مەملەكەت باسشىسى نۇرسۇلتان نازارباەۆ حالىقارالىق كونسۋلتاتيۆتىك كەڭەس مۇشەلەرىمەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى.
اقوردادا وتكەن كەزدەسۋگە اۆستريا رەسپۋبليكاسىنىڭ ەكس-فەدەرالدى كانتسلەرى الفرەد گۋزەنباۋەر, پولشانىڭ ەكس-پرەزيدەنتى الەكساندر كۆاسنەۆسكي, ەۋروپالىق كوميسسيانىڭ ەكس-توراعاسى ءارى يتاليانىڭ بۇرىنعى پرەمەر-مينيسترى رومانو پرودي قاتىستى.
اڭگىمەلەسۋ بارىسىندا قازاقستاننىڭ ەكونوميكالىق الەۋەتىن ودان ءارى ىسكە اسىرۋدىڭ نەگىزگى باعىتتارى, رەسپۋبليكانىڭ حالىقارالىق باستامالارىن جۇزەگە اسىرۋ بارىسى, سونداي-اق ەكسپو-2017 كورمەسىن ءوتكىزۋگە دايىندىق جايى تالقىلاندى. بۇدان بولەك, حالىقارالىق كۇن ءتارتىبىندەگى ماسەلەلەر, سونىڭ ىشىندە ۋكرايناداعى جاعداي جونىندە پىكىر الماسىلدى.
مەملەكەت باسشىسى قازاقستان ءۇشىن قىزىعۋشىلىق تۋدىراتىن حالىقارالىق ارەناداعى وزەكتى ماسەلەلەر تالقىلاناتىن كەزدەسۋدى كەڭەس مۇشەلەرىمەن تۇراقتى وتكىزىپ تۇرۋدىڭ ماڭىزدىلىعىن اتاپ ءوتتى.