سەناتتىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسىندا دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءولىم جازاسىن جويۋ ماسەلەسى بويىنشا وزگەرىستەر مەن تولىقتىرۋ ەنگىزۋ تۋرالى» زاڭ جوباسىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.
بيىلعى 16 قاراشادا مەملەكەت باسشىسى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ وتىرىسىندا قازاقستاندا ءولىم جازاسىن تولىعىمەن الىپ تاستاۋ كەرەكتىگىن ايتقان بولاتىن. وسىعان بايلانىستى زاڭ جوباسىندا ءولىم جازاسى تۇرىندەگى جازانى الىپ تاستاۋ جونىندە تۇزەتۋلەر كوزدەلىپ وتىر.
قۇجات ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىنا سايكەس ازىرلەندى. ەندى ەلىمىزدىڭ زاڭناماسىنداعى ءولىم جازاسى تۇرىندەگى, ونىڭ ىشىندە سوعىس ۋاقىتىندا جاسالعان اسكەري سيپاتتاعى اسا اۋىر قىلمىستارعا جازانى تولىقتاي الىپ تاستاۋ ۇسىنىلدى.
سەناتورلار كوميتەت وتىرىسى بارىسىندا ەلىمىزدە ءولىم جازاسىنىڭ تولىق جويىلۋى – ادام قۇقىقتارىن قامتاماسىز ەتۋگە جانە كونستيتۋتسيالىق ەڭ جوعارى قۇندىلىق – ءومىر ءسۇرۋ قۇقىعىنا كەپىلدىك بەرۋگە ىقپال ەتەتىنىن اتاپ ءوتتى.