«Bazis-A» كورپوراتسياسى ديرەكتورلار كەڭەسىنىڭ توراعاسى الەكساندر بەلوۆيچ پرەزيدەنتتىك جاستار كادر رەزەرۆىنىڭ مۇشەلەرىمەن كەزدەسۋ بارىسىندا قازاقستانداعى قۇرىلىس سالاسى بويىنشا پىكىر ءبىلدىردى, دەپ حابارلايدى Egemen.kz.
«قازاقستاندا قۇرىلىس سالاسى كەيىنگى جىلدارى, اسىرەسە بيىل كەرەمەت ورلەۋدى باستان كەشىرىپ وتىر. مەملەكەتتىك تاپسىرىس تا, جەكە قۇرىلىس جوبالارى دا وتە كوپ. مەن سىزدەرگە ايتايىن, بۇعان دەيىن جىلدار بويى 1991 جىلعى تۇرعىن ءۇيدى پايدالانۋعا بەرۋ كورسەتكىشىن ەڭسەرە الماي كەلدىك. سوۆەت كەزەڭىنەن قالعان مەملەكەتتىك باعدارلاما بار ەدى. سول باعدارلاما اياسىندا قازاقستان ءبىر جىلدا 11,5 ملن شارشى مەتر تۇرعىن ءۇي قولدانىسقا بەرگەن. وسى مەجەنى بىرنەشە جىل بۇرىن عانا ەڭسەردىك», دەدى بيزنەسمەن جاستارمەن كەزدەسۋ بارىسىندا.
سونداي-اق, ول بيىل ەلوردا باسپانا قۇرىلىسى بويىنشا رەكوردتىق كورسەتكىشكە جەتكەنىن ايتتى.
«بەس جىل 1991 جىلدىڭ مەجەسىن ەڭسەرسەك, بيىل 20 ملن شارشى مەتر تۇرعىن ءۇي پايدالانۋعا بەرىلمەك. جالپاقتاپ ايتساق, ەلدەگى ءار ادامعا ءبىر شارشى مەتردەن استام باسپانا كەلەدى دەگەن ءسوز. الەمدە مۇنداي كورسەتكىش وتە از. مىسالى رەسەي فەدەراتسياسىندا جىلىنا ءبىر ادامعا 0,5-0,6 شارشى مەتر باسپانا سالىنادى. ال بىزدە ءبىر ادامعا - 1 شارشى مەتر. ودان ءارى ۇكىمەتتىڭ جوسپارى مۇنىمەن شەكتەلمەيدى. ءبىزدىڭ الدىمىزدا جىلىنا پايدالانۋعا بەرىلەتىن باسپانانىڭ كولەمىن ءبىر ادامعا 1,2-1,3 شارشى مەترگە دەيىن ۇلعايتۋ مىندەتى تۇر. نۇر-سۇلتاندا جىلىنا ادام باسىنا 3 شارشى مەتر تۇرعىن ءۇي سالىنادى. بۇل, ءتىپتى, الەمدىك رەكورد بولۋى دا مۇمكىن. مىسالى, ماسكەۋدە ءبىر ادامعا 0,3 شارشى مەتر باسپانا سالىنادى. مىنە, قۇرىلىس سالاسىنىڭ دامۋ قارقىنى وسىنداي», دەپ قوستى الەكساندر بەلوۆيچ.