سينتەتيكالىق ەسىرتكى وندىرىسىمەن اينالىسقان الماتىلىق 10 جىلعا باس بوستاندىعىنان ايىرىلدى, دەپ حابارلايدى Egemen.kz.
الماتى قالالىق سوتىندا حابارلانعانداي, ش. ەسىمدى كۇدىكتى ينتەرنەت ارقىلى مەفەدرون دايىنداۋ ءۇشىن رەاگەنتتەرى بار كونسترۋكتورعا تاپسىرىس بەردى. ساتى الىنعان كومپونەنتتەردى 4 كۇنگە جالعا العان پاتەرگە الىپ كەلىپ, ودان ءارى ساتۋ ءۇشىن پسيحوتروپتىق زاتتاردى دايىنداي باستادى.
«جەدەل ىزدەستىرۋ ءىس-شارالارىنىڭ ناتيجەسىندە الماتى قالاسى پوليتسيا دەپارتامەنتىنىڭ ەسىرتكى بيزنەسىنە قارسى ءىس-قيمىل باسقارماسىنىڭ قىزمەتكەرلەرى جالعا الىنعان پاتەردى ءتىنتۋ بارىسىندا پسيحوتروپتىق زاتتاردى وندىرۋگە ارنالعان جابدىقتار عانا ەمەس, سالماعى 196,22 گرامم مەفەدرون ەسىرتكىسىن دە تاۋىپ تاركىلەدى», دەلىنگەن سوت حابارلاماسىندا.
قالالىق سوتتا تۇسىندىرىلگەندەي, مۇنداي قىلمىس ءۇشىن قك-ءنىڭ 297-بابىنىڭ 3-بولىگىنىڭ سانكتسياسى ون جىلدان ون بەس جىلعا دەيىنگى مەرزىمگە باس بوستاندىعىنان ايىرۋ جازاسىن قاراستىرادى.
«الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ پسيحوتروپتىق زاتتى وتكىزۋ ماقساتىندا زاڭسىز دايىنداعانى, اسا ءىرى مولشەردە ساقتاعانى ءۇشىن سوتتالعانعا قاتىستى (قك-ءنىڭ 297-بابىنىڭ 3-بولىگى 3-تارماعى) 10 جىلعا باس بوستاندىعىنان ايىرۋ ۇكىمىن اپەللياتسيالىق ساتى وزگەرىسسىز قالدىردى. سوتتالۋشىنىڭ جەكە باسىن تۇزەۋ, جاڭا قىلمىستىق قۇقىق بۇزۋشىلىقتار جاساۋدىڭ الدىن الۋ ءۇشىن قاجەتتى جانە جەتكىلىكتى, ونىڭ جەكە باسى, ءىس-ارەكەتتىڭ سيپاتى مەن قوعامدىق قاۋىپتىلىك دارەجەسى تۋرالى دەرەكتەردى ەسكەرە وتىرىپ, 10 جىل باس بوستاندىعىنان ايىرۋ تۇرىندەگى جازا تاعايىندالدى», دەپ ناقتىلادى سوتتا.
ءىس اپەللياتسيالىق ساتىدا سوتتالعان ادامنىڭ جانە ونىڭ ادۆوكاتىنىڭ اپەللياتسيالىق شاعىمدارى بويىنشا قارالدى. سوت ۇكىمى كۇشىنە ەندى.