اقىندى ەلى ارداقتاعاننان ارتىق باقىت بار ما؟ قالامعا سەرت ەتكەن جاننىڭ جۇرەكسوزى الدىمەن ءوزىنىڭ تۋىپ وسكەن توپىراعىنان باستاۋ الاتىنىن داۋسىز. سودان دا بولار قالامگەر اتاجۇرتىمەن بيىك. وعان دالەل قازاقستان جازۋشىلار وداعىنىڭ مۇشەسى, اقىن تەمىرشە سارىباي ۇلىنىڭ 80 جىلدىعىنا وراي جالاعاش اۋدانىندا وتكەن «سويلە جۇرەك, ءسوز سەندە, تولعا بۇگىن» اتتى رەسپۋبليكالىق جازبا اقىندار جىر ءمۇشايراسى. كەسىندە ايتىس ونەرىنىڭ شىراقشىسى بولعان قالامگەردى حالقى ەسكە الدى.
شارانى جالاعاش اۋدان اكىمىنىڭ ورىنباسارى جاسۇلان ەسپەنبەتوۆ اشىپ, اقىننىڭ ءومىر جولىنا توقتالىپ, تالانت يەسىنىڭ قازاق پوەزياسىندا ەرەكشە قولتاڭباسى بار ەكەنىن ايتتى.
– تەمىرشە اقىننىڭ ولەڭىن وقىعان ادام ونىڭ تۋعان جەرگە تۋىن تىككەن ازامات ەكەنىن شامالايدى. قامال بۇزار قىرىق جاسىندا ونەر قۋىپ, ولەڭ قۋىپ الماتىعا اتتانسا, اراعا وتىز جىل سالىپ, ەلگە ورالدى. بۇل اقىننىڭ ەلگە دەگەن رياسىز ساعىنىشى مەن ماحابباتى بولسا كەرەك. «سىردىڭ جيەگىندە تۇرىپ سۇلۋلىعىنا كوز سالۋدان ارتىق قانداي باقىت بار!», دەپ تامسانعان اقىن جۇرەگى ءومىرىنىڭ سوڭعى ساتىنە دەيىن تۋعان جەرىن جىرلاۋدان تانبادى, – دەدى ول.
جىر مۇشايراعا رەسپۋبليكامىزدىڭ ءار وڭىرىنەن 12 اقىن قاتىستى. بايقاۋ ەكى كەزەڭنەن تۇردى. ءبىرىنشى كەزەكتە جاس اقىندار وزدەرىنىڭ تەمىرشە سارىباي ۇلىنا ارناعان ولەڭدەرىن, ەكىنشى كەزەڭدە ەركىن تاقىرىپتاعى ءوز تۋىندىلارىن وقىدى.
جاس اقىنداردىڭ شىعارماشىلىعىنا قازىلار القاسى – فيلولوگيا عىلىمدارىنىڭ كانديداتى شانجارحان بەكماعانبەتوۆ, قازاقستان جازۋشىلار جانە جۋرناليستەر وداعىنىڭ مۇشەسى , اقىن عازيزا ءابىلدا جانە قازاقستان جازۋشىلار وداعىنىڭ مۇشەسى, اقىن نازگۇل بەردىقوجا باعا بەردى.
جىر سايىسىنىڭ قورىتىندىسىندا شىمكەنتتىك ارايلىم مۇراتاليەۆا ءىىى ورىن, نۇر-سۇلتان قالاسىنان قابىل يسا ءىى ورىن, قىزىلوردالىق اقجول تۇمەنباي ءى ورىندى يەلەنسە, الماتى قالاسىنان كەلگەن نۇرتاس تۇرعانبەك باس جۇلدەنى قانجىعاسىنا بايلادى. سونىمەن قاتار, جەرگىلىكتى اقىن جاسۇلان سەرىكتىڭ اتىنان قوستانايلىق داۋلەت جادىراسىن جانە تەمىرشە سارىباي ۇلىنىڭ وتباسى اتىنان قىزىلوردالىق بيبولات ءساتجان ارنايى جۇلدەمەن ماراپاتتالدى.
شاراعا قاتىسۋشىلاردىڭ بارلىعىنا ديپلومدار مەن قارجىلاي سىيلىق بەرىلدى.