دەنساۋلىق ساقتاۋ مينيسترلىگى قازاقستاندىقتارعا «سپۋتنيك لايت» ۆاكتسيناسى قاشان قولجەتىمدى بولاتىنىن ايتتى, دەپ حابارلايدى Egemen.kz.
دەنساۋلىق ساقتاۋ مينيسترلىگى حابارلاعانداي, بۇگىندە قازاقستاندىقتار QazVac پەن Sinopharm پرەپاراتتارىمەن رەۆاكتسيناتسيادان وتە الادى.
«بۇگىندە قازاقستانعا «سپۋتنيك لايت» ۆاكتسيناسىن جەتكىزۋ بويىنشا كەلىسسوزدەر جۇرگىزىلۋدە. «سپۋتنيك لايت» - رەۆاكتسيناتسيا ءۇشىن پايدالانىلاتىن ءبىر كومپونەنتتى ۆاكتسينا», دەپ ءتۇسىندىردى قر دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا.
ايجان ەسماعامبەتوۆا ۆاكتسينانى جەتكىزۋدىڭ جوسپارلانعان مەرزىمىن اتادى.
«وپتيميستىك بولجاممەن جەلتوقسان ايىنىڭ سوڭىنا دەيىن اتالعان ۆاكتسينانىڭ العاشقى پارتياسى كەلۋى مۇمكىن دەپ ويلايمىز. مۇنىڭ ءبارى بىزگە بايلانىستى ەمەس ەكەنىن ايتقىم كەلەدى. قازىرگى ۋاقىتتا الەم بويىنشا ۆاكتسيناعا دەگەن قاجەتتىلىك جوعارى. ونىڭ ۇستىنە كوپتەگەن ەلدەر رەۆاكتسيناتسيانى شۇعىل تۇردە باستايدى. تيىسىنشە, ۆاكتسيناعا قاجەتتىلىك ارتىپ كەلەدى. سوندىقتان دەنساۋلىق ساقتاۋ مينيسترلىگى ءارتۇرلى ۆاكتسينا جەتكىزۋشىلەرمەن كەلىسسوزدەردى جالعاستىرۋدا», دەدى كوميتەت توراعاسى.