قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆتىڭ فينليانديا پارلامەنتىنىڭ سپيكەرى ەەرو حەينيالۋومامەن كەزدەسۋى بولىپ ءوتتى. كەزدەسۋ بارىسىندا تاراپتار ساياسي, ەكونوميكالىق, الەۋمەتتىك, مادەني-گۋمانيتارلىق جانە باسقا دا سالالارداعى ەكىجاقتى ىنتىماقتاستىقتىڭ دامۋ بولاشاعىن, سونىمەن قاتار, بىرقاتار حالىقارالىق كۇن تارتىبىندەگى ماسەلەلەردى تالقىعا سالدى.
ەكى ەل اراسىنداعى سوڭعى جىلدارداعى قارىم-قاتىناس بەلسەندى بولا تۇسكەنى اتاپ ءوتىلدى. بۇل بارلىق دەڭگەيلەردەگى ءوزارا ساپار الماسۋ جيىلىگىنەن دە بايقالادى. 2013 جىلعى ساۋىردە فينليانديا پرەزيدەنتى س.ءنينيستيونىڭ قازاقستانعا ساپارى بولىپ ءوتتى. ونىڭ بارىسىندا ساياسي جانە ەكونوميكالىق سالالارداعى ماڭىزدى كەلىسىمدەرگە قول جەتكىزىلدى, بولاشاقتاعى ەكىجاقتى ىنتىماقتاستىقتىڭ باسىم باعىتتارى ايقىندالىپ, قازاقستان-فينليانديا قارىم-قاتىناسىنىڭ نەگىزگى سالالارىن رەتتەيتىن ايتارلىقتاي اۋقىمدى قۇجاتتار توپتاماسىنا قول قويىلدى.
پارلامەنتارالىق بايلانىستاردى بەلسەندىلەندىرۋگە توقتالا كەلە, ە.ىدىرىسوۆ پارلامەنتارالىق دەڭگەيدەگى ساپار الماسۋلار ءبىزدىڭ ەلدەرىمىز اراسىنداعى ساياسي ۇنقاتىسۋدى دامىتۋدا ايتارلىقتاي ماڭىزعا يە ەكەنىن اتاپ ءوتتى. «فين پارلامەنتشىلەرىنىڭ قىزمەتى, ولاردىڭ زاڭنامالىق جوبالارمەن, اسىرەسە, يننوۆاتسيالىق دامۋ, ءبىلىم بەرۋ جۇيەسىن جەتىلدىرۋ, ەكونوميكاعا «ەكولوگيالىق» ۇستانىم سالالارىنداعى جۇمىس ىستەۋ تاجىريبەسى جانە جالپى مەملەكەت پەن ازاماتتىق قوعامدى جاڭعىرتۋداعى تاجىريبەسى قازاقستان ءۇشىن پايدالى بولۋى مۇمكىن», دەدى مينيستر.
سونىمەن قوسا, ەكونوميكا سالاسىنداعى ىنتىماقتاستىق بەلسەندى سيپات العانى اتاپ ءوتىلدى. قازاقستان مەن فينليانديا اراسىنداعى ءوزارا ساۋدا كورسەتكىشى 2013 جىلى 916,5 ملن. اقش دوللارىنا دەيىن ۇلعايدى. وسى ورايدا قازاقستان مەن فينليانديا اراسىنداعى ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيا ءرولىنىڭ ەرەكشەلىگى اتالدى.
سونداي-اق, تاراپتار تۋريزم, يننوۆاتسيا جانە ەنەرگيا ۇنەمدەۋشى تەحنولوگيالار سالالارىنداعى ءوزارا ىقپالداستىق ماسەلەلەرىن دە نازاردان تىس قالدىرمادى. ساۋدا مەن تۋريزمنىڭ دامۋ سەرپىلىسىنە بايلانىستى ءبىزدىڭ ەلدەرىمىز اراسىندا تىكەلەي اۋە قاتىناسىن اشۋدىڭ وبەكتيۆتى قاجەتتىلىگى تۋىنداپ وتىرعاندىعىنا نازار اۋدارىلدى.
كەزدەسۋ بارىسىندا تاراپتار كوپجاقتى ينستيتۋتتار اياسىنداعى ءوزارا ىنتىماقتاستىق ماسەلەلەرىن دە قاراستىردى. حالىقارالىق ماسەلەلەردىڭ نەگىزگىلەرى بويىنشا ۇستانىمدار جاقىندىعى, سونىمەن قاتار, ەكى ەلدىڭ تەڭگەرىمدى سىرتقى ساياساتى اتاپ ءوتىلدى.
«ەگەمەن-اقپارات».