شىعىس قازاقستان وبلىسى بورودۋليحا اۋدانى اكىمىنىڭ بۇرىنعى ورىنباسارى پارا العانى ءۇشىن تۇرمەگە قامالدى, دەپ حابارلايدى Egemen.kz.
اۋداندىق سوت ءباسپاسوز قىزمەتىنىڭ مالىمەتىنە سۇيەنسەك, بورودۋليحا اۋدانى اكىمىنىڭ ورىنباسارى قىزمەتىن اتقارعان سوتتالۋشى وسى جىلدىڭ ناۋرىز-شىلدە ايلارى ارالىعىندا كولىك جولدارىن جوندەۋگە قوسىمشا كەلىسىمدەر جاساسۋ كەزىندە جشس باسشىسىنا كومەك كورسەتەمىن دەپ 1 800 000 تەڭگە پارا العان.
سوت بارىسىندا ونىڭ كىناسى كۋاگەرلەر سوزىمەن جانە جاسالعان كەلىسىم شارت سىندى قۇجاتتارمەن دالەلدەندى.
«ايىپتالۋشى ءوز سوزىندە كىناسىن مويىنداپ, جەڭىل جازا تاعايىنداۋدى سۇرادى. سوت ۇكىمىمەن ول 3 جىل مەرزىمگە تۇرمەگە قامالدى. سونىمەن قاتار اۋدان اكىمىنىڭ بۇرىنعى ورىنباسارى مەملەكەتتىك قىزمەتتە جۇمىس ىستەۋ قۇقىعىنان ءومىر بويىنا ايىرىلعان», دەلىنگەن اقپاراتتا.
ايتا كەتەيىك, ۇكىم ءالى زاڭدى كۇشىنە ەنگەن جوق.