ماناش قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ پروفەسسورى, بەلگىلى ابىلايتانۋشى زارقىن تايشىباي تاۋەلسىزدىكتىڭ 30 جىلدىعىنا ارناپ «ابىلاي حان تاريحى» اتتى 3 تومدىق جيناق شىعاردى, دەپ حابارلايدى Egemen.kz.
وندا ۇلى حانعا قاتىستى رەسەي ارحيۆتەرى مەن قازاقستان قالالارىنداعى حانعا قاتىستى ارحيۆ ماتەريالدارى توپتاستىرىلعان. بۇل – عالىمنىڭ كوپ جىلدىق ەڭبەگىنىڭ ناتيجەسى. بولاشاق ابىلايتانۋشىلار ارحيۆ شاڭدارىن جۇتپاي, ءبىر كىتاپقا شوعىرلاندىرىلعان حانعا قاتىستى مالىمەتتەردى وسى جيناقتان تابا الادى.
بۇگىن قىزىلجار قالاسىنداعى ەڭ ۇلكەن مادەنيەت ورنى سانالاتىن جاسوسپىرىمدەر سارايىندا كىتاپتىڭ تۇساۋكەسەر ءراسىمى بولىپ ءوتتى. ونى ۋنيۆەرسيتەت رەكتورى ەرلان شولانوۆ اشىپ جۇرگىزىپ وتىردى. وبلىس اكىمىنىڭ ورىنباسارى عاني نىعمەتوۆ وبلىس اكىمىنىڭ قۇتتىقتاۋ حاتىن وقىدى جانە ەڭبەكتىڭ ماڭىزدىلىعىنا توقتالىپ ءوتتى.
«مىڭنان ارتىق قۇجاتتىڭ باسىن قۇراعان ەڭبەكتىڭ تانىمدىق ماڭىزى اسا زور بولماق. ولار ۇلى حانىمىزدى بۇگىنگى جانە بولاشاق ۇرپاققا جان-جاقتى تانىتادى», دەدى ول ءوزىنىڭ سوزىندە. ەڭبەكتىڭ ماڭىزدىلىعى جونىندە سقۋ رەكتورىنىڭ كەڭەسشىسى, تاريح عىلىمدارىنىڭ دوكتورى اقمارال ىبىراەۆا, وبلىستىق ءارحيۆتىڭ ديرەكتورى ساۋلە مالىكوۆا, تاريح عىلىمدارىنىڭ كانديداتى ساۋلە قارتوۆا, «رۋحاني جاڭعىرۋ» زەرتتەۋ ينستيتۋتىنىڭ باسشىسى گۇلنال احمەتجانوۆا جانە وزگەلەر ايتىپ ءوتتى.
كىتاپتىڭ تۇساۋىن وبلىس اكىمىنىڭ ورىنباسارى عاني نىعمەتوۆ, وبلىسقا بەلگىلى ازاماتتار قۇدايبەرگەن قاليەۆ, جومارت وماروۆ, ناعاشىباي بارلىباەۆ, كەمەل وسپانوۆ كەستى.
قىزىلجار