شۆەدوۆا شيرەك فينالعا شىقتى

قازاقستاندىق تەننيسشى ياروسلاۆا شۆە­دوۆا برازيليادا ءوتىپ جاتقان Brasil Tennis Cup ءتۋرنيرىنىڭ 1/4 فينالىنا ءوتتى. ول جارىستى جاقسى باستاپ, ءبىرىنشى اينالىمدا يسپان تەننيسشىسى سيلۆيا سولەر-ەسپينوسانى ەكى سەتتە جەڭسە, ودان كەيىن چەح سپورتشىسى باربارا زاحلاۆوۆا-سترىكوۆانى – 6:2, 7:5 ەسەبىمەن ۇتتى. ەندى ول شيرەك فينالدا ءتۋرنيردىڭ التىنشى راكەتكاسى رۋمىن تەننيسشىسى الەكساندرا كادانتۋمەن كەزدەسەدى. وسى تۋرنيردە  شۆەدوۆا جۇپتىق سىندا دا ونەر كورسەتۋدە. ول انابەل مەدينا گار­ريگەسپەن بىرگە ەكى ويىندى جەڭىپ, جارتىلاي فينالعا جولداما الدى. ءتۋرنيردىڭ سىياقى قورى – 250 مىڭ اقش دوللارى.  

جاستار مىقتىنى انىقتايدى

قىزىلوردادا 1996-1997 جىلدارى تۋعان جاستار اراسىندا بوكستان ەل چەمپيوناتى باستالدى. وعان ەلىمىزدىڭ بارلىق وڭىرىنەن كەلگەن 200-گە جۋىق بىلعارى قولعاپ شەبەرى قاتىسۋدا. جەكپە-جەكتەر 11 سالماق دارەجەسى بويىنشا وتۋدە. بيىلعى جاستار اراسىندا ءوتىپ جاتقان جارىسقا الەم, ازيا چەمپيوناتىنا قاتىسقان بوكسشىلار دا كۇش سىناسۋدا. ولاردىڭ اراسىندا الەم چەمپيونى استانالىق راحات مىرجىقپاەۆ, ازيا چەمپيوندارى قاراعاندىلىق ۆلاديسلاۆ ستالبوۆسكي, قىزىلوردالىق سابىرجان ءابىلوۆ پەن باسقا دا بوكسشىلار بار. قازاقستان چەمپيوناتى ءبىر اپتاعا سوزىلادى. «ەگەمەن-اقپارات».