك, مەملەكەتتىك, جەكەمەنشىك جانە قوعامدىق, سونىڭ ىشىندە حالىقارالىق ەۋرازيالىق مەديا-فورۋم, قازاقستان رەسپۋبليكاسىنىڭ ساۋدا ونەركاسىپ پالاتاسىنداعى جۇمىستاردان تۇرادى. 2011 جىلدان ەلدىڭ كورمە سالاسىنىڭ ىرعاقتى دامۋىنىڭ اجىراماس بولىگى بولىپ تابىلاتىن «Korme-Expo» كورمە ورتالىعىن باسقارادى. ءۇش جىلدا ءتۇرلى دەڭگەيدەگى كورمەلەردىڭ جۇزگە تارتا اشىلۋ راسىمدەرىن ۇيىمداستىردى. تۇرمىس قۇرعان, ءۇش بالانىڭ اناسى. عازيزا اياتبەكقىزى دانلىباەۆا, ادامعا جاساندى تەرى جاساۋ جونىندەگى يننوۆاتسيالىق جوبانىڭ اۆتورى, قر بعم ۇلتتىق بيوتەحنولوگيالار ورتالىعى دىڭگەكتى جاسۋشالار زەرتحاناسىنىڭ جەتەكشى عىلىمي قىزمەتكەرى. «شاپاعات-2012» بايقاۋىندا اتالعان پاتەنت «جىل جاڭالىعى» نوميناتسياسىندا جەڭىمپاز اتاندى. 60-تان استام عىلىمي ماقالالاردىڭ, اۆتورلىق كۋالىكتەر مەن پاتەنتتەردىڭ اۆتورى, عىلىمي-زەرتتەۋشىلىك يننوۆاتسيالىق جوبالاردىڭ جەتەكشىسى, بيوتەحنولوگيا جانە بيومەديتسينا سالاسىنداعى تاۋەلسىز ساراپشى. قازىرگى ۋاقىتتا اەروزول تۇرىندەگى جاسۋشالىق تەحنولوگيا تراۆماتولوگيا جانە ورتوپەديا عزي-دا جانە رەسپۋبليكالىق شۇعىل مەديتسينالىق جاردەم ورتالىعىندا قازاقستاننىڭ 40 كۇيىك شالعان ناۋقاستارى ارقىلى سىناقتان ءوتىپ, سونىڭ ءناتيجەسىندە ناۋقاستار تابىستى ەمدەلىپ شىقتى. ماۆليۋدا ابدۋراشيتوۆنا شيرحانوۆا, ساعات شەبەرى, اۋلەتتىڭ ءۇشىنشى بۋىنىنداعى ساعاتشى. ماۆليۋدا ابدۋراشيتوۆنا – اۋلەتىمەن ساعات شەبەرلەرى بولعان وتباسىنىڭ وكىلى. ونىڭ اكەسى ءوزىنىڭ كاسىبي ومىرىندە ءبىر ميلليونعا جۋىق ساعاتتى جوندەپ شىعارعان. ماۆليۋدانىڭ ءوزى اۋلەت ءىسىن ءۇشىنشى بۋىندا جالعاستىرا وتىرىپ, الماتى قالاسىندا ساعات شەبەرى بولىپ جۇمىس ىستەيدى جانە ءوز ەسەبىندە 350 مىڭنان استام جوندەلگەن ساعات بار. ءتورتىنشى بۋىنداعى ۇلى مەن بەسىنشى بۋىنداعى نەمەرەسى اۋلەت ءىسىن جالعاستىرۋشىلار بولىپ تابىلادى. 3 بالاسى جانە 9 نەمەرەسى بار. پەريزات ۇمىكساتقىزى جولداسوۆا, جۇرگەنوۆ اتىنداعى قازاق ۇلتتىق اكادەمياسىنىڭ 3-كۋرس ستۋدەنتى. 2000 جىلى پەريزات ەلباسىنىڭ اقتاۋ قالاسىنا ساپارى كەزىندە ەل پرەزيدەنتى ءۇشىن ءان شىرقاپ بەردى. پەريزات 5 جاسىنان باستاپ ساحنادا كەلەدى. «ءانشى بالاپاننىڭ» لاۋرەاتى بولعان. 8 جاسىندا ول ءوزىنىڭ العاشقى اندەر جيناعىن شىعاردى. 13 جاسىندا الماتى قالاسىندا ءبىرىنشى جەكە كونتسەرتىن بەردى. «ۇزدىك ءانشى», «ۇزدىك ءان» نوميناتسيالارىنىڭ يەگەرى. «بالا تىلەگى» اۆتورلىق ءانى «ءوزىن ءوزى تانۋ» ءپانى بويىنشا 2-سىنىپتىڭ مەكتەپ باعدارلاماسىنا ەندى. 4 بەينەبايان شىعارعان, قازىرگى ۋاقىتتا جاڭا بەينەبايان شىعارۋ جولىندا تالپىنىس جاساپ ءجۇر. ساليدات زەكەنقىزى قايىربەكوۆا, قازاقستان رەسپۋبليكاسىنىڭ دەنساۋلىق ساقتاۋ ءمينيسترى. ساليدات قايىربەكوۆانىڭ ەڭبەك جولى مەديتسينا ۇيىمدارىنداعى دارىگەر نەۆروپاتولوگ, كەيىن وڭىرلىك جانە رەسپۋبليكالىق دەڭگەيدەگى باسشىلىق لاۋازىمداردان باستالادى. قازاقستان رەسپۋبليكاسى پرەزيدەنتىنىڭ اكىمشىلىگىندە جۇمىس ىستەدى. دەنساۋلىق ساقتاۋ مينيسترلىگىنىڭ مەديتسينالىق قىزمەت كورسەتۋ سالاسىنا باقىلاۋ جاساۋ كوميتەتىن جانە مەديتسينالىق قىزمەتتەرگە اقى تولەۋ كوميتەتىن باسقاردى, كەيىن ۆيتسە-مينيستر بولدى. ونىڭ باسشىلىعىمەن بىرەگەي ۇلتتىق دەنساۋلىق ساقتاۋ جۇيەسى ەنگىزىلدى, ستاتسيوناردى الماستىراتىن مەديتسينالىق جاردەمدى دامىتۋ ەسەبىنەن مەديتسينالىق جاردەمنىڭ قولجەتىمدىلىگى قامتاماسىز ەتىلدى. قازىرگى ۋاقىتتا اقپاراتتىق دەنساۋلىق ساقتاۋ جانە مەملەكەت-جەكەمەنشىك كاسىپكەرلىگىنىڭ بىرەگەي جۇيەسى ەنگىزىلۋدە. 2010 جىلى مينيستر بولىپ تاعايىندالدى. «قۇرمەت» وردەنىمەن ماراپاتتالعان. نۇرگۇل ناعاشىبايقىزى مۇساەۆا, كوپبالالى انا. كۇيەۋى بينار ەكەۋى 7 بالا تاربيەلەپ وتىر. نۇرگۇل «كۇمىس القا» يەگەرى, «التىن القامەن» ماراپاتتاۋعا ۇسىنىلعان. ول 12 بالا تاربيەلەپ وسىرگەن كۇيەۋىنىڭ اناسىنا زور قۇرمەتپەن قارايدى. نۇرگۇلدىڭ ءوزى دە وعان ۇقساۋدى ارماندايدى. ءۇش بالاسى بۇگىندە جوو-دا ءبىلىم الىپ ءجۇر. كىشكەنتاي باقىتجان «دومبىرا» سىنىبى بويىنشا مۋزىكا مەكتەبىن تابىستى ءتامامدادى. بالالارىنىڭ ەڭ كىشىسى – ءبىر جارىم جاستا.