اقپان ايىندا بەلارۋسسيا كونستيتۋتسيانى جاڭارتۋ ماقساتىندا رەفەرەندۋم وتكىزەدى. بۇل تۋرالى الەكساندر لۋكاشەنكو «روسسيا سەگودنيا» حالىقارالىق اقپارات اگەنتتىگىنىڭ باس ديرەكتورى دميتري كيسەلەۆكە بەرگەن سۇحباتىندا ايتتى, دەپ حابارلايدى Egemen.kz.
«بەلتا» باسىلىمى بەلارۋستىڭ جاڭارتىلعان كونستيتۋتسياسىنىڭ جوباسى جاڭا جىلعا دەيىن جاريالاناتىنىن جانە ەگەر توتەنشە جاعداي بولماسا, 20 اقپاندا رەفەرەندۋم وتكىزۋ جوسپارلانعانىن جازادى.
«قازىر جوبا مەنىڭ ۇستەلىمدە. قۇجاتتار زەردەلەنگەننەن كەيىن رەفەرەندۋمعا شىعارىلادى. ونى ءبىر ايعا جۋىق ۋاقىت ىشىندە جاريالايتىن بولامىز», دەدى الەكساندر لۋكاشەنكو ءوز سوزىندە.
مەملەكەت باسشىسىنىڭ ايتۋىنشا, جاڭارتىلعان كونستيتۋتسيادا ۇكىمەت پەن پارلامەنتتىڭ ءرولى كۇشەيتىلىپ, ولارعا كونستيتۋتسيالىق مارتەبە بەرىلەدى.