وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, ءجاسوسپىرىم كەشە, 12 جەلتوقسان كۇنى 22:20 شاماسىندا كوپىردەن سەكىرگەن, دەپ حابارلايدى Egemen.kz.
«پوليتسيانىڭ كەزەكشى بولىمىنە اتىراۋ قالاسىنداعى «اتىراۋ» شاعىن اۋدانىندا ورنالاسقان كوپىردەن بەلگىسىز ادامنىڭ سەكىرىپ كەتكەنى تۋرالى حابار ءتۇستى. وقيعا ورنىنا بارعان پاترۋلدىك پوليتسيا باتالونىنىڭ قىزمەتكەرلەرى, پوليتسيا اعا لەيتەنانتى يساتاي تۇرسىنعاليەۆ پەن پوليتسيا سەرجانتى عالىم قالباەۆ سۋ ۇستىنە جارىق ءتۇسىرۋ ارقىلى باتىپ بارا جاتقان قىز بالانى بايقاعان. ۋاقىتتىڭ تىعىزدىعىن سەزگەن ءتارتىپ ساقشىلارى بىردەن قۇتقارۋعا كىرىسكەن. ارقاندى بەلىنە بايلاعان پوليتسيا سەرجانتى عالىم قالباەۆ قىز بالاعا قاراي باعىت الىپ جۇزگەن. پوليتسيا اعا لەيتەنانتى يساتاي تۇرسىنعاليەۆ كومەككە كەلگەن ارىپتەستەرى پوليتسيا اعا لەيتەنانتى ماحامبەت قاباسوۆ پەن پوليتسيا لەيتەنانتى قۇرالبەك قالماعانبەتوۆكە ارقاندى ۇستاتىپ, عالىم قالباەۆتىڭ ارتىنان جۇزە باستاعان. ءتارتىپ ساقشىلارى قىز بالانى 20 مينۋت شاماسىندا جاعاعا الىپ شىقتى. ەس-ءتۇسسىز جاتقان قىزعا جاساندى تىنىس الۋ جاتتىعۋىن جاساعان. تىرشىلىك بەلگىسى بولعانىمەن, ءجاسوسپىرىم دەنەسى قاتتى سالقىننان السىرەپ قالعان. سوندىقتان, ءجاسوسپىرىمدى قىزمەتتىك كولىكپەن №5 ەمحاناعا جەتكىزگەن» دەپ حابارلادى دەپارتامەنتتىڭ ءباسپاسوز قىزمەتى.
دارىگەرلەر 2007 جىلعى جاسوسپىرىمگە دەرەۋ كومەك كورسەتتى. ايازدى كۇنى سالقىن سۋدا ءجۇزىپ, ءجاسوسپىرىمدى اجالدان اراشالاعان ءتارتىپ ساقشىلارىنىڭ دا دەنساۋلىعى تەكسەرىلدى.
«ويلاناتىن ۋاقىت بولمادى. بار ويىم باتىپ بارا جاتقان قىزدى قۇتقارۋ بولدى» دەيدى پوليتسيا سەرجانتى عالىم قالباەۆ.