قر تاۋەلسىزدىگىنىڭ 30 جىلدىعىنا وراي شىمكەنت قالاسىندا «الاش ارىستارى» ەسكەرتكىشىنىڭ سالتاناتى اشىلۋ ءراسىمى ءوتتى. جيىنعا قالا اكىمى مۇرات ايتەنوۆ, ءماسليحات حاتشىسى ب.نارىمبەتوۆ, قالالىق ارداگەرلەر كەڭەسىنىڭ توراعاسى كەنجەحان تولەباەۆ, «الاش ارىستارى» ەسكەرتكىشىنىڭ يدەيا اۆتورى بەكەت تۇرعاراەۆ, حالىقارالىق «الاش» سىيلىعىنىڭ يەگەرى مارحابات بايعۇت, كورنەكتى اقىن ءحانبيبى ەسەنقاراقىزى جانە تاعى باسقا زيالى قاۋىم وكىلدەرى قاتىستى, دەپ حابارلايدى Egemen.kz.
قالا اكىمى كوپشىلىكتى ەسكەرتكىشتىڭ اشىلۋىمەن قۇتتىقتاپ, ءىس-شارانىڭ ماڭىزدىلىعىنا توقتالدى.- كۇنى كەشە وتانداستارىمىز ەل تاۋەلسىزدىگىنىڭ 30 جىلدىق مەرەكەسىن ءسان-سالتاناتىمەن اتاپ ءوتتى. بولاشاعىن باياندى ەتكەن مەملەكەت, ءوز تاريحىن ايرىقشا قاستەرلەپ, دارا تۇلعالارىن, ەل بولىپ ەڭسە كوتەرۋگە قىزمەت ەتكەن اسىل ازاماتتارىن ەرەكشە قۇرمەتكە بولەيدى. ۋاقىت وزعان سايىن ۇلت ازاتتىعى ءۇشىن ايانباي كۇرەسكەن الاش قايراتكەرلەرىنىڭ دانالىعىن, دارالىعىن, كەمەڭگەرلىگىن ايقىن سەزىنىپ كەلەمىز. ولاردىڭ ءومىر جولى ءبىز ءۇشىن, بولاشاق ۇرپاق ءۇشىن – تاعىلىم الار تاربيە. مۇنداي كەشەندەر – جاستارىمىزدى وتانشىلدىققا تاربيەلەپ, ءوز ەلىنە, جەرىنە, وتكەنى مەن بولاشاعىنا دەگەن سىي-قۇرمەتتى قالىپتاستىرۋ قۇرالى دەپ بىلەمىز, دەدى قالا اكىمى.
كومپوزيتسيالىق ءمۇسىن شىمكەنت قالاسىنىڭ ورتالىق ساياباعى اۋماعىندا ورنالاسقان. تۇعىر گرانيتپەن قاپتالعان. مۇسىندەردىڭ بيىكتىگى - ورتاشا ەسەپپەن 210 سم. تۇعىردىڭ ۇزىندىعى - شامامەن التى مەتر, ەنى - شامامەن ءۇش مەتر.
جينالعاندار كومپوزيتسيالىق مۇسىنگە گۇل شوقتارىن قويدى.