كۇنى كەشە ەلباسى «ەلدىكتىڭ جەتى تۇعىرى» اتتى قاعيداتتار جيىنتىعىندا «مەملەكەتتىك ءتىلدى ءبىلۋ, ۇلتتىق قۇندىلىقتاردى قادىرلەۋ – ءار ازاماتتىڭ پارىزى» دەپ اتاپ كورسەتتى. قازاقستاننىڭ تۇڭعىش پرەزيدەنتى بۇعان دەيىن دە: «قازاقستاننىڭ كەلەشەگى – قازاق تىلىندە», دەگەنى بەلگىلى. بۇدان ارتىق قالاي ايتۋعا بولادى.
پرەزيدەنت قاسىم-جومارت توقاەۆ تا جولداۋىندا: «قازاق ءتىلى, شىن مانىندە, ءبىلىم مەن عىلىمنىڭ, مادەنيەت پەن ءىس جۇرگىزۋدىڭ تىلىنە اينالۋدا. جالپى, مەملەكەتتىك ءتىلدى قولدانۋ اياسى كەڭەيىپ كەلەدى. بۇل – زاڭدى قۇبىلىس, ءومىردىڭ باستى ءۇردىسى», دەپ ساليقالى ويىن بىلدىرگەن بولاتىن. مەملەكەت باسشىسى كۇنى كەشە عانا سىرتقى ىستەر مينيسترلىگىنىڭ كەڭەيتىلگەن القا وتىرىسىندا سول ويىن تياناقتاپ, «قازاقستان اتىنان شەت مەملەكەتتەردە قىزمەت ىستەپ جۇرگەن ديپلوماتتارىمىز الدىمەن مەملەكەتتىك ءتىلدى ءبىلۋى كەرەك», دەپ انا ءتىلىنىڭ ابىرويى بارشادان اسقاق بولۋىن ۇلگى ەتتى.بۇل رەتتە ەلگە قىزمەت ەتەمىن دەيتىن ازاماتتار الدىمەن تىلگە قىزمەت ەتۋ قاجەتتىگىن ۇعىنۋى كەرەك. بۇل – ۋاقىت تالابى, مەملەكەتىمىزدىڭ تاۋەلسىزدىگى مەن ۇلتتىق قاۋىپسىزدىگىمىز ءۇشىن ماڭىزدى قادام.راسىندا, ۇلتتىڭ التىن دىڭگەك ارقاۋى, رۋحاني ءومىر-تىرشىلىگىنىڭ وزەگى, قادىر-قاسيەتىنىڭ قالقانى – انا ءتىلى. ول – ۇلتىمىزدىڭ ار-نامىسىنىڭ ءمولدىر ايناسى. ءبىزدىڭ حالىقتىق قالپىمىز دا, ءداستۇر-سالتىمىز دا ءتىلىمىز ارقىلى ساقتالىپ, بۇگىنگە جەتتى. سوندىقتان انا ءتىلى – ءبىزدىڭ بويتۇمار تاريحىمىز عانا ەمەس, بولاشاق تاعدىرىمىز. ەندەشە, ءتىلدىڭ تاعدىرى بوس بايبالام ەمەس, بايىپتى بايلاممەن رەتتەلۋگە ءتيىس. ويتكەنى بۇل – ارانداتىپ, ارزان ۇپاي جينايتىن الاڭ ەمەس, بۇل – ءاربىر ازاماتتان نامىس پەن تەرەڭ جاۋاپكەرشىلىك, ىشكى مادەنيەت پەن شىنايى ىزگىلىكتى تالاپ ەتەتىن نازىك نۇكتە.ارايلى ازاتتىقپەن شاتتانىپ قاۋىشقان حالقىمىز كەڭەستىك قوعامنىڭ كىناسىنەن ءوز تىلىنەن جۇرداي بولعان بۋىنعا كەشىرىممەن قارادى. توزىمدىلىك تانىتىپ, بولاشاق كۇندەردەن ءۇمىت كۇتتى. ءبىر قاراساڭىز, مەملەكەتتىك ءتىل تۋرالى اتاۋلى زاڭ-قارارلار قابىلداندى, ونى دامىتاتىن جۇيە قالىپتاستى, قازاقتىلدى وقۋ ورىندارى مولىنان اشىلىپ, كاسىبي ماماندار دايارلاندى, ەڭ ماڭىزدىسى ۇلتىمىزدىڭ سانى قاۋلاپ ءوستى. مۇنداي جاعدايدا انا ءتىلىنىڭ ابىرويى اسقاقتاپ, ءورىستى وركەن جايۋى كەرەك-ءتى.دەسەك تە, ءتاۋ ەتەر تاۋەلسىزدىگىمىزگە وتىز جىل تولعانىمەن ءتىلىمىز تورگە وزا الماي, بوساعانى ساعالاپ, تۇرمىستىق ايادا قولدانىستا قالعانىن مويىنداماسقا تاعى امالىمىز جوق. مەملەكەتتىك مارتەبەسى بولعانىمەن قازاق ءتىلىنىڭ تۇعىرىنا قونا الماي, كوبىنە اۋدارما ساناتىندا قولدانىلاتىنى دا بارشاعا ايان. ەلىمىزدىڭ ەكى شىلبىر, ءبىر تىزگىنىن ۋىسىندا ۇستاپ وتىرعان ەليتا, قازىنا يەسى قارجىگەرلەر, بيزنەستەگى بىلىكتىلەر, شەشىم قابىلدايتىن شەندىلەر مەن شەنەۋنىكتەر قازاق تىلىنە كەلگەندە كىبىرتىكتەپ قورعالاپ, وزگە ءتىل دەگەندە جورعالاپ كەتەتىنى – بۇگىنگى رۋحاني كەمباعال ءحالىمىزدىڭ كورىنىسى. ەندى مەملەكەتتىك قىزمەتشىلەر تاعدىرىن وتانىنىڭ بولاشاعىمەن بايلانىستىرعىسى كەلسە, مەملەكەتتىك ءتىلدى مەڭگەرۋگە مىندەتتى. پرەزيدەنتتەر دە سايلانار الدىندا مەملەكەتتىك تىلدەن ەمتيحان تاپسىرۋى – بارشا مەملەكەتتىك قىزمەتشىگە ۇلگى. اسىرەسە بۇقاراعا قىزمەت كورسەتەتىن سالالار ۇلت تىلىنەن الشاق بولماۋى كەرەك, بۇل – مەملەكەتتىڭ ۇلتتىق تارتىمدى اجارىن قالىپتاستىرۋعا العىشارت.ءتىلدىڭ تاعدىرى الاڭدا ەمەس, زاڭ شەڭبەرىندە شەشىلۋگە ءتيىس. سوندىقتان ء«تىل تۋرالى» زاڭنىڭ 23-بابىندا قىزمەت كورسەتۋ سالالارى مەن كاسىپ, ماماندىق, لاۋازىم يەلەرىنىڭ مەملەكەتتىك ءتىلدى ءبىلۋ تىزبەسى جونىندە ارنايى باپ بار, سونى قابىلدايتىن ۋاقىت كەلگەن سياقتى.قابىرعالى جۇرتىمىزدى جۇمىلدىرىپ, ۇلتىمىزدى ۇيىتىپ, ۇلىسقا ۇستىن بولعان قاستەرلى قازىنامىز – ءتىلىمىز. ءبىزدىڭ ءتىلىمىز باي, قۇنارلى, قاستەرلى عانا ەمەس, كەڭ ءارى مەيىربان. ۇلى دالا توسىندە كوسىلە جورتقان ۇلىستاردىڭ بۇگىندە ديالەكتىسىز تۇتاس ءتىلدىڭ توڭىرەگىنە توپتاسقان ۇلاعاتتى ۇلتقا اينالۋى – سونىڭ كورىنىسى. بۇل ورايدا قازاق ءتىلىن ۇيرەنۋگە نيەت تانىتىپ, بىراق ءبىر-ەكى اۋىز جاڭساق سويلەگەندى كەلەمەج ەتكەننەن ۇتارىمىز شامالى. ءوزى از قازاقتى «تازا قازاق, شالا قازاق» دەپ ءبولۋ دە وپا بەرمەيدى. ماسەلەن, شەتەلدە ءجۇرىپ سول ەلدىڭ تىلىندە ءبىر-ەكى اۋىز سويلەسەڭ, ايتارىڭدى ۇقسا بولعانى, قولداپ قۇرمەت بىلدىرەدى.تۇركىستاندا حالىقارالىق «قازاق ءتىلى» قوعامىنىڭ قۇرىلتايى وتپەك ەكەن. مەملەكەتتىك حاتشى قىرىمبەك كوشەرباەۆتىڭ توراعالىعىمەن وتەتىن القالى باسقوسۋدا تولعاقتى تاقىرىپ توڭىرەگىندەگى تۇيتكىلدەر شەشىمىن تاپپاق. بۇل قازاق ءتىلىن مەملەكەت شىنداپ قولعا الدى دەگەن ءسوز بولسا كەرەك.ءولىپ قالعان يۆريت ءتىلىن ءتىرىلتىپ العان – نيەت, نامىس, ءبىلىم جانە ۇلتتىق جىگەر. تۇپتەپ كەلگەندە, ءبىزدىڭ ءتىلىمىزدىڭ تاعدىرى دا ۇلتتىق نامىسقا كەلىپ تىرەلەدى. ەندەشە, ەندىگى بىزگە كەرەگى دە – جاناشىر جۇرتتىڭ جىگەرلى ارەكەتى!