قازاقستان تاۋەلسىزدىگىنىڭ 30 جىلدىعى قارساڭىندا بەيبىتشىلىك جانە كەلىسىم سارايىندا الەۋمەتتىك ماڭىزى بار ماماندىقتار وكىلدەرىنە قۇرمەت كورسەتۋ ءراسىمى ءوتتى, دەپ حابارلايدى Egemen.kz.
«التىن جۇرەكتى جاندار» مۇسىنشەسىن 30 ۇزدىك مەديتسينا قىزمەتكەرى, پوليتسەيلەر, قۇتقارۋشىلار, كوممۋنالدىق قىزمەت قىزمەتكەرلەرى, ەرىكتىلەر مەن جۋرناليستەر الدى.
كونتسەرتكە قر پرەمەر-ءمينيسترىنىڭ ورىنباسارى ەرالى توعجانوۆ, نۇر-سۇلتان قالاسىنىڭ اكىمى التاي كولگىنوۆ, دەنساۋلىق ساقتاۋ ءمينيسترى الەكسەي تسوي جانە توتەنشە جاعدايلار ءمينيسترى يۋري يلين قاتىستى.
ەل تاۋەلسىزدىگىنىڭ 30 جىلدىعىندا 30 ۇمىتكەر «التىن جۇرەكتى جاندار» مۇسىنشەسى مەن العىس حاتتارعا يە بولدى. ولاردىڭ اراسىندا- نۇر-سۇلتان قالاسى پد جەرگىلىكتى پوليتسيا قىزمەتى باسقارماسىنىڭ يۋۆەنالدى پوليتسيا ءبولىمىنىڭ باستىعى نەلليا دوششانوۆا بار.
«مۇنداي ءىس-شارالار جۇمىس ىستەيتىن قىزمەتكەرلەرگە عانا ەمەس, جاڭادان كەلگەن قىزمەتكەرلەرگە دە ۇلكەن شابىت بەرەدى. جاقسى ىستەر العىس ايتۋدى كۇتپەيدى. كۇن سايىن پوليتسيا قىزمەتكەرلەرىنىڭ, ءورت سوندىرۋشىلەردىڭ, دارىگەرلەردىڭ, كوممۋنالدىق قىزمەت قىزمەتكەرلەرىنىڭ قىزمەتىنە شىعۋ ءبىر ۇلكەن يگى ءىس. بۇل ءىس-شارا وتە ۇلكەن رۋحاني قۇندىلىققا يە. بۇگىنگى ماراپاتقا يە بولۋ وتە كۇتپەگەن جانە قىزىقتى جاعداي بولدى. وسىنداي مۇمكىندىك ءۇشىن باسشىلىققا راحمەت. وسى مۇسىنشەنى العاننان كەيىن جاقسىلىق جاساۋعا دەگەن ىقىلاس ودان دا ارتا ءتۇستى دەپ ايتقىم كەلەدى», دەدى نەللا دوششانوۆا.
ء«وزارا ارەكەتتەستىك ءۇشىن جانە مەنىڭ جۇمىسىما جوعارى باعا بەرگەنى ءۇشىن بارلىعىنا العىس ايتقىم كەلەدى. مەن بولاشاق ستۋدەنتتەر مەن ءوز ماماندىعىمنىڭ ماماندارىن تاربيەلەپ وتىرعان وسى قوعامنىڭ مۇشەسى بولعانىما ريزامىن», دەپ اتاپ ءوتتى «التىن جۇرەكتى جاندار» مۇسىنشەسىنىڭ يەگەرى Astana Polytechnic جوعارى كوللەدجىنىڭ وقىتۋشىسى ەرجان قاسىموۆ.
ەلوردانىڭ جەدەل مەديتسينالىق جاردەم قىزمەتى بريگاداسىنىڭ جۇرگىزۋشىسى ەركىن كوكسەگەن «شۇعىل مەديتسينالىق جاردەم» بولىمىندە 14 جىلدان استام ۋاقىت جۇمىس ىستەيدى. ونىڭ ەڭبەگى دە جوعارى باعالاندى.
اكىمدىككە ەڭبەگىمدى جوعارى باعالاعانى ءۇشىن العىس ايتامىن. پاندەميا كەزىندە بۇل وڭاي بولعان جوق, كوپتەگەن قيىندىقتار بولدى. ءبىز مۇمكىندىگىنشە تەزىرەك كەلۋگە جانە ازاماتتارعا كومەك كورسەتۋگە تىرىسامىز. سوندىقتان بارلىق تۇرعىندارعا ءوز دەنساۋلىعىن ساقتاۋدى تىلەيمىن, دەدى ول.
قۇتتىقتاۋلارىڭىزعا راحمەت, وسى كەشكە قاتىسۋ وتە ۇلكەن مارتەبە. بارشا قازاقستاندىقتاردى الداعى تاۋەلسىزدىك كۇنىمەن قۇتتىقتايمىن, بەيبىتشىلىك پەن گۇلدەنۋ تىلەيمىن, دەدى ورتكە قارسى قىزمەت ورگاندارىندا 17 جىلعا جۋىق جۇمىس ىستەپ كەلە جاتقان №17 ءورت ءسوندىرۋ ءبولىمىنىڭ راديوتەلەفونيستى گۇلدەن انافينا.
ماراپاتتالعانداردىڭ اراسىندا 8 جىلدان بەرى ۆولونتەرلىكپەن اينالىساتىن اينۇر مۋسينا دا بولدى.
«مەنىڭ قىزمەتىم ادامداردىڭ ءومىرى ءۇشىن ماڭىزدى. ويتكەنى, ادامدار ءتۇرلى جاعدايلارعا تاپ بولادى, ول كەزدە ولار ەشقانداي جول جوق دەپ ويلايدى. بىرەۋدىڭ ولارعا كومەك قولىن سوزۋى وتە ماڭىزدى. ءراسىم مەن ءۇشىن وتە قىزىقتى ءوتتى, بۇل كۇتپەگەن جاعداي بولدى. مەن 8 جىل بويى ەرىكتىلىكپەن اينالىسامىن جانە مۇنداي ماراپاتتار باسقا ەرىكتىلەردى ىنتالاندىرادى دەپ ويلايمىن. مەنىڭ ويىمشا, بۇل جۇمىستىڭ قۇندىلىعى ارتقانسايىن ەرىكتىلەردىڭ قاتارى كوبەيەدى. سەنىم بىلدىرگەندەرىڭىز ءۇشىن العىس ايتامىن, بۇل وتە قۇندى ماراپات, ارىپتەستەرىمە ۇيىمشىل جۇمىس ءۇشىن راحمەت. ءبىر كەزدەرى ماعان وتە قيىن بولعان كەزدە ماعان بەيتانىس ادامدار كومەكتەستى. سودان كەيىن مەن دە وزگەلەرگە سولاي جاقسىلىق جاسايتىن ۋاقىت كەلدى دەپ ويلادىم. مەن شىن جۇرەكتەن سەنەمىن: ەگەر ادامدار ومىردەگى قانداي دا ءبىر جاعدايلار مەن قيىندىقتارعا قاراماستان مەيىرىمدى بولىپ, داميتىن بولسا, وندا ءسىز كوپتەگەن ادامداردىڭ ءومىرىن قۇتقارا الاسىز. قازاقستاندىقتاردى تاۋەلسىزدىكتىڭ 30 جىلدىعىمەن قۇتتىقتايمىن. بۇل بۇكىل ەل ءۇشىن وتە ماڭىزدى كۇن», دەدى اينۇر مۋسينا.
ءراسىم بارىسىندا سونداي-اق وزدەرىنىڭ كاسىبي بورىشتارىن ورىنداي وتىرىپ, ومىرلەرىن قيعان الەۋمەتتىك ماڭىزى بار ماماندىق وكىلدەرىن ەسكە الدى.
ءىس-شارا بارلىق سانيتارلىق نورمالار مەن كارانتين تالاپتارىن ساقتاي وتىرىپ ءوتتى.