سەنات توراعاسى ماۋلەن اشىمباەۆ جۇمىس ساپارىمەن ماڭعىستاۋ وبلىسىنا بارىپ, تاۋەلسىزدىكتىڭ 30 جىلدىعىنا ارنالعان سالتاناتتى ءىس-شارا اياسىندا مەملەكەتتىك ناگرادالاردى تاپسىرۋ راسىمىنە قاتىستى, دەپ حابارلايدى Egemen.kz.
ماڭعىستاۋ تۇرعىندارىن ايتۋلى مەرەكەمەن قۇتتىقتاعان ماۋلەن اشىمباەۆ تۇڭعىش پرەزيدەنت – ەلباسى نۇرسۇلتان نازارباەۆتىڭ باسشىلىعىمەن تاۋەلسىزدىكتىڭ 30 جىلىندا قول جەتكىزگەن ماڭىزدى جەتىستىكتەرگە توقتالىپ, وسى جىلدار ىشىندە قازاقستان تاۋەلسىز مەملەكەت رەتىندە تولىق قالىپتاسىپ, حالىقارالىق قاۋىمداستىقتىڭ بەدەلدى ءارى ىقپالدى مۇشەسىنە اينالعانىن تىلگە تيەك ەتتى.
«ەلباسىنىڭ باستاماسىمەن ءبىز سەمەي يادرولىق سىناق پوليگونىن جاۋىپ, كەڭەس وداعىنان مۇرا بولىپ قالعان يادرولىق ارسەنالدان ازات بولدىق. بۇل ءبىزدىڭ جاھاندىق قاۋىپسىزدىك پەن بەيبىتشىلىك ۇستانىمدارىنا بەرىك ەكەنىمىزدى كورسەتىپ, الەم ەلدەرىنىڭ قازاقستانعا دەگەن سەنىمىن كۇشەيتە ءتۇستى. قازاقستان حالىقارالىق باستامالاردى دا ىسكە اسىرۋعا بەلسەندى قاتىسىپ, بەدەلدى ۇيىمدارعا توراعالىق ەتتى», دەدى ماۋلەن اشىمباەۆ قۇتتىقتاۋ سوزىندە.
ول 30 جىلدىڭ ىشىندە ەلىمىزدىڭ بارلىق ءوڭىرى, ونىڭ ىشىندە ماڭعىستاۋ وبلىسى دا قارقىندى دامىعانىن ايتتى.
«ماڭعىستاۋ وبلىسى ەلىمىزدىڭ دامۋىندا ەرەكشە ورىن الادى. مۇندا 30 جىلدا بىرقاتار ءىرى جانە ورتا كاسىپورىندار بوي كوتەردى. سونىڭ ارقاسىندا مىڭداعان جۇمىس ورنى اشىلدى. مەملەكەت تەمىرجول جەلىلەرى مەن اۆتو جولدار سالىپ, تەڭىز پورتىن دامىتتى. سوڭعى جىلدارى ماڭعىستاۋدا تۋريزم سالاسى دا قارقىندى دامىپ كەلەدى», دەدى سەنات توراعاسى.
سونىمەن قاتار ول مەملەكەت باسشىسىنىڭ تاپسىرماسىمەن ەلىمىزدە جۇرگىزىلىپ كەلە جاتقان ساياسي, ەكونوميكالىق جانە الەۋمەتتىك رەفورمالار جايىندا ءسوز قوزعادى. پرەزيدەنت قاسىم-جومارت توقاەۆتىڭ ەلىمىزدى جاڭعىرتۋ باعدارى اياسىندا وڭىرلەردى دامىتۋ جانە ايماقتارداعى ماسەلەلەردى شەشۋ نەگىزگى باسىمدىقتاردىڭ ءبىرى ەكەنىن جەتكىزدى.
«ماڭعىستاۋ ءوڭىرى ءۇشىن وزەكتى ماسەلەلەردىڭ ءبىرى - ساپالى اۋىز سۋمەن قامتاماسىز ەتۋ. پرەزيدەنتىمىز 2025 جىلعا دەيىن قالالار مەن اۋىلداردا اۋىز سۋ ماسەلەسىن شەشۋدى تاپسىردى. سوعان بايلانىستى بەكىتىلگەن ارنايى ۇلتتىق جوبا اياسىندا بۇل باعىتتا ماڭعىستاۋ وبلىسىندا دا ايتارلىقتاي جۇمىس اتقارىلادى», دەدى سەنات توراعاسى.
ءوز سوزىندە وبلىس اكىمى نۇرلان نوعاەۆ تاۋەلسىزدىك العالى ءوڭىردىڭ الەۋمەتتىك-ەكونوميكالىق دامۋ كورسەتكىشتەرىنە توقتالا كەتتى.
«تۇڭعىش پرەزيدەنتىمىز نۇرسۇلتان ءابىش ۇلى نازارباەتىڭ قاجىر-قايراتىنىڭ ارقاسىندا ەلىمىز ءوسىپ-وركەندەدى. ول تاۋەلسىز قازاقستاننىڭ بەرىك ىرگەتاسىن قالاپ, ەلىمىزدىڭ بەلسەندى دامۋ باعدارىن ايقىنداپ بەردى. قازىرگى تاڭدا پرەزيدەنتىمىز ەلباسىنىڭ سىندارلى ساياساتىنىڭ ساباقتاستىعىن ساقتاي وتىرىپ, كوزدەگەن ماقساتتارعا جەتۋ جولدارىن بەلگىلەدى. ءبىز قاشاندا وتكەنگە قۇرمەتپەن, كەلەشەككە نىق سەنىممەن قاراعان حالىقپىز», دەدى ول ءوز سوزىندە.
سالتاناتتى جيىن بارىسىندا سەنات سپيكەرى مەملەكەت باسشىسىنىڭ اتىنان ەلىمىزدىڭ جانە ءوڭىردىڭ دامۋىنا ەلەۋلى ۇلەس قوسقان ماڭعىستاۋلىقتارعا مەملەكەتتىك ناگرادالاردى تاپسىردى.
«وڭىرلەردى دامىتۋ ماسەلەسى, ونىڭ ىشىندە ماڭعىستاۋدى وركەندەتۋ پرەزيدەنتىمىزدىڭ تىكەلەي باقىلاۋىندا. بيىل قىركۇيەكتە مەملەكەت باسشىسى وبلىستىڭ الەۋمەتتىك-ەكونوميكالىق دامۋى جونىندە ارنايى كەڭەس وتكىزدى. وسىنداي ناقتى شارالاردىڭ ارقاسىندا ماڭعىستاۋ ءوڭىرى الداعى ۋاقىتتا دامۋدىڭ جاڭا دەڭگەيىنە كوتەرىلەدى دەپ سەنەمىز», دەدى ماۋلەن اشىمباەۆ.
سونداي-اق سەنات توراعاسى جۇمىس ساپارى اياسىندا اقتاۋ قالاسىنداعى ونكولوگيالىق ديسپانسەرگە ارنايى بارىپ, دارىگەرلەر مەن مەديتسينا قىزمەتكەرلەرىمەن كەزدەستى. ودان بولەك, «حالىق ارەنا» سپورت كەشەنىنىڭ جۇمىسىمەن دە تانىستى.