اردان اتتاپ, يماندى تاستاپ, ارامدىقپەن مال تاباتىن ز ۇلىم سىبايلاس جەمقورلاردى قۇرىقتايتىن قۇرىعى ۇزىن قۇقىق قورعاۋ ورگاندارى ەلىمىزدە كوپ ەمەس. سونىڭ سالدارىنان با سىبايلاس سۇمىرايلار ەلدىڭ اقشاسىن, بيۋدجەتتىڭ قارجىسىن, ادال ادامداردىڭ ناپاقاسىن تالان-تاراجعا سالۋعا كەلگەندە زاڭعا دا, تارتىپكە دە مويىن بۇرمايدى. بيلىكتەگى لاۋازىمىن پايدالانىپ, ءوزى سەكىلدى جوعارى تۇرعانداردىڭ اۋزىن مايلاپ, ال قالتانى تولتىرۋ ءۇشىن تومەندەگىلەردى تاباعا قۋىرىپ, نامىستى تاپتاپ جۇرە بەرەدى. الايدا, ولاردىڭ قارا نيەتتەرى ارقاشان ورىندالا بەرمەيتىنى انىق. ويتكەنى, اققا قۇداي جاق دەگەندەي, جابىرلەنگەندەردى سىبايلاستاردىڭ سويىلىنان ساقتاپ قالا الاتىن ادال ادامدار دا بارشىلىق. ولار – ادىلدىك ءۇشىن كۇرەسۋشى جاندار. ارينە, ولار تۋرالى وتە كوپ ايتۋعا جانە جىلى ءىلتيپات قانا بىلدىرۋگە بولادى. بىراق سىبايلاسقان جانداردىڭ دا وسال ادامدار ەمەس ەكەنىن ەسكەرسەك, وندايلارمەن كۇرەسۋدىڭ ءوزى قانشالىقتى كۇردەلى دە, قاتەرلى ەكەنى تۇسىنىكتى بولادى. سەبەبى, مەملەكەتتىڭ اقشاسىن جىمقىرۋ ءۇشىن قولدا جوعارى لاۋازىم جانە سوعان ساي اۋىز جالاسقان بىرمۇددەلى ەكى ءجۇزدى جاندار سىبايلاس بولۋى كەرەك. ال مۇندايلاردىڭ جەگەنىن جەلكەسىنەن شىعارۋ ءۇشىن ادالدىق, ادىلدىك كەرەك دەپ زاڭعا ساي كۇرەسىپ كورىڭىز! قانداي توسقاۋىلعا ۇشىرار ەكەنسىز. دەمەك, ءارى ءوز ءىسىن بىلەتىن, جۇرەگى ەلىم دەپ سوعاتىن, زاڭدى قاتاڭ ساقتايتىن جانە ونى بۇزعانداردى قورىقپاي جازالاي الاتىن باتىل دا بىلىكتى ماماندار قاجەت. مىنە, ءبىز بۇگىن سولاردىڭ بىرنەشەۋىن حالىققا تانىستىرۋدى ءجون كوردىك. ارينە, بۇلار ادەتتەگىدەي ەكى باستى جالماۋىز ايداھارلارمەن كۇرەسۋشى الىپ تۇلعالى ەرلەر ەمەس, بىراق سول ەرلەردىڭ ءىسىن اسىرا تىندىرا الاتىن نازىك جاندى ايەلدەر.
بۇل ورايدا بىرەۋلەر: «ايەل يىعىنداعى پوگون – بۇل ايەلدەردىڭ قولىنان كەلەتىن ءىس ەمەس» دەگەندى ايتادى. الايدا, تاجىريبە كورسەتىپ وتىرعانداي, تەك پوگوندى قىز-كەلىنشەكتەر عانا ءوزىنىڭ جەدەلدىگى مەن شىدامدىلىعى ارقاسىندا قاۋىپتى جاعدايدا تەز ارادا كومەك كورسەتە الادى ەكەن. بۇل ورايدا قارجى پوليتسياسىنىڭ ايەل-قىزمەتكەرلەرى اسا ەرەكشە تانىستىرۋدى قاجەت ەتپەيدى. ولار – ەڭبەكتە جانە قوعام ومىرىندە بەلسەندى ءارى وتباسىندا اياۋلى ارۋلار. جۇمىستىڭ اۋىرلىعىنا قاراماستان, كوتەرىڭكى كوڭىل-كۇيدە جۇرەدى. ماسەلەن, قارجى پوليتسياسىندا قىزمەت ەتۋ اگەنتتىكتىڭ تەرگەۋ دەپارتامەنتى باسقارماسى باستىعىنىڭ ورىنباسارى وكسانا راحمەتۋلاەۆانىڭ مىنەز-قۇلقىنا تيتتەي دە كەرى ىقپال ەتە المادى. ول – مەيىرىمدى, اقكوڭىل ادام. 15 جىلدان اسا ءوزىنىڭ كۇش-قۋاتى مەن ءبىلىمىن قارجى پوليتسياسىنا ارناۋدا. 2013 جىلعى جەلتوقساندا باسقارما باستىعىنىڭ ورىنباسارى لاۋازىمىنا كوتەرىلدى. ول بارلىق ايەلدەر سياقتى ماحاببات پەن تۇسىنىستىكتە تاتۋ-ءتاتتى ءومىر ءسۇرىپ, وركەندەۋ مەن ورىندالعان ۇمىتىنە ءدان ريزا.
ال اگەنتتىكتىڭ كادرلار باسقارماسى ءبولىمىنىڭ باستىعى ەلميرا وماروۆانى قارجى پوليتسياسىنىڭ بارلىق قىزمەتكەرى بىلەدى. ءوزىنىڭ جۇكتەلگەن اۋىر قىزمەتىنە قاراماستان بارلىعىن اتقارىپ ۇلگەرەدى. ادەبيەتتەگى جاڭالىقتاردى قالت جىبەرمەيدى, وتباسىنا دا ۋاقىت تابادى. بىرنەشە مارتە اگەنتتىك باسشىلىعى تاراپىنان ماراپاتتالدى, «قازاقستان رەسپۋبليكاسى تاۋەلسىزدىگىنە 20 جىل» مەرەيتويلىق مەدالىمەن, «ءمىنسىز قىزمەتى ءۇشىن» مەدالىمەن ناگرادتالدى.
گۇلنار قۇسايىنوۆا قۇقىق قورعاۋ ورگاندارى قاتارىندا 17 جىلدان استام قىزمەت ەتۋدە. بۇل تالعامپاز جانە نازىك جان ۇلگى كورسەتۋگە تۇرارلىق ادام – ءاردايىم جيناقى, جارقىن ءجۇزدى, قىزمەتتىك ۇجىمىن ۇتىمدى باسقارا الادى. كاسىپقويلىعى مەن سۇيىكتى ىسىنە دەگەن قايتارىمدىلىعىمەن تاڭعالدىرادى. اتاق ءۇشىن ەمەس, جۇرەك قالاۋى بويىنشا قىزمەت ەتەدى, بارلىق جان-تانىمەن جۇمىسىنا بەرىلە وتىرىپ, سۇيىكتى ماماندىعى مەن جانۇياسىنا دەگەن قامقورلىعىن بىرىكتىرە بىلەدى.
گۇلنار ىسمايىلوۆا جيىرما جىلدان اسا قۇقىق قورعاۋ ورگاندارىندا قىزمەت ەتۋدە. ونى قىزمەتتە تاپسىرىلعان ىسكە دەگەن جاۋاپكەرشىلىگى, كاسىبيلىگى, ەڭبەكقورلىق پەن ءتارتىپ سۇيگىشتىگى دارالاپ تۇرادى. گۇلنار قامقورشى جار جانە سۇيىكتى انا.
سول سياقتى تاعى ءبىر گۇلنار ءالىحانوۆا – قارجى پوليتسياسىنىڭ پولكوۆنيگى, قۇقىق قورعاۋ ورگاندارىندا جيىرما بەس جىلدان استام ۋاقىت قىزمەت ەتەدى, تاجىريبەلى قىزمەتكەردىڭ ءبىرى. ول قاراعاندى وبلىسى بويىنشا ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتىنىڭ ەسەپكە الۋ جانە تالداۋ باسقارماسىنىڭ ءبولىم باستىعى.
الماگۇل مۇسىلمانبەكوۆا – پودپولكوۆنيك, قارجى پوليتسياسى ورگاندارىندا 1998 جىلدىڭ شىلدەسىنەن باستاپ قىزمەت ەتەدى. قازىرگى ۋاقىتتا قاراعاندى وبلىسى بويىنشا دەپارتامەنتىندە جوسپارلاۋ جانە باقىلاۋ ءبولىمىنىڭ باستىعى بولىپ جۇمىس ءىستەيدى. الماگۇل ءوز مىندەتىن ادال اتقارعانى ءۇشىن بىرنەشە رەت ماراپاتتالدى.
بۇعان قوسا وزدەرىنىڭ مول ومىرلىك تاجىريبەلەرىمەن ءبولىسىپ, قىزمەتكەرلەردى مىندەتتەرىن ادال اتقارۋعا ۇيرەتكەن ارداگەر ايەلدەر – بۇگىنگى كۇنى زەينەتكەرلەر. جۇمىستىڭ قيىندىعىنا مويىماي, قىزىعىنا تويماي ەڭبەك ەتكەن ارداگەر ايەلدەرىمىز قارجى پوليتسەيى بولىپ قىزمەت ەتكەندەرىن ماقتانىش ەتەدى. ماسەلەن, باقىت جۇماسانوۆا – پولكوۆنيك. باقىت قۇقىق قورعاۋ ورگاندارىندا 25 جىلدان استام ۋاقىت جۇمىس ىستەيدى. ول قارجى پوليتسياسى ورگاندارىنىڭ ەڭ ءتاجىريبەلى كادر قىزمەتكەرىنىڭ ءبىرى.
نۇرزادا جاسبۇلعانوۆا – پودپولكوۆنيك, قارجى پوليتسياسى ورگاندارىندا اقتوبە وبلىسى بويىنشا دەپارتامەنتتىڭ كادرلار ءبولىمىن باسقارعان. الايدا, كوپ جىلعى جۇمىس تاجىريبەسى بارلىق ۋاقىتىن تەك وتباسىنا ارناۋعا مۇمكىندىك بەرمەيدى. نۇرزادا ارداگەرلەر ۇيىمىنىڭ قۇرىلۋ كەزەڭىندە فيليالدىڭ قاجەتتى زاڭ جانە بانك قۇجاتتارىن جەكە ءوزى رەسىمدەگەن. قازىرگى ۋاقىتتا فيليال مەن «نۇر وتان» پارتياسىنىڭ قۇجاتتاماسىن جۇرگىزەدى.
قارعاش جارلىعاقوۆا – پودپولكوۆنيك, قارجى پوليتسياسى ورگاندارىندا قۇرىلعان كۇنىنەن باستاپ جۇمىس ىستەيدى. ون ءتورت جىلدان استام شىعىس قازاقستان وبلىسى بويىنشا دەپارتامەنتتىڭ زايسان ايماعى بويىنشا ايماقارالىق قارجى پوليتسياسى باسقارماسىندا قىزمەت ەتتى. ەڭبەك سىڭىرگەن جىلدارى ءۇشىن دەمالىستا بولا تۇرا, ارداگەرلەر ۇيىمىنىڭ قوعامدىق ومىرىنە بەلسەنە ارالاسادى, جۇمىس تاجىريبەسىمەن بولىسە وتىرىپ, جاس قىزمەتكەرلەرگە قولدان كەلگەن كومەگىن كورسەتەدى.
باقىتجان الپەيىسوۆا – پودپولكوۆنيك, قارجى پوليتسياسى ورگاندارىندا 2001 جىلدىڭ ساۋىرىنەن باستاپ 25 جىلدان استام ۋاقىت جۇمىس اتقارۋدا. بۇرىن ىشكى ءىستەر ورگاندارىندا قىزمەت ەتكەن. قاراعاندى وبلىسى بويىنشا دەپارتامەنتتىڭ تەرگەۋ باسقارماسىنىڭ اسا ماڭىزدى ىستەر جونىندەگى اعا ينسپەكتور لاۋازىمىنان زەينەتكەرلىككە شىقتى.
جۇماگۇل نارىمبەتوۆا قارجى پوليتسياسى ورگاندارىندا قۇرىلعان كەزىنەن باستاپ 14 جىلدان استام ۋاقىت قىزمەت اتقاردى. قۇقىق قورعاۋ ورگاندارىندا 25 جىلدان استام جۇمىس ىستەدى. قىزمەت ەتۋ كەزىندە ءوزىن ەڭبەكقور, الدىنا قويعان ماقساتتارىنا جەتە بىلەتىن قىزمەتكەر رەتىندە كورسەتە ءبىلدى.
ارۋلار العان اسۋلار جالعاسا بەرەدى.
الەكساندر تاسبولاتوۆ,
«ەگەمەن قازاقستان».