وسى جىلدىڭ تامىز جانە جەلتوقسان ايلارىندا ساباقتار speaking club (سويلەسۋ كلۋبى) فورماتىندا وتكىزىلدى.
بۇل تۇركيا, رەسەي, اقش, ۇلىبريتانيا, بەلگيا, گەرمانيا, فرانتسيا, يران, قىرعىزستان, ۋكراينا, موڭعوليا جانە بەلارۋستەگى قازاق دياسپورالارىنىڭ 1 391 وكىلىنە 780 ونلاين ساباق وتكىزۋگە مۇمكىندىك بەردى. 336 قاتىسۋشىعا سەرتيفيكات بەرىلدى.
سونىمەن بىرگە قازاق ءتىلىن ءوز بەتىنشە ۇيرەنۋ مۇمكىندىكتەرىن جاساۋ ماقساتىندا 30 ونلاين-ساباق YouTube-تە شىعارىلدى.
بيىل قانداستارمەن مادەني-گۋمانيتارلىق بايلانىستاردى نىعايتۋعا, قازاق حالقىنىڭ مادەني مۇراسىن ىلگەرىلەتۋگە باعىتتالعان باسقا دا ماڭىزدى شارالار ىسكە اسىرىلۋدا. ەستەرىڭىزگە سالا كەتەيىك, بيىل قىرعىز رەسپۋبليكاسىنىڭ استاناسىندا «Abai üiı» مادەني-ىسكەرلىك ءۇيى اشىلدى. وسىلايشا, مادەني-ىسكەرلىك ۇيلەر جۇمىس ىستەيتىن ەلدەر سانى 6-عا جەتتى: تۇركيا, گەرمانيا, ۋكراينا, رەسەي, وزبەكستان جانە قىرعىزستان.
قازاقستان تاۋەلسىزدىگىنىڭ 30 جىلدىعىنا وراي قر اقدم, قر ءسىم قولداۋىمەن «وتانداستار قورى» مەن دۇنيەجۇزى قازاقتارى قاۋىمداستىعى ۇيىمداستىرعان قازاقتاردىڭ كىشى قۇرىلتايى ەرەكشە ماڭىزدى بولدى. كىشى قۇرىلتاي وسى جىلدىڭ قىركۇيەك ايىندا ىستامبۇلدا ءوتتى.
سونداي-اق اعىمداعى جىلى قازاقستان-نەمىس دوستىعى قاۋىمداستىعىمەن جانە جاپونياداعى قازاقتار قاۋىمداستىعىمەن ىنتىماقتاستىقتى دامىتۋ بويىنشا 2 مەموراندۋمعا قول قويىلدى.
قازاق مادەني ورتالىقتارىمەن, قازاق قاۋىمداستىقتارىمەن, شەت ەلدەردەگى قر مەكەمەلەرىمەن مادەني-گۋمانيتارلىق جانە ىسكەرلىك بايلانىستاردى دامىتۋ جانە كەڭەيتۋ ماقساتىندا 2021 جىلى الەمنىڭ 20 ەلىنەن 4 500-دەن استام وتانداستىڭ قاتىسۋىمەن 15 ءىس-شارا, 20 كەزدەسۋ, 4 كونفەرەنتسيا, 4 ونلاين-وفلاين جوبا وتكىزىلدى.