كەنشىلەر استاناسىنداعى ءاليا مولداعۇلوۆا اتىنداعى وليمپيادالىق رەزەرۆتىڭ وبلىستىق مامانداندىرىلعان مەكتەپ-كوللەدج-ينتەرناتىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي «تاۋەلسىزدىك لەنتاسى» اكتسياسىنىڭ اشىلۋ سالتاناتى ءوتتى.
تاۋەلسىزدىك لەنتاسىنىڭ تۇساۋى 2020 جىلدىڭ 12 جەلتوقسانىندا قاراعاندى قالاسىندا كەسىلگەن بولاتىن. بيىل ۇيىمداستىرۋشىلار اتالعان ءىس-شارانى ەل تاۋەلسىزدىگىنىڭ 30 جىلدىعىنا جانە بىرقاتار تاريحي داتاعا ارنادى. ولاردىڭ قاتارىندا ەكىنشى شىعىس تۇركى قاعاناتىنىڭ نەگىزىن سالۋشىلاردىڭ ءبىرى, ءۇش بىردەي قاعاننىڭ كەڭەسشىسى بولعان تونىكوكتىڭ تۋعانىنا – 1375 جىل, شىعىس تۇركى قاعاناتىنىڭ بيلەۋشىسى بىلگە قاعاننىڭ تۋعانىنا – 1340 جىل, قاسىم جانىبەك ۇلىنىڭ حان اتانعانىنا – 510 جىل, ابىلاي حاننىڭ تۋعانىنا – 310 جىل, قازاق حاندىعىنىڭ قالىپقا كەلتىرىلگەنىنە – 180 جىل, ءاليحان بوكەيحاننىڭ تۋعانىنا – 155 جىل, ءالىمحان ەرمەكتىڭ تۋعانىنا – 130 جىل جانە باسقا دا تاريحي تۇلعالاردىڭ مەرەيتويلارى بار.
«تاۋەلسىزدىك تاسپاسى» اكتسياسىن ۇيىمداستىرۋشىلاردىڭ ءبىرى نۇرجان سۇرشا ۇلى بۇل ءىس-شارانىڭ قاراعاندى وبلىسىن جانە نۇر-سۇلتان قالاسىن قامتيتىنىن ايتادى.
– اكتسيا بارىسىندا جاستارمەن كەزدەسىپ, تاۋەلسىزدىك تاسپاسىندا كورىنىس تاپقان تاريحي تۇلعالار جايلى ايتىپ بەرۋدى جانە تاسپالاردى تاراتۋدى ماقسات ەتىپ وتىرمىز. ءىس-شارادا بارلىعى مىڭنان اسا تاسپا تاراتىلاتىن بولادى, –دەيدى ول.
تاۋەلسىزدىك تاسپاسىندا قازاق تاريحىنا ەسىمدەرى التىن ارىپپەن جازىلعان جەتى تاريحي تۇلعا مەن ءتورت تاريحي داتا, قازاقستان رەسپۋبليكاسىنىڭ جەر اۋماعىن بەينەلەيتىن كارتا مەن تۇركى قاعاناتىنىڭ ءبورىلى بايراعى كورىنىس تاپقان. لەنتانىڭ استىڭعى جاعىندا ءبىرىنشى بولىپ قازاقستان رەسپۋبليكاسىنىڭ قازىرگى جەر اۋماعىن بەينەلەيتىن كارتا, ودان كەيىن وسى اۋماقتا مەكەن ەتكەن ساقتاردىڭ ەسىك قورعانىنان تابىلعان التىن ادام بەينەلەنگەن.
ۇيىمداستىرۋشىلار ەل ازاماتتارى تاۋەلسىزدىك تاسپاسىن قازاقستان رەسپۋبليكاسىنىڭ مەملەكەتتىك مەرەكەلەرىندە, سالتاناتتى شارالاردا تاعىپ جۇرسە دەگەن تىلەك ايتادى.
– تاۋەلسىزدىك تاسپاسىن تاعىپ ءجۇرۋ ءاربىر ازامات ءۇشىن ۇلكەن جاۋاپكەرشىلىك جانە ونىڭ يەگەرى لەنتادا بەينەلەنگەن ۇلى تۇلعالاردىڭ جولىن جالعاستىرۋعا, ساقتاۋعا, ونى جاس ۇرپاققا ناسيحاتتاۋعا مۇمكىندىگى كەلگەنشە اتسالىسسا, نۇر ۇستىنە نۇر بولار ەدى, – دەيدى ن.سۇرشا ۇلى.
ال تاسپانى كەۋدەگە تاعۋدىڭ ءتارتىبى Youtube ارناسىنداعى «تاۋەلسىزدىك لەنتاسىن قالاي تاعامىز؟» اتتى روليكتە كورسەتىلگەن ەكەن.
قاراعاندى وبلىسى